Imani ya dhati nchini China yakuza miito mipya kwa Kanisa

Na Sr. Christine Masivo, CPS – Vatican.

Katika Dominika ya Mchungaji Mwema, iliyoadhimishwa Ulimwenguni kote sanjari na  Siku ya Kuombea Miito Duniani, jumuiya za Wakatoliki kote China ziliungana kwa ari na umoja wa ajabu. Wakiongozwa na mwaliko wa Kristo"Njoo unifuate"waamini walikubali jukumu lao la pamoja la kukuza miito ya upadre na ya kitawa.

Wito wa umoja wa kumfuata Kristo

Seminari ya Jimbo la Beijing ilijikita na kuelezea kwa undani ujumbe kuhusu miito, na kuwakumbusha waamini wote kwamba "tunaweza kuwa walinzi na wahamasishaji wa miito." Wito huu unaonesha ufahamu unaoongezeka kwamba miito haijitokezi peke yake, bali ndani ya jamii zinazosali, kusindikiza, na kutia moyo.

Mipango ya ubunifu kuhamasisha miito

Kote nchini China, Majimbo na Maparokia yaliandaa hafla nyingi za kuhamasisha miito na kujaribu  kuelewa umuhimu wake. Huko Beijing, Parokia nyingi  zilisambaza vipeperushi kuhusu malezi, ikiwa ni pamoja na vijitabu vilivyozingatia maandiko matakatifu, vilivyoandaliwa kwa ajili ya “Mwaka wa Neno la Mungu,” huku vikiwaalika waamini kuimarisha uelewa wao wa wito wa Mungu kupitia tafakari na kujifunza. Ishara rahisi lakini zenye maana, kama vile kusambaza mifuko ya nguo yenye taswira ya Kanisa kuu, zilisaidia kuunda utambulisho unaoonekana na wa pamoja miongoni mwa waamini. Jitihada hizi zinaonyesha mbinu ya kichungaji ambayo inapatikana na ya kuvutia, hasa kwa vijana wanaotafuta mwelekeo katika maisha yao.

Shuhuda kupitia daraja la upadre na kujitolea

Katika Jimbo la Ningbo kulikuwa na upadrisho wa mashemasi wanne waliowekwa wakfu kuwa mapadre katika Kanisa Kuu la Kupalizwa kwa Maria iliyoadhimishwa na Askofu Francis Xavier Jin Yangke, hii ilikuwa ishara yenye nguvu ya matumaini kwa Kanisa mahalia. Katika mahubiri yake, Askofu alitambua changamoto zinazotokana na uhaba wa miito lakini pia aliwataka waamini kuitikia kwa ukarimu na uaminifu. "Hatupaswi tu kuombea miito," alihimiza, "bali pia kuwa tayari kutoa maisha yetu na kuwakabidhi hata watoto wetu kwa Bwana." Maneno yake yaligusa sana familia zilizokuwepo, ambazo nyingi zilishuhudia moja kwa moja furaha ya wito wa wale waliojitolea kutumikia Kanisa.

Malezi ya dhati

Seminari ya Falsafa na Taalimungu ya Mkoa wa Shaanxi walifanya mipango na kujitolea kuhimiza miito kwa kuandaa mikusanyiko ya malezi ikilenga utambuzi na ufahamu bora wa wito na umuhimu wake. Vikundi vya waseminari, mapadre, walimu, watawa walitembelea parokia, wakishiriki safari zao za kibinafsi na uzoefu wa kila siku wa malezi. Ushuhuda wao ulikuwa wa hai na wa uzuri wakielezaea pia changamoto za kuitikia wito wa Mungu. Kupitia mikutano hii, familia zilihimizwa kukuza imani nyumbani na kuunga mkono miito kikamilifu. Msisitizo huu wa kutembea na vijana wakitafakari na kutambua njia yao, unaonyesha mbinu ya kichungaji yenye mizizi katika ukaribu na uhalisi. Ni ndani ya mahusiano haya ambapo mbegu za wito mara nyingi hupandwa na kulelewa.

Kanisa lililo hai linalotia moyo

Maadhimisho ya Siku ya Kuombea Miito Duniani nchini China ilitoa ushuhuda wa kuvutia ambapo imani inafanywa uzoefu wa kuishi kwa uaminifu, na miito inaendelea kuongezeka. Licha ya changamoto, Kanisa linabaki kuwa hai, likiungwa mkono na jumuiya zinazosali, kushuhudia, na matumaini. Katika mipango hii ya ndani, mtu anaweza kuona Kanisa la Ulimwengu wote likifanya kazi, watu walioungana katika utume, wakiamini kwamba Mungu bado anaendelea kuwaita vijana katika utume wa Kanisa. Na katika majibu ya ukimya, lakini kwa ujasiri wa wale wanaoitika wito wa Mungu na kusema ‘Ndiyo,tazama mimi hapa’ na mustakabali wa Kanisa tayari unaanza kujitokeza!

Asante kwa kusoma makala yetu. Unaweza kuendelea kupata habari mpya kwa kujisajili kwenye jarida letu la kila siku. Just click here.