“Вертыкаль святасці”: кардынал Паралін пра спадчыну Фрасаці
Аляксандр Амяльчэня - Vatican News
У суботу ўвечары, 17 студзеня 2026 года, у рымскім касцёле “Domus Mariae” адбылася знакавая падзея – усталяванне рэліквій святога П’ера Джорджа Фрасаці.
Кардынал-дзяржсакратар П’етра Паралін, які ўзначаліў святую Імшу, у гаміліі адзначыў, што ў часы панавання “постпраўды”, віртуальных светаў і штучнага інтэлекту постаць гэтага маладога чалавека становіцца “святлом”, здольным надаць глыбіню чалавечаму шляху.
Ён падкрэсліў, што “канкрэтнасць праўды”, якую сведчыў Фрасаці, дапамагае не згубіць цвёрдыя арыенціры ў свеце, дзе межы рэчаіснасці становяцца ўсё больш і больш невыразнымі. Святы П’ер Джорджа застаецца спадарожнікам Касцёла, асабліва для моладзі, якая шукае аўтэнтычнасці ў сваёй веры.
Праграма жыцця: малітва, дзеянне і ахвяра
Кардынал нагадаў, што малады святы вызначаў сваё заангажаванне ў “Каталіцкую Акцыю” трыма простымі, але глыбокімі словамі: малітва, дзеянне і ахвяра. Гэтыя паняцці былі для яго не проста лозунгамі, а рэальнай праграмай жыцця, якую ён прапаноўваў сваім сябрам.
Па словах іерарха, Фрасаці не з’яўляецца недасягальным ідэалам, але канкрэтным сведкам, які сваім прыкладам падтрымлівае кожнага чалавека на яго духоўнай дарозе.
Логіка служэння супраць права моцнага
Падчас гаміліі кардынал Паралін звярнуў увагу на радыкальную навіну Хрыста, якую Фрасаці ўвасобіў у сваім служэнні. Гэта логіка, здольная аздараўляць чалавечыя адносіны і супрацьстаяць “панаванню права моцнага”, якое часта вызначае зямныя справы.
Сведчанне жыцця Святога было настолькі моцным, што выклікала пашану нават у тых, хто не падзяляў яго веры, як калісьці заўважыў сацыялістычны лідар Філіпа Тураці.
Рэліквіярый, усталяваны ў касцёле, выкананы ў стылі, які адлюстроўвае дэвіз святога: “Угору сэрцы!”. Гэты твор мастацтва, створаны сястрой Марыяй Агар Лошэ, быў падрыхтаваны да кананізацыі Фрасаці, якая адбылася ў верасні 2025 года.
