ഇറ്റലിയുടെ സെനറ്റ് ലൈബ്രറിയും ഇറ്റലിയിലേക്കുള്ള വത്തിക്കാൻ എംബസിയും സന്ദർശിച്ച് പാപ്പാ

മോൺസിഞ്ഞോർ ജോജി വടകര, വത്തിക്കാന്‍ ന്യൂസ്

ഇറ്റലിയിലെ സെനറ്റിന്റെ ലൈബ്രറിയും, ഇറ്റലിയിലെ അപ്പസ്തോലിക നൂൺഷിയേച്ചറും സന്ദർശിച്ച് ലിയോ പതിനാലാമൻ പാപ്പാ. അഗതമാകുന്ന ക്രിസ്തുമസിന്റെ കൂടി പശ്ചാത്തലത്തിലാണ് പരിശുദ്ധ പിതാവ് ഡിസംബർ 18 വ്യാഴാഴ്ച ഉച്ചയോടെ ഈ രണ്ട് സന്ദർശനങ്ങളും നടത്തിയതെന്ന് പരിശുദ്ധ സിംഹാസനത്തിന്റെ പ്രെസ് ഓഫീസ് ടെലെഗ്രാമിലൂടെ അറിയിച്ചു.

1455-നും 1461-നും ഇടയിൽ തയ്യാറാക്കപ്പെട്ട വിശുദ്ധ ഗ്രന്ഥത്തിന്റെ രണ്ട് കയ്യെഴുത്ത് പ്രതികളുടെ പകർപ്പുകൾ, ജൂബിലി വർഷത്തിന്റെ കൂടി പശ്ചാത്തലത്തിൽ, ഇറ്റലിയിലെ സെനറ്റിന്റെ ലൈബ്രറിയിൽ പ്രദർശനത്തിന് വച്ചിരിക്കുന്നത് കാണാൻ വേണ്ടിക്കൂടിയാണ് പരിശുദ്ധ പിതാവ് അവിടെയെത്തിയത്. നൂറോളം വർഷങ്ങൾക്ക് ശേഷമാണ് ഈ പകർപ്പുകൾ പ്രദർശനത്തിന് വച്ചത്.

സെനറ്റിലെത്തിയ പാപ്പായെ സെനറ്റ് പ്രസിഡന്റ് ല റൂസയും, ഉപാദ്ധ്യക്ഷന്മാരും ചേർന്ന് സ്വീകരിച്ചു. സെനറ്റ് ലൈബ്രറിയുടെ ഒരു ശാലയിൽ തയ്യാറാക്കിയിരുന്ന പുൽക്കൂട്ടിലെ ഉണ്ണിയേശുവിന്റെ രൂപം പരിശുദ്ധ പിതാവ് അനാവരണം ചെയ്തു.

സെനറ്റ് ലൈബ്രറിയിലേക്കുള്ള യാത്രയ്ക്ക് മുൻപായി ഇറ്റലിയിലെ വത്തിക്കാൻ എംബസിയായ അപ്പസ്തോലിക നൂൺഷിയേച്ചറിലെത്തിയ പാപ്പാ അവിടെനിന്ന് ഉച്ചഭക്ഷണം കഴിച്ചിരുന്നു. പുരാതന റോം നഗരത്തിന്റെ ഭാഗമായ പാന്തെയോൺ ദേവാലയത്തിന് അടുത്തുള്ള മിനെർവ ചത്വരത്തിനടുത്താണ് ഇറ്റലിയുടെ സെനറ്റിന്റെ ലൈബ്രറി.

സെനറ്റ് പ്രസിഡന്റ് ല റുസ്സ പരിശുദ്ധ പിതാവിന് "മർത്തിനെല്ല" എന്ന പേരിൽ അറിയപ്പെടുന്നതും, സെനറ്റ് ഹാളിൽ ഉപയോഗിക്കപ്പെടുന്നതുമായ ഒരു മണി സമ്മാനമായി നൽകി. പ്രധാന അതിഥികൾ ഒപ്പുവയ്ക്കുന്ന ഡയറിയിൽ പരിശുദ്ധ പിതാവ് ഒപ്പു വച്ചു.

സ്നേഹത്തിന്റെയും സമാധാനത്തിന്റെയും ചിന്തകൾ ഉണർത്തുന്ന പരിശുദ്ധ പിതാവിന്റെ സെനറ്റ് സന്ദർശനം, ക്രിസ്തുമസിന്റെ പശ്ചാത്തലത്തിൽ, വിശ്വാസികളെ സംബന്ധിച്ച് മാത്രമല്ല, അവിശ്വാസികൾക്ക് പോലും ഏറെ പ്രധാനപ്പെട്ടതായിരുന്നുവെന്ന് ല റൂസ പ്രസ്താവിച്ചു. ഉച്ചകഴിഞ്ഞ് രണ്ടേമുക്കാലോടെ സെനറ്റ് ലൈബ്രറിയിലെത്തിയ പാപ്പാ ഏകദേശം ഇരുപത് മിനിറ്റുകൾ അവിടെ ചിലവഴിച്ചു.