"L'Osservatore Romano" крытыкуе гонку ўзбраенняў у Еўропе

Аляксандр Амяльчэня - Vatican News

У той час як Папа Францішак па-ранейшаму мае цяжкасці з публічнымі выступамі з прычыны хваробы, ватыканскія СМІ актыўна выказваюць пазіцыю Святога Пасада адносна міжнародных падзей. Апошні артыкул у газеце "L'Osservatore Romano" і на партале Vatican News утрымлівае жорсткую крытыку планаў Еўрасаюза па нарошчванні ваеннай магутнасці.

Праграмны дырэктар медыя Святога Пасада ў сваім рэдакцыйным артыкуле выказаў глыбокую занепакоенасць курсам, які выбрала Еўропа. Па словах эксперта, за апошнія тры гады ЕС не змог праявіць ніякіх творчых дыпламатычных ініцыятыў для вырашэння канфліктаў.

"У цягу апошніх трох гадоў Еўропа паказала, што не здольная да крэатыўных дыпламатычных ініцыятыў. Як бачна, несправядліва атакаванай расійскімі войскамі Украіне Еўрасаюз мог толькі пастаўляць зброю. Адначасова не ўдалося прапанаваць і ўвасобіць канкрэтныя стратэгіі, накіраваныя на спыненне крывавай вайны. А цяпер Еўропа рыхтуецца пайсці па слядах іншых дзяржаў і інвеставаць неверагодную суму ў 800 мільярдаў еўра ў зброю", - падкрэсліў Андрэа Тарніелі.

Ватыканскі каментатар адзначае, што такія велізарныя сродкі будуць накіраваны на павелічэнне запасаў зброі, што адначасова напоўніць кішэні вытворцаў "прылад смерці". Пры гэтым ваенныя выдаткі Еўрасаюза ўжо перавышаюць адпаведныя расходы Расійскай Федэрацыі.

"Ці сапраўды гэта шлях да забеспячэння будучыні міру і дабрабыту для Старога Кантынента і ўсяго свету? Ці гонка ўзбраенняў сапраўды дае нам гарантыю бяспекі?" - задае рытарычныя пытанні Тарніелі.

Сапраўднай пагрозай для чалавецтва з'яўляецца "трэцяя фрагментарная сусветная вайна", пра якую прарочыў Папа Францішак яшчэ дзесяць гадоў таму. Замест таго, каб прымаць актыўную ролю ў міратворчых працэсах, прапаноўваючы шляхі мірнага ўрэгулявання і ведучы перамовы, Еўрасаюз рызыкуе апынуцца сярод тых, хто падштурхоўвае да эскалацыі гонкі ўзбраенняў.