Makusanyo ya sadaka kwa ajili ya Makanisa ya Afrika nchini Ufaransa

Na Giovanni Zavatta – Vatican.

Huko Bangassou, Jamhuri ya Afrika ya Kati, mustakabali wa watoto thelathini na watano waliohifadhiwa katika kituo cha watoto yatima cha "Mama Tongolo", kinachoendeshwa na Sista Yolanda Yassingbou, upo salama, kama ilivyo kwa watoto wengine mia tatu wasio na wazazi ambao wamepata upendo katika familia nyingi za malezi. Huu ni mmoja tu wa mipango iliyo mingi iliyotekelezwa kutokana na fedha zilizokusanywa kupitia Mkusanyiko wa sadaka za Makanisa kwa ajili ya Afrika, ulioandaliwa nchini Ufaransa katika Dominika ya pili baada ya Noeli na chama cha Aide aux Églises d'Afrique, yaani Msaada kwa Makanisa ya Afrika.

Mkutano na Mazungumzo

Mada ya toleo la tarehe 4 Januari 2025 ni "Kukuza Mkutano na Mazungumzo." Maneno haya mawili, alisema Annie Josse, Mkurugenzi, "yako katikati ya kujitolea kwa Aea na wanachama wake. Mazungumzo ambayo yanakuwa mazungumzo, mabadilishano ambapo kila mmoja hujiruhusu kuguswa na kubadilishwa na mwingine, ambapo tunakua pamoja kwa ajili ya kuzaa matunda zaidi katika misheni yetu."

Mipango inayoungwa mkono na Msaada kwa Makanisa ya Afrika ni ushuhuda wa hili: si tu mchango wa kifedha kwa ajili ya vifaa au mafunzo, bali "daraja kati ya Jumuiya za Kikristo, ubadilishanaji wa kibinafsi ambapo kila mtu hutoa na kupokea." Mkusanyiko huo wa fedha utafanyika tarehe 4 Januari 2025 katika Parokia zote za Ufaransa na utaunga mkono mipango ya kichungaji ya Majimbo  230 katika mataifa ishirini na nane ya Afrika na huduma za kimisionari nchini Ufaransa. Mpango huo huko chini ya jukumu la Baraza la Kipapa la Uinjilishaji, ambalo limekabidhi utunzaji wake kwa Maaskofu, waweka hazina wa majimbo, parokia, wajumbe kwa ajili ya utume wa ulimwengu wote na utunzaji wa kichungaji wa wahamiaji, na jumuiya za kitawa.

Utofauti ni utajiri.

Lengo, kama ilivyoelezwa kwenye tovuti ya Aide aux Églises d'Afrique, yaani Msaada kwa Makanisa ya Afrika, ni kuonyesha mshikamano na kuomba "kwa ajili ya Kanisa changa na lenye nguvu linalohitaji msaada wetu halisi na thabiti ili kuendelea kukua na kusonga mbele kuelekea uhuru mkubwa kwa wanachama wake na wafanyakazi wa kichungaji." Katika nyenzo zilizoandaliwa kwa ajili ya liturujia ya Epifania ya Bwana, Padre Denis Rabier, akizungumzia mada ya mwaka huu, alisisitiza kwamba kukutana na mazungumzo hujifunza tangu umri mdogo: "Tunaingiliana na watu ambao hawashiriki mtindo wetu wa maisha na kiwango cha maisha, watu wa rangi tofauti ya ngozi, ambao hawana elimu yetu na ambao hawazungumzi lugha moja. Kwa hivyo, tangu utotoni, watoto lazima wafundishwe kuheshimu tofauti hizi na kwamba utofauti si kikwazo bali ni utajiri."

Historia iliyounganishwa

Chama kilichoanzishwa huko Paris mnamo 1888, chini ya jina "Société anti-esclavagiste de France"  yaani “Chama cha Kupinga Utumwa cha Ufaransa” na Kardinali Charles Lavigerie, baadaye Shirika hilo lilichukua jukumu la msingi katika kuharakisha kukomeshwa kwa biashara ya watumwa barani Afrika na kuchukua shauku kubwa iwezekanavyo katika hatima ya watumwa walioachiliwa huru. Mwaka huo huo uliona kuchapishwa kwa waraka wa In plurimis ambapo, katika mazungumzo na Maaskofu wa Brazil, ambapo Papa Leo XIII alilaani vikali utumwa.

Miaka miwili baadaye, Papa huyo aliandika barua kwa Kanisa Katoliki, akiwahutubia Maaskofu wa dunia. Aliwatia moyo kila mwaka, "siku na wakati mafumbo ya Epifania yanapoadhimishwa," kukusanya michango itakayotumwa kwa Shirika la Kipapa  kwa ajili ya Uenezaji wa Imani  mjini Roma. "  Papa Leo XIII alitangaza kuwa “kisha itakuwa kazi ya Shirika hilo, kusambaza pesa hizi miongoni mwa misheni zilizopo au zitakazoanzishwa katika maeneo ya Afrika, hasa kutokomeza utumwa." Barua hiyo, miongoni mwa mambo mengine, ilikumbusha kwamba Kardinali Lavigerie alikuwa amepewa jukumu la "kwenda katika miji mikuu ya Ulaya ili kutangaza aibu ya biashara hii ya aibu zaidi na kuwashawishi wakuu na raia kupeleka msaada kwa watu hao wasio na bahati."

Tangu mwaka 1992, chama hicho kimechukua jina lake la sasa, kikiunga mkono mipango midogo inayowasilishwa na Jumuiya za Kikristo barani Afrika, kuanzia kozi za katekisimu hadi mafunzo ya wasaidizi wa wachungaji wa Parokia, kuanzia msaada hadi wanawake na watoto wanaohitaji hadi maendeleo ya mbinu za kilimo, kwa lengo la kusaidia makanisa na wakazi wa eneo hilo kuendelea kuelekea kujitegemea zaidi.

Asante kwa kusoma makala yetu. Unaweza kuendelea kupata habari mpya kwa kujisajili kwenye jarida letu la kila siku. Just click here.