SIGNIS: ватыканскі іерарх пра евангелізацыю ў лічбавым свеце
Аляксандр Амяльчэня - Vatican News
Сакратар Дыкастэрыі па евангелізацыі арцыбіскуп Фартунатус Нвачукву стаў адным з галоўных дакладчыкаў першай пленарнай сесіі Сусветнага кангрэса каталіцкіх медыя SIGNIS 2026, прысвечанай лічбавай камунікацыі на карысць культурнай згоды і клопату пра навакольнае асяроддзе. Ён праходзіў 3-8 жніўня 2026 года ў сталіцы Руанды, горадзе Кігалі.
"Найперш трэба быць вучнем, а ўжо потым думаць пра тое, каб быць навідавоку", - сказаў арцыбіскуп. Паводле яго, менавіта з такой пазіцыі журналісты, аўтары і стваральнікі лічбавага кантэнту могуць стаць сапраўднымі сведкамі Евангелля.
У размове з “Vatican News” іерарх развіў гэтую думку. Ён адзначыў, што сёння місійны наказ Хрыста ахоплівае не толькі геаграфічныя межы. Побач з фізічнай прасторай існуе і лічбавы свет, дзе людзі сустракаюцца, абмяркоўваюць важныя пытанні і ствараюць супольнасці. Таму, паводле яго слоў, Добрая Навіна павінна прысутнічаць і ў Instagram, TikTok, YouTube ды на іншых платформах, дзе праходзіць значная частка сучаснага жыцця.
Звяртаючыся да маладых журналістаў і ўсіх, хто ўдзельнічае ў евангелізацыі праз медыя, арцыбіскуп Нвачукву сказаў: "Найперш фарміруйце свой розум, а ўжо потым сваю платформу". Ён падкрэсліў, што перш чым імкнуцца да ўплыву ў лічбавай прасторы, неабходна самому ўзрастаць у веры, чалавечай сталасці і адказнасці.
Таксама ватыканскі іерарх заклікаў не забываць пра клопат пра планету, адзначыўшы, што гэтая тэма таксама павінна знаходзіць месца ў матэрыялах каталіцкіх медыя.
