Ռուբէն Վարդանեանի գործով գանգատ ներկայացուած է Մարդու Իրաւունքներու Եւրոպական դատարան

Իրաւապաշտպան Սիրանուշ Սահակեան յայտարարած է, որ Ռուբէն Վարդանեանի գործով 19 յուլիսին պաշտօնական գանգատ ներկայացուցած է Մարդու իրաւունքներու եւրոպական դատարան (ՄԻԵԴ) եւ այնտեղ պիտի ներկայացնէ անոր շահերը:

Սահակեանի համաձայն, գանգատին մէջ ներկայացուած են Մարդու իրաւունքներու եւրոպական հռչակագիրի ութ յօդուածներու խախտումներ` համապատասխան իրաւական եւ փաստական հիմնաւորումներով:

Սահակեանը տակաւին օրեր առաջ յայտնած էր, որ պաշտպանական կողմը վերջապէս յաջողած է ստանալ Վարդանեանի դատավճիռը, որ անհրաժեշտ էր ՄԻԵԴ դիմելու համար: Անոր համաձայն, մինչ այդ ազրպէյճանական կողմը չէր տրամադրեր դատավճիռը, այդ պատճառով ալ կարելի չէր սկսիլ Եւրոպական դատարանին մէջ վարոյթը:

Պաքուի զինուորական դատարանը 17 փետրուար 2026-ին Վարդանեանը դատապարտած էր 20 տարուան բանտարկութեան: Ըստ Սահակեանի, դատավճիռով ան մեղաւոր ճանչցուած է 41 դրուագով` Ազրպէյճանի քրէական օրէնսգիրքի 21 յօդուածներու հիման վրայ, սակայն մեղաւորութիւնը չէ հիմնաւորուած փաստերով կամ ապացոյցներով:

Իրաւապաշտպանը նաեւ նշած է, որ Վարդանեան չէ բողոքարկած դատավճիռը` զայն նկատելով կանխորոշուած, իսկ Ազրպէյճանի ներպետական իրաւական պաշտպանութեան միջոցները` անարդիւնաւէտ, ուստի որոշած է իր իրաւունքներու պաշտպանութիւնը շարունակել միջազգային իրաւական մեքանիզմներու միջոցով:

Աղբիւրը` Ազդակ