Дзяржсакратар: здароўе Папы, канфлікты і спадчына Яна Паўла ІІ

Аляксандр Амяльчэня - Vatican News

27 сакавіка 2025 года вечарам у размове з журналістамі Дзяржаўны сакратар Яго Святасці паведаміў пра стан здароўя Францішка, які знаходзіцца ў Доме Святой Марты і адпачывае пасля нядаўніх праблем са здароўем.

Папа мае патрэбу ў адпачынку

"Папа не праводзіць аўдыенцый і не прымае наведвальнікаў. Зараз важна, каб ён знайшоў час на поўнае аднаўленне", - падкрэсліў кардынал падчас свайго выступу на мерапрыемстве "Кафедра гасціннасці" ў Сакрафана каля Рыма.

"Папа захоўвае цесную сувязь з усім Касцёлам і вернікамі", - заўважыў Паралін, адзначаючы падтрымку, якую Святы Айцец атрымлівае з усяго свету. "Малітвы за яго здароўе працягваюцца, людзі спадзяюцца на яго поўнае выздараўленне і вяртанне да служэння", - дадаў ён.

Вялікі тыдзень: чакаем рашэння Папы

Што тычыцца набажэнстваў Вялікага тыдня, уключаючы Імшу Вячэры Пана, кардынал адзначыў, што звычайна Францішак яе праводзіў у бальніцах ці турмах, але ў сёлета гэта малаверагодна. "Мы ўбачым, ці здолее Папа ўзначаліць урачыстасці або даручыць гэта іншаму кардыналу," - адзначыў ён.

Кардынал Паралін закрануў пытанні сусветных канфліктаў, спасылаючыся на словы Францішка, напісаныя падчас яго знаходжання ў бальніцы "Джэмэлі": "Мы павінны пачаць раззбройваць словы, каб яны не ператвараліся ў канфлікты і войны". Ён выказаў надзею на пазітыўныя вынікі перамоў па Украіне і заклікаў да стрыманасці ў канфлікце ў Газе.

Перамовы без умоў дзеля міру

"Перамовы павінны быць без умоў, - падкрэсліў ён, - каб дасягнуць справядлівага і трывалага міру". У справе Газы іерарх выказаў расчараванне тым, што часовы перамір'е не стала пастаянным: "Абодва бакі павінны праяўляць стрыманасць".

"Адчыніце дзверы Хрысту!"

Напярэдадні 20-й гадавіны адыходу ў вечнасць святога Яна Паўла II Дзяржсакратар прыгадаў галоўны заклік Папы: "Адчыніце дзверы Хрысту!" Ён падкрэсліў, што менавіта ў Хрысце можна знайсці адказы на найважнейшыя выклікі чалавецтва – як мінулыя, так і сучасныя.