Папа

“Белы горад” вітае Льва XIV: першыя крокі на алжырскай зямлі

Леў XIV прыбыў у Алжыр, дзе пад гукі гарматных залпаў і ўрачысты прыём Прэзідэнта пачалося яго дзесяцідзённае афрыканскае падарожжа, прысвечанае братэрству і міру.

Аляксандр Амяльчэня - Vatican News

Самалёт Святога Айца прызямліўся ў міжнародным аэрапорце імя Хуары Бумед’ена каля 10.00 па мясцовым часе. Першымі на борт падняліся апостальскі нунцый, арцыбіскуп Хаўер Херэра Карона, і кіраўнік пратакола Алжыра, каб павітаць Пантыфіка. Ужо каля падножжа трапа Льва XIV сустракаў Прэзідэнт Алжырскай Народнай Дэмакратычнай Рэспублікі Абдэльмаджыд Тэбун.

Белы горад сустрэў Пантыфіка вышэйшымі дзяржаўнымі ўшанаваннямі і сімваламі нацыянальнага гонару.

Гістарычны візіт суправаджаўся 21 гарматным залпам, якія прагучалі на фоне нацыянальных гімнаў. Пасля ўрачыстага праходу ўздоўж Ганаровай варты і прадстаўлення дэлегацый, Пантыфік атрымаў кветкі ад маленькай алжырскай дзяўчынкі. Кароткая прыватная размова ў "Salon d'Honneur" з Прэзідэнтам Тэбунам папярэднічала пераезду да знакавых месцаў сталіцы.

Алжыр, які часта называюць "la blanche" за яго бялюткія будынкі, што цягнуцца ўздоўж узбярэжжа, з’яўляецца найважнейшым портам краіны і горадам з глыбокай гісторыяй. Ад старажытнай Касбы, пабудаванай у XVI стагоддзі як асманскі форт і прызнанай спадчынай ЮНЕСКА, да раёнаў французскай каланіяльнай забудовы – кожны куток горада сведчыць пра складаны шлях да незалежнасці, атрыманай у 1962 годзе пасля кровапралітнай вайны.

Першым значным пунктам візіту стаў Манумент мучанікаў – велічнае ўшанаванне тых, хто аддаў жыццё за свабоду.

Каля 10.30 Святы Айцец накіраваўся да мемарыяла "Макам Эшахід", размешчанага ў 17,8 кіламетрах ад аэрапорта. Гэты бетонны манумент вышынёй больш за 90 метраў быў адкрыты ў лютым 1982 года да 20-годдзя незалежнасці краіны.

Тры стылізаваныя пальмавыя лісты, спраектаваныя канадскім архітэктарам Брусам Чарльзам Абудам, узвышаюцца над крыптай, дзе гарыць вечны агонь у памяць аб загінулых у барацьбе з каланіялізмам.

Візіт да гэтага сімвала нацыянальнай памяці падкрэслівае пашану Пантыфіка да гістарычнага вопыту алжырскага народа.