2025.12.20 Patriaki Pizzaballa alitembelea Parokia ya Gaza.

Kanisa

Gaza.Kard.Pizzaballa:Tutajenga yote kwa upya!

Katika fursa ya kuekelea siku kuu ya Kuzaliwa kwa Bwana,Patriaki wa Yerusalemu,Kardinali Pizzaballa alitembelea Parokia ya Gaza iliyojaribiwa sana na kipindi hiki cha vita."Maisha yetu yako hapa,tumejikita hapa na tutabaki." Patriaki aliwatia moyo waamini wa parokia ya Familia Takatifu ambapo amekuwa katika ziara ya kichungaji tangu Desemba 19.

Na Beatrice Guarrera - Vatican.

Kama ilivyo desturi katika siku zinazoelekea Noeli, mwaka huu pia, Kardinali Pierbattista Pizzaballa, Patriaki wa Kilatini wa Yerusalemu, alitembelea jumuiya ndogo ya Parokia ya Familia Takatifu huko Gaza. Hata hivyo, tamaduni hii inachukua hisia kali ya ukaribu na usaidizi kwa Wakristo wa Ukanda huo, ambao wamebanwa na kujaribiwa kwa miaka miwili ya vita.

Mashahidi wa imani na matumaini huko Gaza

Licha ya makubaliano yanayoendelea, hali ya maisha inabaki kuwa ngumu na matarajio ya siku zijazo bado hayajajulikana. "Zaidi ya yote, lazima tujenge upya mioyo yetu. Msiogope; lazima tuwe na umoja na nguvu," alisema Kardinali Pizzaballa, akikutana na waamini wa parokia na wale waliokusanyika kumkaribisha. Wanaume, wanawake, na watoto ambao, licha ya magumu, waliandaa haraka sherehe ya kumkaribisha Patriaki, wakifuatana na ujumbe wa watawa kutoka Yerusalemu.

"Umeonesha, hasa wakati wa vita lakini pia sasa," kardinali alisema, "maana ya kubaki imara. Wewe ni ushuhuda hai si tu wa ustahimilivu, bali pia wa imani na matumaini kwa ulimwengu mzima." "Huwezi kufikiria ni makanisa, vikundi, vyama, na watu wangapi kutoka ulimwenguni kote wamekusanyika pamoja kuniruhusu niwe hapa," Pizzaballa alifichua kwa hisia. Bila shaka, alisisitiza kwa nguvu, "hatuwezi kusahau yaliyotokea na hatutasahau kamwe, lakini sasa lazima tusonge mbele."

Kardinali Pizzaballa ikutembelea Gaza

Matatizo ya umaskini ulioenea

Aliyesikia maneno na kutiwa moyo kwake alikuwa Padre Gabriel Romanelli, Padre wa parokia ya Kanisa la Kilatini la Familia Takatifu katika Jiji la Gaza. Aliyempokea Patriaki, Padre wa parokia alielezea katika video iliyochapishwa kwenye mitandao ya kijamii kuwa ni "furaha kubwa," "hata katikati ya mateso mengi." Ziara yake ni "ziara iliyosubiriwa kwa muda mrefu na inayothaminiwa sana," iliyoandaliwa licha ya matatizo yote ya kiufundi, si tu yanayohusiana na taratibu za vibali bali pia na miundombinu. "Barabara zimeharibiwa," na kulikuwa na malori mengi yakisubiri kupeleka bidhaa kwa biashara. "Bei zimeshuka," Romanelli alielezea, "lakini watu wengi hawawezi kumudu mahitaji ya msingi. Kwa hivyo, misaada ya kibinadamu ni muhimu kwa watu wengi kati ya milioni 2.3" katika Ukanda huo, Paroko wa Parokia alibainisha.

Kardinali Pizzaballa akiwa na watoto wa Gaza

Sherehe ya amani kwa Wakristo na Waislamu

Alipofika mji wa Gaza, Patriaki Pizzaballa alitembelea vitongoji mbalimbali vya jiji, akifika Zaytoun, ambapo—Padre Romanelli anaripoti—"alikaribishwa vizuri kutoka kwa makundi yote ya parokia, Mapadre, watawa, watoto, wagonjwa, wazee, wanachama wa Tume ya Dharura, wakimbizi," na wafanyakazi wa shule, pamoja na "wanafunzi Wakristo na Waislamu." "Ilikuwa sherehe ya kwanza ambayo ingeweza kufanyika kama shule baada ya zaidi ya miaka miwili ya vita," kuhani wa parokia alielezea. Sherehe iliyoandaliwa na walimu na wanafunzi, ikijumuisha kuimba, kucheza, hotuba rasmi kwa Kiarabu na Kiingereza, na shukrani nyingi kwa msaada uliopatikana kutoka kwa Patriaki.

Wakati wa kugusa sana ulikuwa ishara iliyotokea mara baada ya hapo. Padre, akifuatana na wanafunzi Waislamu na Wakristo wa shule hiyo, walikwenda kwenye mlango wa parokia ya Familia Takatifu na kuwaachilia njiwa wawili kama ishara ya amani. "Kila mtu alikuwa na furaha," Padre Romanelli alisimulia. Njiwa waliruka angani juu yetu, juu ya kanisa, kisha wakaruka. Ilikuwa wakati uliohisiwa sana," "ishara ya amani ambayo Kristo alikuja kuleta, na ambayo tunataka kuendelea kuieneza kwa msaada wake na Mama yake."

Kardinali Pizzaballa alitembelea jumuiya Katoliki ya Gaza

Mikutano mingi ya kidugu katika Ukanda wa Yerusalemu

Baadaye, Patriaki wa Kilatini wa Yerusalemu alitembelea Kanisa la Kiorthodox la Kigiriki la Mtakatifu Porphyrios, ambapo alifanya mkutano wa kidugu na ujumbe wa watawa na Askofu Mkuu Alexios. Hakukuwa na uhaba wa usaidizi kwa wagonjwa, ambao Kardinali Pizzaballa alikutana nao kibinafsi na ambao aliwapatia mpago wa Wagonjwa. Aliporudi Parokiani, ilikuwa tayari wakati wa kusali rozari ya kila siku, na kwa hivyo Patriaki alijiunga na waamini, akiwa ameketi miongoni mwao kwenye viti na kusali sala. Wazo maalum lilitolewa kwa waamini wawili kutoka Gaza kuhusu waliouawa na moto wa Israeli siku zile zile mnamo Desemba miaka miwili iliyopita. "Tunamshukuru Mungu kwa kuweza kusherehekea Noeli hii ya mapema na Patriaki Pierbattista Pizzaballa na baba zetu waliotutembelea," Padre Romanelli alihitimisha.

Kwa upande wa Kardinali Pizzaballa alisema: "Msiache kuomba na kumwomba Mungu amani, amani, na amani." Aidha Patriaki alitembelea makao makuu ya Caritas katika kitongoji cha Al-Nasr (kaskazini mwa Gaza), ambapo alikutana na wafanyakazi na wagonjwa. Kisha akahamia kliniki ya matibabu ya Umoja wa Makanisa katika kitongoji cha Al-Rimal (magharibi mwa Gaza). Vituo vingine vilijumuisha kituo cha misaada ya kibinadamu kinachoendeshwa na Huduma za Usaidizi wa Kikatoliki; Hospitali ya Kiarabu ya Al-Ahli katika Jiji la Kale la Gaza; na Hospitali ya Jordan, Tal al-Hawa. Hatimaye, alitembelea Chuo Kikuu cha Al-Azhar, Tal al-Hawa, na kambi za watu waliohamishwa kando ya ufukwe wa Jiji la Gaza.