Антоніа Бандэрас пра свае ўражанні ад сустрэчы з Папам
Аляксандр Амяльчэня - Vatican News
Вядомы галівудскі акцёр Антоніа Бандэрас у размове з мадрыдскімі журналістамі выказаў глыбокую ўдзячнасць за магчымасць сустрэцца з Папам. Гэтая падзея адбылася ў нядзелю, 7 чэрвеня 2026 года, падчас маштабнага мерапрыемства ў залі "Movistar Arena".
На сустрэчу сабраліся дванаццаць тысяч чалавек, пераважна моладзь, а таксама знакамітасці са свету культуры і спорту, прадстаўнікі грамадскіх арганізацый і прафесійных саюзаў.
Хваляванне перад шматтысячнай аўдыторыяй і шчырая размова з Пантыфікам
Падчас нядзельнай сустрэчы акцёр коратка паразмаўляў з Папам, аднак прызнаўся, што адчуваў сябе няўпэўнена перад сваім выступленнем. "Калі бачыш такую публіку, як тут, такі прыём, які наладзіў Папа, гэтыя апладысменты, то пачынаеш думаць: як я гэта зараз зраблю?" - з іроніяй заўважыў Бандэрас, дадаўшы, што быў вельмі крануты гэтым момантам.
Акцёр, вядомы па фільмах "Маска Зора" і "Дэсперада", адзначыў, што яму цяжка апісаць сустрэчу з Пантыфікам, які проста "ўсміхаўся і глядзеў" на яго. "Гэта было нешта выключнае. Напэўна, у бліжэйшыя дні я буду зноў і зноў перажываць гэтую сустрэчу ў сваіх успамінах", - падкрэсліў ён.
Дзелячыся з удзельнікамі мерапрыемства сваім сведчаннем пра сувязь культуры і веры, Антоніа Бандэрас імкнуўся наблізіць прысутным свае карані і шлях прыходу да Бога. Ён распавёў моладзі пра сваю радзіму, моцную сувязь з касцельнай супольнасцю, якую складаюць рэлігійныя брацтвы, пра народнае мастацтва на вуліцах, сваіх бацькоў. Акцёр згадаў узрушаныя твары людзей, якія бачаць Хрыста падчас працэсій, а таксама важныя сямейныя традыцыі.
Шматгадовы творчы ўклад у захаванне велікапосных традыцый
У размове з мадрыдскімі медыя Бандэрас пацвердзіў, што ў сваёй прамове згадаў уласны ўдзел у тэатральных пастаноўках, звязаных з Вялікім постам. Ураджэнец Малагі ўжо шмат гадоў дапамагае ў арганізацыі пасійных працэсій у сваім родным горадзе.
У красавіку 2018 года акцёр і рэжысёр выступіў на тэатральнай сцэне ў Малазе ў інаўгурацыйным спектаклі оперы-араторыі "Passio Christi". Аўтарам гэтага твора з'яўляецца італьянскі святар і кампазітар Марка Фрызіна, які на той час узначальваў рымскі дыяцэзіяльны хор. У пастаноўцы таксама прыняла ўдзел вядомая італьянская салістка Марыя Грацыя Ск'ява, якая выканала ролю святой Марыі Магдалены.
