Раззбраенне і новы імпульс для дыпламатыі
Тэкст: Андрэа Тарніелі / Пераклад і адаптацыя: Марыя Валодзіна - Vatican News
Яго словы лаканічныя, але асабліва значныя ў час, калі на Блізкім Усходзе зноў разгараюцца баявыя дзеянні: Ізраіль наносіць удары па Газе. З шпіталя Папа яшчэ ясней бачыць абсурднасць вайны.
У лісце да галоўнага рэдактара “Corriere della Sera” Пантыфік зноў уздымае свой голас, падобна Яну Хрысціцелю, які кліча ў пустыні. Ён падкрэслівае абсурднасць вайны, якая знішчае людзей і навакольнае асяроддзе.
Пакуль свет, уключаючы Еўропу, спяшаецца пераўзброіцца і гатовы ўкласці велізарныя сродкі ў новыя арсеналы, якія ўжо і так перапоўненыя боепрыпасамі, здольнымі дзесяць разоў знішчыць усё чалавецтва, пераемнік Пятра, нягледзячы на хваробу, указваць нам шлях да спынення гонкі насустрач Трэцяй сусветнай вайне. Ён заклікае нас спачатку раззброіць нашу мову і розумы. Ён просіць нас раззброіць Зямлю.
У сучасным свеце, дзе нават падчас перамоў і сустрэч на вышэйшым узроўні, пераважаюць скажэнні, дэманізацыя суперніка, палярызацыя і падробленыя навіны, Францішак заклікае да разважання, ураўнаважанасці, разумення складанай рэчаіснасці. Ён нагадвае пра важнасць дыпламатыі і неабходнасць умацаваць міжнародныя арганізацыі, вярнуць ім сапраўдную моц і аўтарытэт.
Кардынал-Дзяржсакратар П'етра Паралін таксама прытрымліваецца думкі, што пераўзбраенне не дае гарантыі міру, а толькі набліжае магчымасць выкарыстання зброі. "Той, хто вырашае пераўзброіцца, рана ці позна павінен сутыкнуцца з рэальнасцю, што зброя, якім бы стрымліваючым фактарам яна не здавалася, прызначана для выкарыстання. Мы павінны на міжнародным узроўні настойваць на ўсеагульным і кантраляваным раззбраенні. Гэтая ідэя была ў цэнтры палітыкі Святога Пасада з часоў Першай сусветнай вайны”, - сказаў кардынал Паралін у кулуарах мерапрыемства, арганізаванага пасольствам Марока з нагоды Рамадана. “Нельга быць задаволеным кірункам, у якім мы ідзем, дзе, наадварот, назіраецца гонка ўзбраенняў", - дадаў Дзяржсакратар.
