Papa: II Vatikan Məclisi bu gün də Kilsənin yoluna istiqamət verən ulduzdur

Debora Kastellano Lubov tərəfindən

“İkinci Vatikan Məclisinin Təlimi bu gün də Kilsənin yolunun istiqamətverici ulduzunu təşkil edir.”

Papa Leo bu fikirləri yanvarın 7-də Vatikanda keçirilən çərşənbə günü Ümumi Audiyensiyası zamanı səsləndirib. O, Yubiley ili ərzində İsanın həyatının sirlərinə yönəlmiş katexizisərdən sonra, İkinci Vatikan Məclisi və onun Sənədlərinin yenidən oxunmasına həsr olunmuş yeni katexizis silsiləsinə başlayıb.

Papa bunu “bu kilsə hadisəsinin gözəlliyini və əhəmiyyətini yenidən kəşf etmək üçün dəyərli bir fürsət” adlandırıb və Müqəddəs Papa II İoann Pavelin 2000-ci il Yubileyinin sonunda söylədiyi sözləri xatırladıb: “Məclisi XX əsrdə Kilsəyə bəxş edilmiş böyük bir lütf kimi göstərməyi özüm üçün hər zamankından daha böyük bir vəzifə hesab edirəm.”

Papa Leo xatırladıb ki, 2025-ci ildə, Nikeya Məclisinin ildönümü ilə yanaşı, Kilsə, İkinci Vatikan Konsilinin 60 illiyini də qeyd edib.

O bildirib ki, bu hadisədən bizi ayıran zaman çox uzun olmasa da, İkinci Vatikan Məclisində iştirak etmiş yepiskoplar və ilahiyyatçılar nəsli artıq aramızda deyil.

Məclis sənədlərinin yenidən oxunması

“Buna görə də, onun peyğəmbərliyinin sönməməsi və onun baxışlarının həyata keçirilməsi üçün yolların və vasitələrin axtarılmasının davam etdirilməsi çağırışını eşitdiyimiz halda, onu yenidən yaxından tanımaq vacib olacaq – bunu şayiələr və ya sonradan verilmiş şərhlər vasitəsilə deyil, sənədlərini yenidən oxuyaraq və onların məzmunu üzərində düşünərək etməliyik.”

Papa 2005-ci ildə XVI Benediktin söylədiyi sözləri sitat gətirib: “İllər keçsə də, Məclis Sənədləri öz aktuallığını itirməyib; əksinə, onların təlimləri Kilsənin yeni vəziyyəti və bugünkü qloballaşmış cəmiyyət üçün xüsusilə uyğun olduğunu göstərir.”

Papa Leo xatırladıb ki, Müqəddəs Papa XXIII İoann Məclisi 1962-ci il oktyabrın 11-də açarkən onu bütün Kilsə üçün işıqlı bir günün şəfəqi kimi təsvir etmişdi və əlavə edib ki, “bütün qitələrin Kilsələrindən toplanmış çoxsaylı Ataların işi həqiqətən də yeni bir kilsə dövrünün yolunu açdı.”

Allahın Ata simasının yenidən kəşf edilməsi – bizi Öz övladları olmağa çağıran Ata

“XX əsr boyunca aparılan zəngin Müqəddəs Kitab, ilahiyyat və liturgiya tədqiqatlarından sonra,” – Papa Leo vurğulayıb – “İkinci Vatikan Məclisi Allahın Ata simasını yenidən kəşf etdi: O, Məsihdə bizi Öz övladları olmağa çağırır. Məclis Kilsəyə xalqların nuru olan Məsihin işığında baxdı, onu Allahla xalqı arasında ünsiyyət sirri və birlik sakramenti kimi təqdim etdi; xilas sirrini mərkəzə qoyaraq və bütün Allah Xalqının fəal və şüurlu iştirakını vurğulayaraq mühüm liturgik islahatlara başladı.”

Eyni zamanda, Papa qeyd edib ki, Məclis bizə, “bəşəriyyətə qucaq açmaq, xalqların ümid və narahatlıqlarına səs vermək və daha ədalətli və qardaşlıq dolu cəmiyyətin qurulmasında əməkdaşlıq etmək istəyən” bir Kilsəyə kimi, “dünyaya açılmağa, müasir dövrün dəyişiklik və çağırışlarını dialoq və birgə məsuliyyət ruhunda qavramağa kömək etdi”.

Papa Leo vurğulayıb ki, İkinci Vatikan Məclisi sayəsində, Müqəddəs Papa VI Paulun “Ecclesiam suam” ensiklikasında deyildiyi kimi, Kilsə “deyilməli sözə, edilməli müraciətə, qurulmalı ünsiyyətə malikdir” və həqiqəti ekumenizm, dinlərarası dialoq və xoş niyyətli insanlarla dialoq yolu ilə axtarmağa çalışır.

Kilsənin ruhani həyatı və pastoral fəaliyyəti üçün bələdçi

Papa qeyd edib ki, bu ruh və bu daxili yönəliş bizim ruhani həyatımızı və Kilsənin pastoral fəaliyyətini səciyyələndirməlidir; çünki biz hələ də kilsəvi islahatı xidməti baxımdan tam şəkildə həyata keçirməmişik və bugünkü çağırışlar qarşısında zamanın əlamətlərinin ayıq-sayıq təfsirçiləri, Müjdəni sevinclə elan edənlər, ədalət və sülhün cəsarətli şahidləri olmağa çağırılmışıq.

Papa Leo,  Məclis dövründə yepiskop olan və sonradan Papa I İoann Pavel kimi tanınan Albino Luçianini xatırladıb. O, Məclisin əvvəlində yazdığı qeyddə belə deyirdi: “Həmişə olduğu kimi, təşkilatlara, metodlara və ya qurumlara deyil, daha dərin və daha geniş yayılmış bir müqəddəsliyə nail olmağa ehtiyac var”.

Papa Leo qeyd edib ki, Papa Fransisk daha sonra Məclisin Kilsəyə “Allahın üstünlüyünü, yəni əsas olanı bərpa etməyə kömək etdiyini: Rəbbinə və Onun sevdiyi bütün qadın və kişilərə dəlicəsinə aşiq olan bir Kilsəni” ortaya qoyduğunu söyləmişdi.

Papa Leo qeyd etdi ki, Papa Fransisk sonradan deyəcək ki,  Məclis Kilsəyə "Allahın üstünlüyünü, ən vacib olanı -  Rəbbinə və Onun sevdiyi bütün kişi və qadınlara dəlicəsinə aşiq olan bir Kilsəni bərpa etməyə kömək etdi".  

Sonda Papa XIV Leo İkinci Vatikan Məclisinin sənədlərinin yenidən oxunmasına çağırdı.

“İkinci Vatikan Məclisinin sənədlərinə yaxınlaşdıqca və onların peyğəmbər məzmununu, eləcə də bu gün üçün aktuallığını yenidən kəşf etdikcə, biz Kilsə həyatının zəngin ənənəsini qəbul edir, eyni zamanda bu günü yenidən dəyərləndirir və sevgi, ədalət və sülh səltənəti olan Allahın Padşahlığının Müjdəsini dünyaya aparmaq sevincimizi yeniləyirik.”