Нямецкі біскуп: алімпійскія каштоўнасці ў цені вайны і допінгу
Аляксандр Амяльчэня - Vatican News
Алімпіяда ў Мілане і Карціна-д’Ампеца збірае атлетаў з усяго свету, але свята спорту суправаджаецца сур'ёзнымі разважаннямі аб справядлівасці і маральнасці.
Біскуп Штэфан Остэр у інтэрв'ю агенцтву “KNA” адзначыў, што алімпійскі рух не існуе ў вакууме, а на яго каштоўнасці сёння ўплываюць як ваенныя канфлікты, так і мінулыя допінгавыя скандалы.
Ужо больш за пяцьдзясят гадоў Каталіцкі Касцёл у Германіі забяспечвае душпастырскую апеку над спартсменамі падчас Гульняў. Святары прапануюць атлетам магчымасць знайсці супакой і сілы ў малітве, праводзяць набажэнствы і застаюцца побач у моманты крызісаў або траўм. Біскуп, адказны ў епіскапаце Германіі за спартыўнае душпастырства, падкрэсліў, што алімпійская вёска – гэта не толькі месца рэкордаў, але і прастора для глыбокіх чалавечых сустрэч.
Асаблівую ўвагу іерарх звярнуў на допінгавыя справы мінулага, узгадаўшы, як нямецкая біятлонная эстафета толькі праз дванаццаць гадоў атрымала заслужанае "золата" Сочы-2014 пасля дыскваліфікацыі расіян. Паводле яго слоў, такая сітуацыя выклікае дваістыя пачуцці: радасць ад справядлівасці і горыч ад скрадзенага моманту трыумфу на стадыёне.
Гаворычы пра ўдзел атлетаў з Расіі і Беларусі пад нейтральным сцягам, біскуп Остэр прызнаў складанасць сітуацыі. Ён заўважыў, што спорт заўсёды быў і будзе палітызаваным, таму не варта яго ідэалізаваць. Аднак менавіта таму міжнародныя спаборніцтвы павінны цвёрда стаяць на вартавых сваіх прынцыпаў: сумленнай гульні, павагі і мірнага суіснавання.
"Цяжка ўявіць, што адчуваюць украінскія спартсмены, рыхтуючыся да стартаў і хвалюючыся за свае сем'і", - адзначыў іерарх. “Але, вядома, нельга проста падвяргаць спартсменаў агульнаму падазрэнню або ўжываць калектыўныя пакаранні”, - дадаў ён.
Тым не менш, Алімпіяда застаецца ўнікальным шанцам для паразумення паміж народамі, адкрываючы свету атлетаў нават з тых краін, якія рэдка трапляюць у загалоўкі навін.
