Papa: Allahın lütfü təmənnasız verilir və başqaları ilə bölüşülməlidir

“RƏBBİN MƏLƏYİ”

Müqəddəs Peter Meydanı
Rəbb günü, 14 iyun 2026-cı il

Əziz bacılar və qardaşlar, Rəbb gününüz mübarək olsun!

Bugünkü İncil (Matta 9:36–10:8) bizə böyük bir hədiyyə bəxş edir. Çünki o, onu eşidən hər kəsi İsanın baxışlarına cəlb edir. Bu hekayə həm həmin baxışın diqqətini nümayiş etdirir, həm də Rəbbin nə gördüyünü bizə göstərir. Əslində biz oxuyuruq ki, Məsih “İzdihamı gördükdə onlara rəhmi gəldi, çünki onlar əldən düşmüş və kimsəsiz idilər” (ayə 36). Qardaşımız olan Allahın Oğlu insanlara, bəşəriyyətə baxır: O, insanları əzən zülmü və gücdən salan zorakılığı görür. O, müharibələrin yaralarını və istehlakçılığın yaratdığı boşluğu görür. O, maskalara çevrilmiş üzləri, şər tərəfindən parçalanmış ailələri və yalançı ideallarla yoldan çıxarılmış gəncləri görür. İsa görür və sevir. O, bizi sevir, bizim üçün və bizimlə birlikdə əzab çəkir. Onun mərhəməti təkcə qardaşlıq yaxınlığını deyil, həm də xilas etmək arzusunu ifadə edir.

Çünki O, qəlblərimizi tanıyır və bizim qayğımıza qalır. «Çobansız qoyunlar kimi» olan bu qədər insana baxaraq (ayə 36), Məsih Özünü Hamıya Yaxşı Çoban kimi həsr edir və məhsulun Sahibi olaraq dünyanın tarlasına işçilər göndərir (ayə 38). Onların vəzifəsi nədir? Onlar əzab çəkənlərə Allahın təsəllisini çatdırmalı, səfalətin olduğu yerə məhəbbət, kədərin olduğu yerə ümid, etimadsızlığın olduğu yerə isə iman aparmalıdırlar.

İncil ilk on iki «işçinin» adlarını sadalayır. Onlar şagirdlərdən həvarilərə, yəni missionerlərə və vaizlərə çevrilmiş insanlardır. Onların arasında ilk olaraq Şimonu – Peter adlanan həvarini görürük. Lakin sonuncu olaraq adı çəkilən Yəhuda İskaryotu da görürük ki, bu da bizə xatırladır: insan İsanın ardınca gedə və eyni zamanda Ona xəyanət edə bilər. Buna baxmayaraq, İncil hər zaman canlı və həqiqi sözdür. Əsrləri aşaraq bizə çatan İncil həmişə eyni, həmişə gənc, təravətini daim qoruyan və azadedicidir: «Səmavi Padşahlıq yaxınlaşıb!» (Matta 10:7). Bəli, o yaxındır, çünki İsa Məsihdə Allah hər bir kişiyə və qadına, hər bir xalqa və millətə yaxınlaşır. Bu Müjdə elan edilib yaşandıqda, şər keçib gedən bir xəstəlik kimi (ayə 8), sübhə boyun əyən gecə kimi, Dirilmiş Olanın qalib gəldiyi ölüm kimi darmadağın olur.

İsanın baxışı reallığı məhz belə dəyişdirir. Sevgi ilə dolu olan Onun bu təşəbbüsü, həvarilərin missiyasını davam etdirməyə çağırılan yeni bir xalqı – Kilsəni doğurur: «Müftə almısınız, müftə də verin» (ayə 8). Bəli, İsanın hədiyyəsi tamamilə təmənnasızdır, çünki onun dəyəri hər cür ölçünü aşır: ona layiq olmaq və ya onu "satın almaq" qeyri-mümkündür. Bu lütf Allahın mərhəmətinin gözəl adıdır. O mərhəmət ki, harada olmağımızdan asılı olmayaraq bizi axtarıb tapır və Özünə yaxınlaşdırır. «Buna görə də məhsulun Sahibinə yalvarın ki, məhsuluna işçilər göndərsin» (Matta 9:38)!

Əziz dostlar, müjdələmə vəzifəsi Allahın hədiyyəsindən qaynaqlanır ki, bu da Məsih vasitəsilə dünya üçün bağışlanmaya, ən kiçiklərə və yoxsullara xidmətə, ədalətə bağlılığa çevrilir. İsanın bizi çağırdığı bu missiyaya sevinc və cəsarətlə cavab verə bilməyimiz üçün gəlin, lütflə dolu olan Bakirə Məryəmin köməyinə sığınaq.