Іспанскія біскупы вызначылі прыярытэты да 2030 года
Аляксандр Амяльчэня - Vatican News
Пастаянная камісія епіскапату Іспаніі падчас сваёй 272-й сесіі ў Мадрыдзе паставіла фінальную кропку ў падрыхтоўцы "Душпастырскай лініі" на бліжэйшае чатырохгоддзе.
Дакумент, які атрымаў сімвалічную назву "Адпраўляйцеся ў шлях", грунтуецца на словах з Евангелля паводле Лукі. Як заявілі ў епіскапаце, гэта не проста адміністрацыйны план, а вынік глыбокага супольнага распазнавання, у якім удзельнічалі біскупы, дыяцэзіі і кіраўнікі касцельных офісаў.
Адным з найбольш значных практычных крокаў стала стварэнне адмысловага аддзела па сувязях з ісламам. Касцёл у Іспаніі адкрыта адказвае на выклікі часу, звязаныя з ростам мусульманскай супольнасці.
Новая структура будзе займацца падтрымкай міжрэлігійных сем’яў, падрыхтоўкай святароў да дыялогу і стварэннем катэхетычных матэрыялаў для катэхуменаў мусульманскага паходжання. Гэта сведчыць аб жаданні Касцёла быць мостам у грамадстве, якое становіцца ўсё больш і больш шматкультурным.
Акрамя стратэгічных дакументаў, іспанскі епіскапат анансаваў запуск "Летняй школы" для свецкіх вернікаў, манахаў і святароў, якая павінна стаць інтэлектуальнай і духоўнай пляцоўкай для сустрэч.
Таксама на парадку дня застаюцца літургічныя пытанні, у прыватнасці, рэвізія перакладу трэцяга выдання "Рымскага Імшала" на іспанскую мову.
Ужо ў сакавіку стартуе маштабная інфармацыйная кампанія, мэта якой – заахвоціць грамадзян накіроўваць частку падаткаў на патрэбы Касцёла.
