У 2028 годзе ў Ватыкане пройдзе Касцельная асамблея

Аляксандр Панчанка - Vatican News

Шлях падрыхтоўкі да форума ўхваліў Папа. Кардынал Грэк падкрэсліў, што гаворка не ідзе пра новы Сінод. Мэта Асамблеі, якой будуць папярэднічаць тры гады рэфлексіі і кансультацый – дапамагчы Касцёлам крочыць у сінадальным стылі і належным чынам ацаніць рэалізацыю рашэнняў XVI Звычайнай Асамблеі Сінода Біскупаў, якая завяршылася ў Ватыкане ў 2024 годзе і была прысвечана тэме “На карысць сінадальнага Касцёла: камунія, удзел, місія”.

Іерарх нагадаў, што на завяршэнне мінулагодняга сінадальнага сходу Францішак падкрэсліваў: яго Выніковы дакумент “з’яўляецца часткай звычайнага вучэння Наступніка Пятра” і павінен успрымацца адпаведным чынам. Гэта значыць, што мясцовыя Касцёлы павінны рэалізоўваць яго пастановы шляхам “распазнавання і прыняцця рашэнняў”.

Аднак працэс рэалізацыі не павінен разумецца як “простае выкананне ўказанняў зверху”, а як “працэс прыняцця” Выніковага дакумента з улікам мясцовых культур і патрэб супольнасцей, з мэтай рэалізацыі дыялогу “паміж Касцёламі і ва ўсім Касцёле”, заўважыў кардынал Грэк. Генеральны сакратар адзначыў, што для працэсу рэалізацыі важна прыцягнуць усіх людзей, якія рабілі свой унёсак падчас Сінода.

Падрыхтоўка да Касцельнай асамблеі распачнецца ў бліжэйшы час. У маі 2025 года будзе апублікаваны дакумент з апісаннем канкрэтных крокаў. З 24 па 26 кастрычніка ў Рыме адбудзецца Юбілей сінадальных груп з мясцовых Касцёлаў. У першай палове 2027 года на ўзроўні дыяцэзій і епіскапатаў пройдуць мясцовыя асамблеі па ацэнцы выканання рашэнняў Сінода. У 2028 годзе аналагічныя сходы адбудуцца на кантынентальным узроўні з мэтай публікацыі Instrumentum laboris, і, нарэшце, у кастрычніку 2028 года ў Ватыкане адбудзецца вялікая Касцельная асамблея.