Кардынал Паралін – моладзі: вучыцца на памылках і змяняць свет
Аляксандр Панчанка - Vatican News
21 студзеня 2026 года Дзяржсакратар Яго Святасці Папы прыняў удзел у сустрэчы з моладдзю, якая прайшла ў Рыме з нагоды 25-годдзя “Osservatorio for independent thinking”. Гэта некамерцыйная арганізацыя з сядзібай у Фларэнцыі мае на мэце фармаванне грамадзянскай адказнасці ў маладога пакалення праз развіццё крытычнага мыслення, здольнасці аналізаваць інфармацыю і навіны, эканамічную, фінансавую і лічбавую пісьменнасць.
Штучны інтэлект на службе чалавеку
Дзяржсакратар адказаў на некалькі пытанняў, адно з якіх датычылася штучнага інтэлекту. Ён падкрэсліў, што гэта тэма мае вялікую актуальнасць і хвалюе Касцёл. Іерарх расказаў пра жаданне Святога Пасада стварыць аналітычны цэнтр, які б займаўся вывучэннем штучнага інтэлекту і прапаноўваў этычны падыход: “каб штучны інтэлект служыў чалавечай годнасці і не станавіўся небяспекай”.
СМІ пакліканы інфармаваць і фармаваць людзей
Іншае пытанне датычылася праблемы распаўсюджвання дэзынфармацыі і адказнасці СМІ. Па словах кардынала Параліна, медыя павінны не толькі інфармаваць, але і клапаціцца пра фармацыю людзей. “І потым трэба пазбягаць дэманізацыі іншых, а дапамагаць разумець іх мысленне”, - дадаў Дзяржсакратар.
Вучыцца на жыццёвых памылках
Моладзь цікавіла меркаванне кардынала Параліна адносна ўплыву жыццёвых няўдач на жыццё. “Падзенні з’яўляюцца часткай жыцця, – сказаў іерарх, – таму важна, каб моладзь улічвала, што жыццё складаецца таксама з гэтых балючых момантаў”. Ён заклікаў юнакоў і дзяўчат вучыцца на жыццёвых памылках, каб не паўтараць іх.
Удзел у палітыцы дае магчымасць змяніць свет
Чарговае пытанне было звязана з шматлікімі канфліктамі ў свеце. Адказваючы на яго, найбліжэйшы супрацоўнік Папы заклікаў моладзь уключацца ў палітычнае жыццё, не пазбягаць яго, а бачыць у гэтым магчымасць паслужыць міжнароднай супольнасці. “Вы павінны ўспрымаць палітыку як эфектыўную прыладу, патрэбную, каб змяніць свет, і як тое, чаму можна цалкам прысвяціць сябе”, - дадаў кардынал-дзяржсакратар.
Мірнае пасрэдніцтва Святога Пасада
Напрыканцы прагучала пытанне пра тое, ці існуюць гістарычныя прыклады, калі дыпламатыя па-сапраўднаму прывяла да міру. У адказ іерарх згадаў два прыклады паспяховага дыпламатычнага пасрэдніцтва Святога Пасада: вырашэнне спрэчкі адносна праліва Бігля, якая вялася паміж Аргенцінай і Чылі, а таксама памежнага канфлікту паміж Перу і Эквадорам.
