Sinodi ya Maaskofu: Malezi ya Kipadre & Utume Katika Ulimwengu wa Kidijitali
Na Padre Richard A. Mjigwa, C.PP.S. – Vatican.
Maadhimisho ya Sinodi ya XVI ya Maaskofu kuanzia Mwaka 2021-2024 yalinogeshwa na kauli mbiu “Kwa Ajili ya Kanisa la Kisinodi: Umoja, Ushiriki na Utume.” Maadhimisho haya, yalizinduliwa kwa mkesha wa toba, wongofu wa ndani na upatanisho mambo msingi katika ujenzi wa Kanisa la Kisinodi linalosimikwa katika utamaduni wa kujadiliana, kusikilizana na kutenda kwa pamoja! Hakuna ujenzi wa Kanisa la Kisinodi pasi na toba, wongofu wa ndani na upatanisho. Mtakatifu Paulo VI, Muasisi wa maadhimisho ya Sinodi mara baada ya Mtaguso Mkuu wa Pili wa Vatican anasema, Sinodi ni chombo cha kimisionari na uinjilishaji mpya unaolisaidia Kanisa baada ya kutembea pamoja katika sala, tafakari, mang’amuzi na hatimaye, utekelezaji wake unaofanywa na watu wote wa Mungu kadiri ya wito na nafasi zao katika maisha na utume wa Kanisa.
Sinodi ni sehemu ya vinasaba vya maisha na utume wa Kanisa. Juhudi za kichungaji na kitaalimungu zisaidie kuimarisha dhana ya Sinodi katika maisha na utume wa Kanisa mintarafu majadiliano ya kiekumene, kwa kumpokea Roho Mtakatifu ili kuweza kujifunza mengi kutoka kwa wengine na kuvuna kile ambacho Roho Mtakatifu amepanda ndani yao, ambacho kimekusudiwa kuwa ni zawadi kwa wengine. Ni katika muktadha wa Maadhimisho ya Sinodi ya Maaskofu, Kikundi cha Tatu, kimechapisha taarifa yake kuhusu: Malezi ya Mapadre na Utume Katika Ulimwengu wa Kidijitali. Mwongozo wa Malezi ya Kipadre: “Ratio Fundamentalis Institutionis Sacerdotalis” unabainisha changamoto iliyotolewa na Baba Mtakatifu Francisko kama sehemu ya mchakato wa kulinda, kukuza na kudumisha wito na maisha ya Daraja Takatifu ya Upadre.
Huu ni wito wenye thamani kubwa katika maisha na utume wa Kanisa unaopaswa kuhudumiwa kwa umakini mkubwa kwa kuheshimu dhamiri nyofu, wajibu unaotekelezwa kwa unyenyekevu na uvumilivu mkubwa, ili kweli Wakleri waweze kung’ara kati ya watu wa Mungu wanaowahudumia! Mwongozo huu ni matunda ya ushirikiano mkubwa kutoka katika Sekretarieti kuu ya Vatican, kazi iliyoanza kutimua vumbi kunako mwaka 2014. Mwongozo unatoa kwa muhtasari wa sheria, kanuni na mambo msingi ambayo yanapaswa kuzingatiwa kwa ajili ya malezi na makuzi ya wito wa Daraja Takatifu ya Upadre. Unabainisha wajibu wa Mabaraza ya Maaskofu Katoliki; Waratibu wa Seminari kitaifa na Kimataifa pamoja na mwongozo wa malezi ya Seminari moja moja.
Baba Mtakatifu Leo XIV anasema, taarifa za Vikundi lazima zichapishwe kama sehemu ya utekelezaji wa dhana ya ukweli na uwazi na kwamba, watu wa Mungu wanapaswa kushirikishwa, kwani haya ni matunda ya tafakari na mang’amuzi ya watu wa Mungu, sehemu muhimu sana ya mchakato wa ujenzi wa Kanisa la Kimisionari na Kisinodi, anasema Kardinali Mario Grech, Katibu mkuu wa Sinodi za Maaskofu. Malezi ya Mapadre na Utume Katika Ulimwengu wa Kidijitali ni kati ya mambo yaliyopewa kipaumbele katika maadhimisho ya Sinodi za Maakofu. Mada kuu ni pamoja na: hitaji la kuunganisha utume wa kidijitali katika miundo ya kawaida ya Kanisa; uelewa wa kina wa dhana ya mamlaka ya eneo kwa kuzingatia jumuiya za mtandaoni; na mafunzo ya wachungaji na wahudumu wa shughuli za kichungaji na wachungaji katika utamaduni wa kidijitali. Taarifa inahitimishwa kwa kutoa mapandezo yanayosimikwa katika nguzo kuu tatu: Vatican, Mabaraza ya Maaskofu, Majimbo na inajumuisha sehemu pana kuhusu mbinu iliyopitishwa na vyombo vilivyo kubalika.
Kikundi cha Nne katika malezi ya Mapadre kimepitia Mwongozo wa Malezi ya Kipadre: “Ratio Fundamentalis Institutionis Sacerdotalis” na kwamba, bado unafaa kutumika kwa kuzingatia kanuni zake na kwamba, wameamua kutoa “Pendekezo la Hati Elekezi” kama sehemu ya utekelezaji wake kwa kujikita katika malezi ya ujenzi wa Kanisa la Kisinodi na Kimisionari mintarafu mwanga wa mapendekezo yaliyotoewa na Hati ya Mababa wa Sinodi. Hati hii imegawanyika katika sehemu kuu mbili: Utangulizi: Mwelekeo wa Kikanisa na Kichungaji: Wongofu wa ndani unaohitajika katika malezi ya Kipadre: Mahusiano, Umisionari; Ushirika, Huduma na Mtindo wa maisha ya Kisinodi. Utambulisho wa Padre anayewafunda watu wa Mungu ni chanda na pete. Sehemu ya Pili ni utekelezaji wa Hati hii: Maisha Seminarini na kwenye Jumuiya ya Kiparokia au maeneo mengine ya Kanisa. Katika moyo wa ujenzi wa Kanisa la Kisinodi maisha yanaendelea na kwamba, sasa ni kazi na dhamana ya Mabaraza ya Kipapa yenye dhamana na wajibu wa malezi ya Mapadre wanamwilisha hati hii kwa ajili ya utekelezaji. Sekretarieti kuu ya Sinodi za Maaskofu inabanisha kwamba, Hati hizi ni Nyaraka za Kutendea Kazi na kwamba, Mabaraza ya Kipapa yatatoa mwelekeo wa mambo yaliyokubalika na yale ambayo hayakukubalika na hatimaye, yatawasilishwa kwa Baba Mtakatifu kwa upembuzi na hatimaye, utekelezaji. Na kwa kuchapisha Hati ya Mwisho, Vikundi hivi vilivyoundwa kwa utashi wa Baba Francisko vinafikia pia ukomo wake.
