Hafla ya Kusaini“Board for Peace”huko Davos
Roberto Paglialonga na Angella Rwezaula – Vatican.
“Board for Peace”(BoP) yaani "Bodi ya Amani" ni Mpango wa Kimataifa ulioanzishwa na Rais Donald Trump ambao kwa jina lake unalenga kukuza amani kwa kutaka kusimamia mgogoro katika Ukanda wa Gaza na ujenzi wake. Ni chombo ambacho kilianzishwa rasmi huko Davos, nchini Uswiss, Alhamisi asubuhi tarehe 22 Januari 2026. Hafla ya utiaji saini, iliyofunguliwa na Rais wa Marekani, Bwana Donald Trump mwenyewe na kuhudhuriwa na viongozi wapatao ishirini na wawakilishi wa nchi kadhaa walioalikwa, iambayo lifanyika kando ya Jukwaa la Uchumi Duniani muda mfupi baada ya saa 5:00 asubuhi.
Ingawa baadhi ya nchi zimekubali kujiunga (kama vile Israeli, Urusi, Belarusi, Argentina, Azabajani, na Armenia), kumekuwa na mgawanyiko ndani ya Ulaya, kati ya wale ambao wamependelea kukaa nje, kama vile Uingereza, Ujerumani, Ufaransa, na kwa sasa, Italia, hiyo ya mwisho kutokana na kutolingana kati ya sheria ya Baraza na Mkataba wa Katiba (Kifungu cha 11 kuhusu ukomo wa uhuru wa kitaifa kwa ajili ya uanachama sawa na nchi nyingine ), na wale ambao wamejiunga, kama vile Hungaria. Nchi zingine kadhaa zimejiunga tangu wakati huo, ikiwa ni pamoja na Saudi Arabia, Uturuki, Misri, Morocco, Yordani, Indonesia, Pakistani, Qatar, na Falme za Kiarabu.
Uvamizi mwingine wa IDF huko Gaza:watoto wawili na waandishi wa habari watatu wauawa
Wakati huo huo, licha ya majaribio ya kuendeleza makubaliano kwa kutekeleza "Awamu ya 2" ya mpango wa amani na Marekani, vita vya ardhini vinaendelea na mkondo wake wa umwagaji damu na vurugu. Tarehe 22 Januari 2026, IDF pia iliwaua Wapalestina wasiopungua 11 katika Ukanda huo, wakiwemo wavulana wawili wa miaka 13, mwanamke mmoja, na waandishi wengine watatu. Hawa wa mwisho walipigwa risasi walipokuwa wakipiga picha karibu na kambi ya wakimbizi katikati mwa Gaza (kulingana na Kamati ya Kuwalinda Waandishi wa Habari, zaidi ya wafanyakazi 200 wa vyombo vya habari vya Wapalestina wameuawa tangu Oktoba 7, 2023). Kwa upande wake, jeshi la Israeli lilidai kuwa uvamizi huo uliwalenga washukiwa waliokuwa wakiandaa shambulio la ndege isiyo na rubani.
Idadi ya vifo tangu kuanza kwa makubaliano ya kusitisha mapigano
Idadi ya vifo kwa ujumla inaongezeka kwa bahati mbaya, na 21 Januari ilikuwa moja ya siku zenye umwagaji damu zaidi tangu kusitisha mapigano kuanza kutumika katikati ya Oktoba. Kulingana na vyanzo vya afya vinavyodhibitiwa na Hamas, zaidi ya watu 480 waliuawa na karibu 1,300 walijeruhiwa tangu wakati huo. Zaidi ya hayo ni ubomoaji wa majengo na nyumba 200, zaidi ya uvamizi wa kijeshi 60 katika maeneo ya makazi ya Ukanda, na ufyatuaji risasi 430 wa raia.
Chanzo cha kuunda "Bodi ya Amani"
“Bodi ya Amani imeundwa kwa mujibu wa mpango uliowasilishwa kwa Baraza la Usalama, kupigiwa kura na kukubaliwa,” alisema Srinivasan Muralidhar, Mwenyekiti wa Tume ya Uchunguzi kuhusu Ardhi ya Palestina Inayokaliwa na Israel, ikiwemo Yerusalemu Mashariki. “Kwa upande wetu kama Tume ya Uchunguzi, tunaona jukumu letu ni kuchunguza ukiukaji wa haki za binadamu. Na hilo ndilo jukumu tulilopewa na Umoja wa Mataifa” aliongeza kusema. Tume ya Uchunguzi moja ya mifumo ya juu ya uchunguzi ya Baraza la Haki za Binadamu iliundwa na Nchi Wanachama 47 wa Baraza hilo Mei 2021. Mwezi Novemba mwaka 2025, Baraza la Usalama la Umoja wa Mataifa lilipitisha Azimio namba 2803, likikaribisha kuanzishwa kwa Bodi ya Amani kama “utawala wa mpito wa kusimamia ujenzi mpya wa Gaza.”
Padre Romanelli: Kila kitu kinakosekana, hakuna anayeona mwisho
Wakati huo huo, hali ya kibinadamu inabaki kuwa mbaya. "Kila kitu kinakosekana," na "licha ya ukweli kwamba hakuna mabomu makubwa zaidi, hakuna anayeona mwisho."
Maneno ya Maaskofu wa Uratibu wa Hija wa Nchi Takatifu
Maneno yake yalirudiwa na yale ya Maaskofu wa Ulaya na Marekani ambao ni wajumbe wa Tume ya Uratibu wa Hija ya Nchi Takatifu, ambao hivi karibuni walishiriki katika hija ya mshikamano katika Nchi Takatifu."Nchi ya Ahadi imepungua zaidi na inazidi kupingwa. Gaza inasalia kuwa janga la kibinadamu," waliandika katika taarifa yao. Wakati huo huo, "watu tuliokutana nao katika Ukingo wa Magharibi wamevunjika moyo na wanaogopa."
Mvutano katika Ukingo wa Magharibi na Yerusalemu Mashariki
Huko Palestina, na katika Yerusalemu Mashariki, mvutano unabaki kuwa mkubwa kufuatia kubomolewa kwa makao makuu ya UNRWA na matingatinga ya Israeli siku mbili zilizopita. Majibu yamekuwa makali katika ngazi za kimataifa na Ulaya. Uamuzi wa mamlaka ya Israeli kuendelea na operesheni hii "unawakilisha shambulio kubwa" dhidi ya Umoja wa Mataifa na "unaunda ukiukaji wa majukumu ya Israeli chini ya Mkataba wa Haki na Kinga," kulingana na ambayo nchi wanachama wa Umoja wa Mataifa lazima zilinde na kuheshimu kutovunjwa kwa majengo ya Umoja wa Mataifa, EU ilisema katika taarifa, kupitia Anouar En Anouni, msemaji wa Huduma ya Hatua za Nje ya Ulaya.
Asante kwa kusoma makala yetu. Unaweza kuendelea kupata habari mpya kwa kujisajili kwa jarida letu la kila siku: Just click here
