Papa Leo XI:Kanisa linatoa mchango katika kupambana na ukosefu wa usawa wa huduma ya afya
Na Angella Rwezaula – Vatican.
Amani imejengwa juu ya kupambana na ukosefu wa usawa; inategemea kulinda heshima ya walio hatarini zaidi, ambao mara nyingi huchukuliwa kuwa wametupwa ambapo Wakristo, hasa, wanaitwa kuwalinda ili kujenga jamii ya haki na kuunda jumuiya za mshikamano zinazojulikana kwa ustawi wa wote. Ni mawazo ya Baba Mtakatifu Leo XIV katika hotuba yake, Jumatano tarehe 18 Machi 2026 katika Ukumbi Mdogo wa Paulo VI kabla ya Katekesi yake.
Papa Leo XIV aliwaeleza kwamba wamefika jijini Roma kutoka nchi mbalimbali za Ulaya kushiriki katika wakati huu wa tafakari yao yenye kuongozwa na mada “Leo Jirani Yangu Ni Nani?”, ulioandaliwa na Shirikisho la Mabaraza ya Maaskofu wa Ulaya, Shirika la Afya Duniani (Eneo la Ulaya), na Baraza la Maaskofu wa Italia. "Ripoti ya pili ya Hali ya Usawa wa Afya Ulaya ya Shirika la Afya Duniani(WHO") kuwasilishwa Machi 18. Hati hii inaakisi hali zinazowakabili watu wengi barani Ulaya, hawa wanaume na wanawake wengi wanaopitia umaskini, upweke na kutengwa katika maisha yao ya kila siku. Katika nchi nyingi, ukosefu wa usawa katika uwanja wa huduma ya afya unaongezeka, kwa kuwa watu wachache wanaweza kupata huduma zinazopatikana. Uangalifu wa haraka lazima pia upewe afya ya akili ya watu, haswa ile ya vijana, kwa sababu majeraha ya kisaikolojia yasiyoonekana si makubwa sana kuliko yale yanayoonekana.
Bima ya afya kwa wote si lengo la kiufundi lazima kufikiwa
Afya haiwezi kuwa anasa kwa walio wachache. Kinyume chake, ni sharti muhimu kwa amani ya kijamii. Bima ya afya kwa wote si lengo la kiufundi tu linalopaswa kufikiwa; kimsingi ni sharti la kimaadili kwa jamii zinazotaka kujiita zenyewe kuwa za haki. Huduma ya afya lazima ipatikane kwa walio katika mazingira magumu zaidi, si tu kwa sababu utu wao unahitaji hivyo bali pia ili kuzuia dhuluma isisababishe migogoro. Changamoto iliyo moyoni mwa mada wanayo tafakari, ambayo imechukuliwa kutoka Injili ya Luka 10:29, inatukabili sote.
Hatupaswi kujihesabia haki, kama wakili anavyofanya, bali tujiruhusu kuchunguzwa kikamilifu. Hakika, swali hili linabaki kuwa muhimu kila wakati, na halina jibu moja, lisilo na utata. Badala yake, linatuomba kila mmoja wetu kujibu kwa njia thabiti na kwa wakati unaofaa. Kwa hivyo, tunaweza kujiuliza: kwangu mimi, wakati huu wa maisha yangu, jirani yangu ni nani? Katika hali mbalimbali tunazoishi, majibu yatatofautiana. Hata hivyo, kisichobadilika ni wito wa kuwafikia wengine, hasa wale wanaoteseka.
Katika Kitabu cha Mwanzo tunapata swali kama hilo: “Bwana akamwambia Kaini, ‘Yuko wapi Abeli ndugu yako?’ Akajibu, ‘Sijui; mimi ni mlinzi wa ndugu yangu?’” (4:9). Katika mfano wa Msamaria Mwema, tunapata jibu: ndiyo, wewe ni mlinzi wa ndugu yako, kwa sababu umeitwa kulinda ubinadamu wake. Mtakatifu Agostino anatuambia kwamba: “Mungu mwenyewe, Bwana wetu, alitaka kuitwa jirani yetu. Kwa maana Bwana wetu Yesu Kristo anajielekeza chini ya mfano wa mtu aliyemsaidia yule aliyekuwa amelala nusu mfu barabarani, amejeruhiwa na kuachwa na majambazi.”
Katika Waraka wake wa Fratelli Tutti, yaani Wote ni Ndugu, Papa Francisko alitafakari kuhusu jukumu la majambazi waliomjeruhi msafiri. Alitukumbusha kwamba “‘Majambazi’ kwa kawaida hupata washirika wa siri katika wale ‘wanaopita na kutazama upande mwingine’” (n. 75). Umbali, usumbufu na kukata tamaa kwa kuona vurugu na mateso ya wengine hutuongoza kwenye kutojali. Hata hivyo wanaume na wanawake wote, hasa Wakristo, wanaitwa kuwakazia macho wale wanaoteseka: kuhusu maumivu ya upweke, wale ambao kwa sababu mbalimbali wametengwa na kuchukuliwa kuwa "watu waliotengwa."
Kwani bila wao, hatuwezi kujenga jamii zenye msingi wa mwanadamu. Ni udanganyifu kufikiri kwamba ingekuwa rahisi kupata hali ya furaha kwa kuwapuuza kaka na dada zao. Ni kwa pamoja tu tunaweza kujenga jumuiya za mshikamano zenye uwezo wa kuwajali kila mtu, ambapo ustawi na amani vinaweza kustawi kwa manufaa ya wote. Kujali ubinadamu wa wengine hutusaidia kuishi maisha yetu wenyewe kikamilifu.
Papa Leo XIV alikazia kusema kuwa “, Kanisa "lina jukumu la umma zaidi ya shughuli zake za upendo na kielimu," lakini daima liko katika huduma ya "maendeleo ya ubinadamu na udugu wa ulimwengu wote." Makanisa barani Ulaya na ulimwenguni kote kwa ushirikiano na mashirika ya kimataifa, bado yanaweza kuchukua jukumu muhimu leo katika kupambana na ukosefu wa usawa katika huduma ya afya, hasa katika kuunga mkono watu walio katika mazingira magumu zaidi. Kwa hivyo, ninafufua matumaini yangu - kwa kweli ninaomba haraka - kwamba "mtindo wetu wa maisha wa Kikristo utaakisi daima roho hii ya udugu, 'usamaria' - ambayo ni ya kukaribisha, ya ujasiri, ya kujitolea na ya kuunga mkono, yenye mizizi katika muungano wetu na Mungu na imani yetu katika Yesu Kristo." Kwa kuhitimisha aliwashukuru kwa yote wanayofanya! Aliwakabidhi kwa maombezi ya mama ya Bikira Maria Mwenyeheri na kuwaombea baraka za Mungu kwao, familia zao na huduma zao zote.
Asante kwa kusoma makala yetu. Unaweza kuendelea kupata habari mpya kwa kujisajili kwa jarida letu la kila siku bonyeza hapa: Just click here.
