Анёл Панскі: не дазволіць будзённасці засланіць святло Хрыста
Аляксандр Амяльчэня - Vatican News
Падчас традыцыйнай нядзельнай сустрэчы з вернікамі на Плошчы Святога Пятра Папа разважаў над эпізодам з Евангелля паводле Лукі, дзе Езус прамаўляе ў назарэцкай сінагозе (4, 21). Ён адзначыў, што гэтая падзея мае актуальнасць і для сучасных хрысціян.
"У той дзень у Назарэце Езус паставіў сваіх суразмоўцаў перад выбарам адносна Ягонай тоеснасці і місіі. Ніхто ў сінагозе не мог пазбегнуць пытання: ці Ён толькі сын цесляра, які прысвойвае сабе ролю, якая Яму не належыць, ці сапраўды Месія, пасланы Богам для збаўлення народу ад граху і ўсялякага зла?" - адзначыў Пантыфік.
Францішак падкрэсліў, што жыхары Назарэта не змаглі распазнаць у Езусе памазанца Божага менавіта таму, што лічылі, быццам надта добра Яго ведаюць. "Гэта, замест таго каб дапамагчы ім адкрыць свой розум і сэрца, стала для іх перашкодай, быццам заслона, якая хавае святло", - растлумачыў Біскуп Рыма.
Святы Айцец заклікаў сучасных вернікаў задумацца над уласнымі адносінамі з Хрыстом. "Ці адчуваем мы той унікальны аўтарытэт, з якім прамаўляе Езус? Ці пазнаём у Ім носьбіта збаўлення? І я сам, ці адчуваю патрэбу ў гэтым збаўленні? Ці адчуваю, што і я ў нейкім сэнсе ўбогі, вязень, сляпы, прыгнечаны?" - пытаўся Папа.
Завяршаючы разважанні, Святы Айцец звярнуўся да Марыі з просьбай дапамагчы вернікам не спакушацца чалавечнасцю Хрыста і Ягонай любоўю да малых і ўбогіх. "Просім Марыю, каб у гэты Юбілейны год мы маглі нанова адкрыць Езуса з захапленнем і адчуць у сэрцы радасную ўпэўненасць: "Так, гэта Ён, Збаўца!"", - заключыў Папа.
