Ukraine,Zelensky awasili Washington kwa mkutano na Trump
Na Guglielmo Gallone - Vatican
Rais wa Ukraine Volodymyr Zelensky amewasili Marekani, ambapo atakutana na Rais wa Marekani Donald Trump katika Ikulu ya (White House) katika saa zijazo. Majadiliano hayo yatalenga ushirikiano wa kimkakati kati ya Washington na Kyiv, kuimarisha ulinzi wa anga na wa balestiki wa Ukraine, na matarajio ya njia inayowezekana ya amani. "Lazima tusonge mbele zaidi na amani," Zelensky aliandika, pia akitangaza ushiriki wake katika sherehe ya mazishi ya Seneta wa Republican Lindsey Graham, mmoja wa wafuasi wakuu wa Ukraine katika Bunge.
Msaada wa Magharibi kwa Ukraine
Katika ziara yake mjini Washington, Zelensky pia anatarajiwa kukutana na wajumbe wa Seneti ya Marekani. Maseneta wote mia moja wamealikwa kuhudhuria mkutano na rais wa Ukraine, wakati ambapo Bunge linajadili mpango mpya wa vikwazo dhidi ya Urusi na nchi zinazoendelea kufanya biashara na Moscow. Hatua hiyo, iliyoungwa mkono na wawakilishi wa pande zote mbili na pia kuungwa mkono na Trump, ilikuzwa na Graham mwenyewe.
Hatua ya Marekani inafuatia mkutano wa Zelensky Ulai 27 na Waziri Mkuu mpya wa Uingereza, Andy Burnham, ambaye alisisitiza mwendelezo wa London wa kuunga mkono Kyiv. Wakati wa mkutano huo - wa kwanza kati ya waziri mkuu anayekuja na mkuu wa nchi ya kigeni, ishara zaidi ya ukaribu kati ya London na Kyiv - Uingereza pia iliamua kuhamisha kwa Ukraine mali ya kiakili ya mfumo wa vita vya elektroniki wa Stone Cloak, uliotengenezwa kulinda ndege zisizo na rubani na kukabiliana na ulinzi wa anga wa Urusi.
Mashambulizi Mapya ya Ukraine dhidi ya Moscow
Mikutano ya kidiplomasia inakuja huku Ukraine ikionesha tena uwezo wake wa kushambulia ndani kabisa ya eneo la Urusi. Usiku mmoja, eneo la Moscow lilikumbwa na shambulio kubwa la ndege zisizo na rubani. Kulingana na meya wa mji mkuu wa Urusi, Sergei Sobyanin, zaidi ya magari 390 ya angani yasiyo na rubani yalielekea eneo hilo, huku 81 yakipigwa risasi yalipokaribia jiji. Mamlaka mahalia ziliripoti uharibifu wa jengo la ghorofa na nyumba kadhaa, lakini hakuna majeruhi walioripotiwa. Katika eneo la Belgorod nchini Urusi, ndege isiyo na rubani ya Ukraine iligonga basi huko Shebekino, na kuwajeruhi watu 19, sita kati yao wakiwa wamejeruhiwa vibaya.
Mnamo alfajiri Julai 24, ghala la kampuni kubwa ya biashara ya mtandaoni wa Urusi, karibu na Mtakatifu Petersburg,lilipigwa na ndege zisizo na rubani za Ukraine.(AFP or licensors)
Jibu la Urusi
Jibu la Urusi limejikita tena katika eneo la Ukraine na miundombinu inayotumiwa na vikosi vya jeshi la Kyiv. Moscow ilidai kugonga meli ya usaidizi katika bandari ya Mykolaiv na meli ya kubeba mizigo kaskazini-magharibi mwa Bahari Nyeusi, ambayo, kulingana na Wizara ya Ulinzi ya Urusi, ilikuwa imebeba vifaa vya kijeshi. Zaidi ya hayo, usiku kucha, Urusi ilizindua wimbi jipya la ndege zisizo na rubani dhidi ya Ukraine: Jeshi la Anga la Kyiv lilidai kuangusha 107 kati yao, likiripoti uharibifu wa vifaa uliosababishwa na vifusi vinavyoanguka. Katika eneo la Donetsk, mashambulizi ya jana ya Urusi yalisababisha vifo vya angalau wanne na majeruhi 18, akiwemo mtoto wa miezi kumi na moja.
Mvutano wa ndani unaendelea nchini Ukraine
Shinikizo la kijeshi na kidiplomasia linazidishwa na mvutano ndani ya serikali ya Ukraine. Kuondolewa madarakani hivi karibuni kwa Waziri wa zamani wa Ulinzi Mykhailo Fedorov kunachochea maandamano na ongezeko kubwa la uungwaji mkono wake. Kura ya maoni inamweka katika asilimia 13.4 katika uchaguzi wa urais wa kinadharia, akiwa nyuma ya Zelensky na kamanda wa zamani Valery Zaluzhny. Hata hivyo, utawala wa rais unazingatia uwezekano wa kurudi kwake serikalini kufungwa na unaamini maandamano hayo yanalenga kupungua. Mgogoro huo pia umeathiri uongozi wa kijeshi, pamoja na kufukuzwa kazi kwa Kamanda Mkuu Oleksandr Syrsky na kuteuliwa kwa Mykhailo Drapaty.
Omesasishwa tarehe 28 Julai saa 9.11 alasiri na Angella Rwezaula.
Asante kwa kusoma makala yetu. Unaweza kuendelea kupata habari mpya kwa kujisajili kwa jarida letu la kila siku: Just click here.
