Նահատակութիւնը ծնունդ է երկինքի մէջ. Լեւոն ԺԴ
Ռոպէր Աթթարեան - Վատիկան
Ուրբաթ` 26 դեկտեմբերին տօնն է Սուրբ Ստեփանոս նախավկային, որուն առիթով Լեւոն ԺԴ. Պապը Առաքելական Պալատի իր գրասենեակի պատուհանէն գլխաւորեց Մարեմեան աղօթքը, ի ներկայութեան հազարաւոր հաւատացեալներուն, որոնք համախմբուած էին Սուրբ Պետրոս հրապարակին վրայ։
Նախ քան Մարեմեան աղօթքը արտասանելը Քահանայապետը ներկայացուց տօնին նուիրուած խորհրդածութիւն մը, որուն մէջ անդրադարձաւ նահատակութեան իմաստի մասին` որպէս ծնունդ երկնքի մէջ։
Սուրբ Ստեփանոսի ծնունդը
Այսօր, ըսաւ Ան, Սուրբ Ստեփանոսի «ծնունդն է».... որովհետեւ «մարտիրոսութիւնը երկնքի մէջ ծնունդ է», ակնարկելով Սուրբի նահատակութեան` Գործք Առաքելոցի գիրքին մէջ պատմուած դրուագին, ու հաստատելով, թէ «այն ամէն բաները որ սուրբ Ստեփանոսը կ՛ըսէ ու կ՛ընէ ցոյց կու տան աստուածային սէրը որ յայտնուեցաւ Յիսուսին մէջ` «Լոյսը, որ կը փայլի մեր խաւարին մէջ»։
Ոչ մէկ զօրութիւն կը գերիշխէ Աստուծոյ զօրութեան վրայ
Սրբազան Պապը ընդգծեց, որ Ստեփանոսի դէմքի լոյսը, նման Յիսուսի դէմքի լոյսին, աստուածային սիրոյ դրսևորումն է, և թէ Յիսուսի ծնունդը մեզի կոչ կ՛ընէ ապրելու որպէս Աստուծոյ զաւակներ: Ան նաև նշեց, որ Յիսուսի գեղեցկութիւնը և Անոր ուսմունքները մերժուած են շատերու կողմէ։
Տակաւին կան մարդիկ որոնք կ՛ընտրեն արդարութիւնը
«Աշխարհին մէջ ամենուրեք կան մարդիկ, որոնք կ՛ ընտրեն արդարութիւնը նոյնիսկ եթէ սուղ գին մը ունի, կան անձինք` որոնք խաղաղութիւնը կը դնեն իրենց վախերէն վեր, անձեր` որոնք կը ծառայեն աղքատներուն, եւ ոչ թէ իրենք իրենց»… ըսաւ Սրբազան Պապը նկատել տալով` թէ ինչպէս «Յիսուսին գեղեցկութիւնը և Անոր ուսմունքները մերժուած են շատերու կողմէ» ու թէ նաեւ «ան` որ այսօր կը հաւատայ խաղաղութեան և ընտրեց Յիսուսի և նահատակներու անզէն ուղին, յաճախ ենթարկուած է ծաղրանքի եւ վտարուած է հանրային քննարկումներէն և յաճախ մեղադրուած է հակառակորդներուն և թշնամիներուն նախապատուութիւն տալու մեղադրանքով»։
Քրիստոնեաները թշնամիներ չունին
«Քրիստոնեաները սակայն թշնամիներ չունին, այլ եղբայրներ և քոյրեր, որոնք այդպիսին կը մնան նոյնիսկ այն ժամանակ, երբ իրար չեն հասկանար», ըսաւ ապա Լեւոն ԺԴ հաստատելով որ «Սուրբ Ծննդեան խորհուրդը մեզի կը բերէ այս ուրախութիւնը, որ պայմանաւորուած է յանդգնութեամբն անոնց` որոնք արդեն կ՜ապրին եղբայրութեան մէջ» եւ հրաւիրելով հաւատացեալները քալելու խաղաղութեան եւ արդարութեան ճանապարհին վրայ եւ իւրաքանչիւր անհատի մէջ ճանչնալու Աստուծոյ զաւկի արժանապատւութիւնը։
Ներել նման Յիսուսին
«Ասոր համար է որ Ստեփանոսը մեռաւ ներելով նման Յիսուսին», յարեց ապա Քահանայապետը այս մէկը նկատելով «ուժ մը` որ աւելի իրական է քան զէնքերը»։
«Անիկա ազատ ուժ է, որ արդեն իսկ առկայ է բոլորի սրտին մէջ, որ կը վերագործարկուի երբ մէկը կը սկսի տարբեր ձեւով նայելու մերձաւորին, անոր ուշադրութիւն և ճանաչում ցուցաբերելու համար։ Այո՛, ասիկա վերածնունդ է, վերադարձ է լոյսին, ասիկա մեր Սուրբ Ծնունդն է» ըսաւ հուսկ Նորին Սրբութիւնը եւ հայցեց Սուրբ Կոյս Մարիամի հովանին։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
