Святы Пасад шукае шлях да згоды з Брацтвам святога Пія X
Аляксандр Амяльчэня - Vatican News
На наступным тыдні запланаваны важны крок у адносінах з Брацтвам святога Пія X: кардынал Віктар Мануэль Фернандэс сустрэнецца з генеральным настаяцелем гэтай супольнасці.
Як паведаміў 4 лютага 2026 года кіраўнік Залы Друку Святога Пасада Матэо Бруні, гэтая размова стане нагодай для асабістага і нефармальнага дыялогу. Гэтая ініцыятыва мае на мэце вызначэнне эфектыўных інструментаў для абмену меркаваннямі, здольных прывесці да пазітыўных рашэнняў у атмасферы ўзаемаразумення.
Апостальская Сталіца паслядоўна імкнецца пазбегнуць разлому ў камунікацыі з Брацтвам, што стала асабліва актуальным на фоне планаў супольнасці пасвяціць новых біскупаў. Матэо Бруні патлумачыў, што Святы Пасад бачыць у гэтай сустрэчы магчымасць для глыбокага аналізу сітуацыі. Праз прамы дыялог бакі спадзяюцца пазбегнуць аднабаковых крокаў, якія маглі б ускладніць і без таго няпросты вузел пытанняў.
"Кантакты паміж Брацтвам святога Пія X і Святым Пасадам працягваюцца", - падкрэсліў прадстаўнік Залы Друку, адзначаючы важнасць захавання жывой сувязі. Асноўным прыярытэтам застаецца пошук рашэнняў, якія дазволяць захаваць еднасць у Касцёле, не дапускаючы новых падзелаў.
