Арцыбіскуп Галахер: Папа працягвае служыць Касцёлу і чалавецтву
Марыя Валодзіна - Vatican News
Святая Імша праходзіла ў рымскім Касцёле Найсвяцейшага Імя Езуса (Іль-Джэзу) – духоўным цэнтры Таварыства Езуса, да якога належыць Пантыфік. У сваёй гаміліі арцыбіскуп Пол Рычард Галахер нагадаў паслам пра ўдзячнасць Папы “за блізкасць і шматлікія малітвы, якія ўзносяць за яго да нябёсаў”.
Божая любоў і міласэрнасць
Іерарх засяродзіў увагу на любові, якая “няспынна струменіць” ад Бога “праз параненае Сэрца Езуса” і чакае нашага водгуку. Ён адзначыў, што Божая любоў сустракае нас “у нашых пакутах і грахах, набываючы форму міласэрнасці”.
Вялікі пост – гэта спрыяльны час для паглыблення гэтага шляху, магчымасць дазволіць Богу любіць нас, адкрываючы новыя гарызонты надзеі, свабоды і міру, - падкрэсліў папскі дыпламат.
Небяспека засяроджвання на смерці
З іншага боку, мы сутыкаемся з небяспекай таго, што больш увагі ўдзяляем смерці, чым жыццю, - адзначыў арцыбіскуп Галахер.
“Сёння пагроза зла становіцца ўсё больш прыметнай, часам здаецца, што цемра пераважае над святлом”, - сказаў ён. “Мы з сумам назіраем гэта ў пакутніцкай Украіне, у Палесціне, Ізраілі, Ліване, М'янме, Судане, Дэмакратычнай Рэспубліцы Конга і ў іншых месцах канфліктаў”. І ўсё ж, нягледзячы на перашкоды, духоўнае адраджэнне можа вывесці чалавецтва на шлях сустрэчы, - дадаў іерарх.
“На жаль, ёсць тыя, хто няспынна падсілкоўвае культуру смерці, прытрымліваючыся скажонай логіцы нянавісці, дамінавання і вайны на ўсіх узроўнях. Свет ператвараецца ў арэну сутыкненняў паміж этнічнымі групамі і цывілізацыямі, культурамі і рэлігіямі”, - адзначыў Галахер.
Дыпламатыя на службе агульнага дабра
Хрысціяне пакліканы распаўсюджваць каштоўнасці любові, справядлівасці і міру. “Шчаслівыя тыя часы і месцы, дзе людзі сядзяць за адным сталом і давяраюць сіле розуму і сумлення, ставячы чалавечую годнасць вышэй за ўсё”, - адзначыў арцыбіскуп Галахер.
Ён заклікаў да дыпламатыі, якая была б вызваленая ад эгаістычных інтарэсаў і прысвечаная дасягненню агульнага дабра, гарантаванню справядлівасці і міру для ўсіх.
Голас сумлення і малітва
Арцыбіскуп Галахер нагадаў дыпламатам, што чалавецтву неабходнае “вышэйшае святло”, каб накіроўваць наш выбар і дапамагаць нам яго ажыццяўляць. "Менавіта ў малітве, якая таксама ўключае маўчанне, мы павінны вучыцца чуць голас сумлення, які з'яўляецца не адвольным меркаваннем, а голасам Пана, што гучыць у нашым унутраным санктуарыі розуму і сэрца”, - сказаў ён.
Арцыбіскуп завяршыў сваю гамілію заклікам да дыпламатаў пагрузіцца ў маўчанне і ўвайсці ў гэты ўнутраны санктуарый сумлення, асабліва ў Вялікі пост, давяраючы сябе, Папу і мір ва ўсім свеце Маці Божай Маўчання.
