Кардынал Олерыш: неабходна аднавіць маральны кампанент міру
Аляксандр Амяльчэня - Vatican News
Кардынал Жан-Клод Олерыш, які ўваходзіць склад Рады кардыналаў пры Пантыфіку, будучы глыбокім знаўцам еўрапейскай палітыкі, падзяліўся сваімі думкамі наконт нядаўна зацверджанай праграмы "rearm europe" (узбраенне Еўропы).
Гонка ўзбраенняў стала сапраўды жахлівай з'явай
"Хачу адзначыць, што вельмі насцярожвае, калі не сказаць жахае, гэтая гонка ўзбраенняў, якая разгарнулася па ўсім свеце, не толькі ў Еўропе. Перш за ўсё трэба задумацца пра знікненне маральнай адказнасці і чуйнасці, якое, здаецца, ахапіла кіраўнікоў большай часткі свету. Тое табу вайны, якое ўплывала на палітычную арыентацыю пасля трагедыі Другой сусветнай вайны, здаецца, вычарпала сябе. Без аднаўлення такой маральнай перасцярогі няма палітыкі, якая б вытрымала выпрабаванні, і свет рызыкуе скаціцца ў небяспечную прорву", - заявіў іерарх.
На пытанне пра фактары, якія паўплывалі на гэтую сітуацыю, кардынал Олерыш адзначыў: "Галоўнай зменай стала тэндэнцыя да адмаўлення ад шматбаковасці. Сёння відавочна пераўтварэнне старой канцэпцыі звышдзяржавы, якая імкнецца аддаваць перавагу выключна сваім эканамічным і геапалітычным інтарэсам. Аднак свет, я лічу, зможа вярнуцца да мірнага жыцця толькі ў рамках шматбаковасці. Папа Францішак справядліва настойвае на важнасці шматбаковасці; я нават асмелюся сказаць, што гэта той краевугольны камень, на якім Святы Пасад будуе сваю палітыка-дыпламатычную прысутнасць".
Еўропа нарадзілася з попелу Другой сусветнай вайны
Што датычыцца нядаўна прынятай у ЕС праграмы ўзбраення вартасцю 800 мільярдаў еўра, кардынал заўважыў, што ў некаторых краінах Еўрасаюза існуе рэальнае адчуванне пагрозы, асабліва ў балтыйскіх дзяржавах, якія мяжуюць з Расіяй, або ў Малдове з яе канфліктам у Прыднястроўі.
"Аб'яўленае паступовае скарачэнне амерыканскай ваеннай прысутнасці палохае гэтыя краіны. Лічу, што, прызнаючы неабходнасць ваеннага ўмацавання Еўрасаюза, яно павінна мець выключна абарончы характар. Гэта павінна выразна адлюстроўвацца і ў тым, якія віды ўзбраення будуць набывацца – перавага павінна аддавацца абарончым сістэмам, а не наступальным узбраенням. Напрыклад, асаблівую важнасць набывае кіберабарона і лічбавая бяспека", - падкрэсліў арцыбіскуп Люксембурга.
Ён таксама нагадаў пра фундаментальныя прынцыпы стварэння ЕС: "Еўропа як інстытут нарадзілася з попелу, які пакінула трагедыя Другой сусветнай вайны, таму імкненне да міру з'яўляецца яе асноватворнай рысай. Я б нават сказаў, што мір – гэта сацыяльная прычына быць разам, Саюз быў створаны, каб ніколі больш не было войнаў паміж еўрапейцамі і ў Еўропе".
Нельга багацець на зброі
Закранаючы пытанне балансу паміж ваеннымі выдаткамі і сацыяльнымі патрэбамі ў Еўропе, кардынал Олерыш падтрымаў прапанову Папы Францішка: "Усе прыбыткі ад унутрыеўрапейскай вытворчасці зброі павінны інвесціравацца – у абавязковай форме – у сацыяльную дзейнасць. Нельга багацець на зброі, з прыбыткаў трэба будаваць хутчэй бальніцы і школы".
Паводле слоў кардынала, гэта прапанова, якую можна неадкладна рэалізаваць, і ён мае намер перадаць яе паслу Еўрасаюза пры Святым Пасадзе, з якім запланавана сустрэча ў бліжэйшыя дні.
