ር. ሊ. ጳ. ልዮን፦ “ነቶም ብኲናት ዝሞቱን ዝሳቐዩን ዘለዉ ኣይንረስዓዮም!”

ዜና ቫቲካን

ቅዱስ ኣቦና ርእሰ ሊቃነ ጳጳሳት ልዮን መበል 14፣ ካብቲ ኣብ ካስቴል ጋንዶልፎ ዝርከብ ሓዋርያዊ ህንጻ ብዘይካ ሒደት ህዝባዊ ፍጻመታትን ጸሎት ሰንበት ኣንጀለስን ጥራይ ዝፍጽሙሉ ኣብ ናይ ዕረፍቲ ግዜ እኳ እንተ ሃለዉ፣ እንደገና ሻቕሎቶምን ሓሳባቶምን ናብቲ ንዓለም ዚጸሉ ዘሎ ሓያሎ ግጭታት ከም ዘተኵሩ ገለጹ።

"ነተን ብውግእን ዓመጽን እተበታተና እተፈላለያ ሃገራት ዘጋጠመን ዘሎ ፍጻመታት ብሻቕሎት ንከታተሎ ኣሎና። ነቶም ብሰንኪ እዚ ግጭታት እዚ ዚሳቐዩን ዚሞቱን ዘለዉ ኣይንረስዓዮም፣ ኣብቲ ምእንቲ ሰላም እንገብሮ ልግሲ ድማ ዘየቋርጽ ጸሎት ንውስኸሉ" ክብሉ ተላበዉ።

ጸብጻባት ግዳያት ዩክረይንን ከምኡ ውን ኣብ ኢራንን ኩዌትን ዘሎ ግጭታት

ሎሚ እውን ኣብቲ ኣብ ዩክረይን ዝቕጽል ዘሎ ግጭት ግዳያት ዝኾኑ ሰባት ከም ዝሞቱ ጸብጻባት ተዘርጊሑ ኣሎ፣ ርእሰ ከተማ ኪየቭ ድማ ብብርቱዕ ሚሳይላት ሩስያ መጥቃዕቲ ወሪድዋ፣ ሓደ ሰብ ከም ዝቐተለ ብዓሰርተታት ዚቝጸሩ ድማ ከም ዝቘሰሉ ተገሊጹ ኣሎ። እዚ ኸምዚ ኢሉ ኸሎ፣ ሰራዊት ዩክረይን ኣብ ጸሊም ባሕርን ባሕሪ ኣዞቭን ኣብ ልዕሊ ወተሃደራዊ ዕላማታት ሩስያ መጥቃዕቲ ኸም ዝፈጸሙ ይንገር ኣሎ። እዚ ኸምዚ ኢሉ ኸሎ ድማ፣ ኣብ ደቡባዊ ኢራን ሓድሽ መጥቃዕቲ ኣየር ኣመሪካ ከም እተፈጸመ ጸብጻባት ተህራን የመላኽቱ፣ ኣብ ኩዌት ኣብ ዝርከብ ወተሃደራዊ መሳለጥያታት ኣመሪካ ድማ ደብዳባት ሚሳይላትን ድሮናትን ግብረ መልሳዊ መጥቃዕቲ ከም ዝገብሩ ተገሊጹ ኣሎ። ኩርዲስታን ዒራቕ እውን በዚ ኩነታት እዚ ተተንኪፉ ኣሎ። ዋሽንግተን ነዚ ሓድሽ መጥቃዕቲ፣ ምስቲ ዝሓለፈ ዓርቢ ኣብ ዮርዳኖስ ኣብ ዝርከብ መደበር ኣየር ሙዋፋቅ ኣል ሳልቲ እተፈጸመ መጥቃዕቲ ኣተሓሒዝዎ ኣሎ፣ ኣብኡ ድማ ክልተ ወተሃደራት ኣመሪካ ተቐቲሎም ሓደ ሳልሳይ ድማ ሃለዋቱ ከም ዘይተፈልጠ ሃቢሮም።

ቃል ሰላምታ ንተቐማጦ ካስቴል ጋንዶልፎን በጻሕቲ ነጋድያንን

ርእሰ ሊቃነ ጳጳሳት ልዮን መበል 14 ኣስዒቦም ንዅሎም ተቐማጦ ካስተል ጋንዶልፎ ሰላምታን ምስጋናን ኣቕረቡሎም፣ ነቶም "ካብ ኵሉ ዅርናዓት ዓለም" ዝመጹ ነጋድያን ከኣ ብሓጐስ ተቐበልዎም። በዚ ከምዚ ድማ ቅዱስነቶም ፍሉይ ሰላምታ ኣቕረቡሎም፦ ነቲ ብክብርቲ እናቴ ኤልቪራ እተመስረተ ማሕበረሰብ ቸናኮሎ ንበዓለ ህይወት ኣብ ሳሉዞ ንዝተኣከቡን፣ ንምንቅስቓስ ሓደስቲ ስድራቤታት ፎኮላሪን ንኣህጉራዊ ጉባኤ ኣብያተ ትምህርቱ ንዝተጋብኡን፣ ኣብ ናይ ክረምቲ ቤት ትምህርቲ ንዝሳተፉ ዘለዉ መክሲካውያን ተመሃሮን፤ ከምኡውን ንዓለምለኻዊ ሕብረት ካቶሊካውያንን ዝኣመሰሉ ጉጅለታት ፍሉይ ሰላምታ ኣቕረቡሎም።

ቅዱስነቶም ብቋንቋ እንግሊዝ ኣብ ዘካፈልዎ ሓሳባት ድማ፣ ነቶም ኣብ ኣህጉራዊ ስልጠና ናይ ሥነ መዕበያ ዝሳተፉ ዘለው መንእሰያት ኣባላት ረኙም ክሪስቲ ከምኡውን ኣብ "ንግደት ልዮን" ዝሳተፉ ንዘለዉ ንኣውስትራልያውያን ነጋድያን ምስ ተራዳኢ ጳጳሶም ብፁዕ ኣቡነ ኣንቶኒ ፐርሲ ናይ ሰበኻ ሲድኒ ሰላምታ ኣቕረቡሎም።