Анёл Панскі: мы ўсе браты ў збаўленні, падораным Хрыстом
Аляксандр Амяльчэня - Vatican News
30 сакавіка 2025 года Францішак не змог асабіста прамовіць сваё разважанне з прычыны праблем са здароўем. Тэкст разважання быў распаўсюджаны Залай Друку Апостальскай Сталіцы, каб вернікі маглі азнаёміцца з думкамі Святога Айца.
У падрыхтаваным разважанні Пантыфік засяродзіўся на тэме міласэрнасці і аздараўлення, спасылаючыся на Евангелле дня (Лк 15,1-3.11-32). "Езус аздараўляе нашы раны, каб мы маглі любіць адзін аднаго як браты", - гаворыцца ў тэксце, дзе Папа заклікае вернікаў перажываць Вялікі пост, асабліва ў кантэксце Юбілейнага года, як час аздараўлення.
Сімвалічна, што ў сваім разважанні Францішак падзяліўся, што сам перажывае гэты час як перыяд аздараўлення душы і цела. Ён выказаў удзячнасць усім, хто з'яўляецца інструментам аздараўлення для бліжніх праз сваё слова, веды, любоў і малітву.
Святы Айцец заклікаў працягваць малітвы за мір у розных кутках свету, у прыватнасці ва Украіне, Палесціне, Ізраілі, Ліване, Дэмакратычнай Рэспубліцы Конга і М'янме, якая таксама пакутуе ад землятрусу.
Асаблівую ўвагу ў разважанні Папа звярнуў на сітуацыю ў Паўднёвым Судане. "Аднаўляю мой шчыры заклік да ўсіх лідараў, каб яны прыклалі максімальныя намаганні для зніжэння напружанасці ў краіне", - гаворыцца ў тэксце. Францішак падкрэсліў неабходнасць адкласці рознагалоссі і з мужнасцю і адказнасцю сесці за стол перамоў, каб пачаць канструктыўны дыялог.
Пантыфік таксама выказаў занепакоенасць сітуацыяй у Судане, дзе працягваецца вайна, і заклікаў бакі канфлікту паставіць на першае месца абарону жыцця мірных грамадзян.
Нягледзячы на шматлікія праблемы ў свеце, Францішак адзначыў і пазітыўныя падзеі, сярод якіх ратыфікацыя пагаднення аб дэмаркацыі дзяржаўнай мяжы паміж Таджыкістанам і Кыргызстанам, што, па словах Папы, з'яўляецца выбітным дыпламатычным дасягненнем.
На заканчэнне падрыхтаванага разважання Папа звярнуўся да Марыі, Маці міласэрнасці, з просьбай дапамагчы чалавечай сям'і дасягнуць прымірэння і спакою.
