Кардынал Паралін падтрымаў ініцыятывы на карысць міру ў Мексіцы
Аляксандр Амяльчэня - Vatican News
5 жніўня 2026 года ў Мексіцы кардынал П'етра Паралін сустрэўся з прадстаўнікамі Нацыянальнага дыялогу за мір, каб непасрэдна пачуць пра іх досвед умацавання міру ў розных рэгіёнах краіны. У сустрэчы ўдзельнічалі навукоўцы, дзяржаўныя службоўцы, рэлігійныя лідары, маці, якія шукаюць зніклых дзяцей, паліцэйскія, прадпрымальнікі, а таксама прадстаўнікі некалькіх мексіканскіх штатаў.
Падчас размовы кардынал адзначыў, што мір пачынаецца са спачування болю іншага чалавека. Гэтыя словы прагучалі пасля сведчання маці, якая распавяла пра знікненне свайго сына ў штаце Пуэбла. Ён таксама нагадаў, што мір ствараецца паступова, штодзённай працай, і заклікаў не губляць адвагі, бо такі досвед можа натхніць людзей у іншых кутках свету, якія таксама пакутуюць ад насілля.
Асобныя ўдзельнікі сустрэчы падзяліліся прыкладамі супрацоўніцтва на карысць міру. Прадстаўнікі Пуэблы распавялі пра супольную працу сем'яў, якія шукаюць зніклых блізкіх, і дзяржаўных устаноў. Паліцэйскі з Экатэпека паведаміў пра супрацоўніцтва розных Касцёлаў у развіцці мадэлі паліцыі, блізкай да мясцовай супольнасці. Прадстаўнікі Керэтара, Аахакі і Сан-Луіс-Патасі таксама распавялі пра вопыт, які аб'ядноўвае людзей, падтрымлівае святароў у небяспечных рэгіёнах і заахвочвае парафіі далучацца да справы будавання міру.
Напрыканцы сустрэчы кардынал Паралін уважліва выслухаў удзельнікаў і выказаў салідарнасць з іх штодзённымі намаганнямі. Ён адзначыў, што гэты рух нясе надзею многім рэгіёнам краіны, якія пакутуюць ад насілля, і падкрэсліў, што можа разлічваць на падтрымку Святога Пасада.
