Гуджэроці: служыць праўдзе і абараняць чалавечую годнасць

Марыя Валодзіна - Vatican News

Сакансэкратарамі былі арцыбіскуп Эдгар Пэнья Пара, субстытут Дзяржаўнага сакратара па агульных пытаннях, і біскуп Навары Франка Джулія Брамбіла. На цырымоніі прысутнічала каля шасцісот вернікаў з дыяцэзіі Навары, роднага горада новапасвечанага біскупа.

Кардынал Гуджэроці ўзгадаў сумесную працу з Чампанэлі ў дыпламатычных місіях у Грузіі, Арменіі, Азербайджане і Беларусі. Мансеньёр Чампанэлі быў сакратаром Апостальскай нунцыятуры ў Беларусі з 2011 па 2015 год.

У гаміліі іерарх паразважаў над малітвай Езуса напярэдадні Яго Мукі і смерці (Ян 17). Ён падкрэсліў, што гэты евангельскі тэкст паказвае не толькі ўзаемаадносіны паміж Айцом і Сынам, але і ўключае вучняў. Ён параўнаў гэты ўрывак з матрошкай, у якой меншыя постаці змяшчаюцца ў большай. На думку кардынала Гуджэроці, менавіта ў такой уключанасці выражаецца таямніца збаўлення. “Каб гэтая таямніца прыносіла плён, нам, браты і сёстры, трэба прызнаваць сябе вобразам і падабенствам таго Бога, які нас палюбіў і захоўвае нават у моманты пакут”, - дадаў ён.

Праўду трэба абараняць як апостал Павел – без крывадушнасці, хітрасці і баязлівасці, - сказаў падчас урачыстасці кардынал Гуджэроці. Ён заклікаў мансеньёра Чампанелі служыць праўдзе і абараняць славу Божую ад нападаў тыранаў, якія імкнуцца пазбавіць чалавека годнасці. Асабліва гэта тычыцца найбольш уразлівых - малых, хворых, пераследаваных і пакутуючых. Бо кожны чалавек створаны паводле вобраза і падабенства Божага і прызначаны для вечнай гісторыі любові, якая выходзіць за рамкі кароткага часу нашага зямнога падарожжа”, - сказаў прэфект Дыкастэрыі па справах Усходніх Цэркваў.