Паралін: пачаць дыялог для ўсталявання справядлівага міру ва Украіне
Марыя Валодзіна - Vatican News
У кулуарах мерапрыемства, арганізаванага 17 сакавіка 2025 года пасольствам Марока пры Апостальскай Сталіцы з нагоды свята Рамадан, кардынал Паралін адказаў на шэраг пытанняў, якія тычыліся такіх тэм, як раззбраенне, вайна ва Украіне, стан Папы Францішка.
Кантраляванае раззбраенне
Па словах Дзяржсакратара, Святы Пасад ужо з часоў Першай сусветнай вайны прытрымліваецца выразнай палітыкі ў дачыненні да пераўзбраення. "Мы павінны на міжнародным узроўні настойваць на ўсеагульным і кантраляваным раззбраенні. Нельга быць задаволенымі кірункам, у якім ідуць справы", - адзначыў ён.
Заклік да спынення вайны паміж Расіяй і Украінай
Разважаючы пра магчымасць перамір'я паміж Украінай і Расіяй, кардынал Паралін выказаў надзею на тое, каб не было "ніякіх папярэдніх умоў, якія б перашкаджалі пачатку дыялогу”. Ён згадаў аб тым, што Расія паставіла ўмовы наконт “праверкі выканання перамір'я", але важна распачаць працэс. "Паколькі з боку Украіны, нарэшце, ёсць гатоўнасць, пажадана, каб і з другога боку была гатоўнасць пачаць гэта спыненне агню, якое павінна доўжыцца 30 дзён", - заявіў ён. Наступным крокам, на думку дыпламата, павінны стаць перамовы, якія могуць прывесці да заканчэння вайны і ўсталявання “справядлівага і трывалага міру”.
Стан здароўя Папы Францішка
На пытанне пра здароўе Папы кардынал Паралін адзначыў, што медыцынскія бюлетэні "даюць дакладнае ўяўленне пра стан здароўя" Пантыфіка. "Я сустракаўся з ім тыдзень таму, потым больш не меў магчымасці яго бачыць. Я заўважыў паляпшэнне ў параўнанні з першай сустрэчай. Але гэта выключна вонкавае назіранне, дакладную інфармацыю трэба атрымліваць ад медыкаў", - дадаў бліжэйшы супрацоўнік Святога Айца. Падчас сустрэч Францішку “прадстаўляюць пытанні і праблемы, якія неабходна вырашыць”, і ён “дае свае ўказанні", - патлумачыў Дзяржсакратар. На пытанне пра магчымасць адрачэння Папы, кардынал Паралін адказаў: "Абсалютна не".
