ርእሰ ሊቃነ ጳጳሳት ንካህናት ስጳይና፡ 'ቅዱሳን ኩኑ ንኽርስቶስ ድማ ምሰሉ'

ስምዖን ተ. ኣርኣያ - ሃገረ ቫቲካን

"ሎሚ ቤተ-ክርስትያን ዘድልይዋ ካህናት ምእንቲ ክትኮኑ ከምቲ ናይ ስጳይና ካህናት ሓላዊ ቅዱስ ዮሓንስ ብዓል ኣቪላ ጠቒሶም፡ “ምሉእ ብምሉእ ናቱ ኹን፡ ቅዱስ ኩን! ዝብል ምኽሪ ጠቒሶም፡ ቅዱሳት ኩን!" እንክብሉ ር.ሊ.ጳ. ልዮን ናብቲ ካብ ዕለት 9 – 10 ለካቲት ናብ ዝካየድ ዘሎ ጉባኤ ካህናት ስጳይና ኣብ ዘመሓላለፍዎ መልእኽቲ ተላብዮም፡ ቅዱስነቶም ኣብቲ ዕለት 28 ጥሪ 2026 ኣብ መዓልቲ ዝኽሪ ሊቅ ቤተ-ክርስትያን ቅዱስ ቶማስ ኣኲናስ ኣብ ዝኸተምዎ መልእኽቶም፡ ንካህናት ዘጋጥሞም ብድሆታት ኣፍልጦ ብምሃብ፡ ኣብ መንጎ ህርፋንን ዓለማውነትን ቅድስና ተላቢሶም ካልኦት ነቲ ዓሚቝ ትምኒት ልቦም ብህላወን ፍቕርን ጐይታ ንኽመልእዎ ምሕጋዝን ዝያዳ ኣድላዪ ምዃኑ ከም ዘተሓሳሰቡ ዜና ቫቲካን ኣፍሊጡ።

ብዛዕባ ብድሆታትን ተኽእሎታትን ብግልጺ ኣስተንትኑ

ርእሰ ሊቃነ ጳጳሳት፡ ህያው ቤተ ክርስቲያን ንካህናት ብህድኣትን ብቕንዕናን ኣስተንትኖ ብሓባር ደው ክብሉ ትዕድም፡ "ኣብ ህጹጽ መርመራ ወይ ኣብ ምቍጽጻር ህጹጽነት ንምትኳር ዘይኰነስ ነቲ ጐይታ ኣብ ቅድሜና ዝኸፍተልና ብድሆታትን ተኽእሎታትን ኣፍልጦ ብምሃብ ብህይወት ክንነብር እተጸዋዕናሉ ህሞት ብዕምቆት ምንባብ ክንመሃር ኣሎና።" ኣብዚ መንገዲ እዚ፡ ኣምላኽ ድሮ ዝገብሮ ዘሎ - መብዛሕትኡ ግዜ ብስቕታን ብልቦናን - ኣብ ማእከልናን ኣብ ማሕበረሰባትናን ብዝያዳ ብንጹር ንኽንርዳእ፡ ኣጠማምታና ምምሃርን ንነብስና ኣብ ምስትውዓል ምልምማድን ዝያዳ ኣድላዪ ይኸውን፡ ስለዚ እዚ ድማ ኣምላኽ ድሮ ኣብ ማእከልናን ኣብ ማሕበረሰብናን እንታይ ይገብር ከም ዘሎ ብንጹር ምእንቲ ኽንግንዘብ መብዛሕትኡ ግዜ ህዳኣትን ምስትውዓልን የድሊ፡ “ኣብ ብዙሕ ኣጋጣሚታት፡ ምዕቡል መስርሕ ሃይማኖትን ግብረ ገብን ዝንጽል ባህሊ፡ ኣብ ህዝባዊ ክትዕ እናዓበየ ዝኸይድ ዘሎ ምትፍናን፡ ከምኡ’ውን ንደቂ ሰባት ብስነ-ሓሳባዊ ወይ ከፊላውን ዘይእኹልን ምድባት ብምትርጓም ምትሕልላኻት ሰብኣውነት ናይ ምንካይ ዝንባለ ንዕዘብ” ከም ዝበሉ ዜና ቫቲካን ኣፍሊጡ።

እምነት ምምዝማዝንን ኣገዳስነት ዘይብሉ ገርካ ናይ ምርኣይ ሓደጋ

ርእሰ ሊቃነ ጳጳሳት ኣስዕብ ኣቢሎም፡ "በዚ መንጽር እዚ እምነት ክምዝመዝን ክትቅበሎን ወይ ድማ ትርጉም ከም ዘይብሉ ጌርካ ናይ ምርኣይ ሓደጋ ከጋጥሞ ይኽል፡ ንዝዀነ ይኹን መወከሲ ሰገራውነት ዚረሓቐ መልክዓት ሓባራዊ ናብራ ድማ ሱር ይሰድድ። ኣብዚ ድማ “ሸለል ክበሃል ዘይክእል ዓሚቝ ባህላዊ ለውጢ” ማለት “ናይ ሓባር መወከሲ ነጥብታት በብቑሩብ ምጥፋእ” ከም ዘሎ እውን ወሲኾን ብምምልካት፡ ንነዊሕ እዋን ክርስትያናዊ ዘርኢ ብዓቢኡ ዝተዳለወ ባይታ ከም ዝረኸበ ኣዘኻኺሮም፣ ከመይሲ ግብረ ገባዊ ቋንቋን ብዛዕባ ትርጉም ህይወት ዝምልከት ዓበይቲ ሕቶታትን ገለ መሰረታዊ ኣምርን እንተወሓደ ብኸፊል ኣብ ኵሉ ዝንጸባረቕ እዩ ዝነበረ። “እዚ ሓባራዊ ኣስተውዕሎ እዚ ኣዝዩ ከም እተዳኸመ ኣስተብሂሎም፡ ናይዚ ውጽኢቱ ድማ ብዙሓት ንዘመናት ሰባት ነቲ ክርስትያናዊ መልእኽቲ ክርድእዎን ከመሓላልፉን ዝሓገዙ መሰረታዊ ሓሳባት ድሕሪ ደጊም ዘይምርኣይን ኣብ ብዙሕ ኣጋጣሚታት እውን ዘይምርዳእን እዩ ዝኸውን፡ “ሕጂ፡ ወንጌል ዘይምግዳስ ጥራይ ዘይኮነስ፡ ቃላት ድሕሪ ደጊም ብዙሕ ኣቃልቦ ዘይገብርን እቲ ናይ መጀመርታ ብስራት ወንጌል ከም ንቡር ክውሰድ ዘይክእልን ዝተፈላለየ ባህላዊ ኣድማስ የጋጥሞ” እንክብሉ ከም ዘብርሁ ዜና ቫቲካን የመላኽት።

ክርስቶስ ጥራይ ምልኣት

“ሎሚ ኣብ ልቢ ብዙሓት ሰባት ብፍላይ ድማ ኣብ ልቢ መንእሰያት ሓድሽ ዘይርጉእነት ይኽፈት ከምዘሎ ርግጸይና እየ። ብፍላይ “ጽቡቕ ምህላው ፍጹምነት ምሃብ ነቲ ትጽቢት ዝግበረሉ ሓጐስ ኣየምጽእን፤ ካብ ሓቂ ዝተነጸለ ናጽነት ናይቲ መብጽዓ ተፈጻምነት ኣየመንጩን፤ ንዋታዊ ምዕባለ ድማ ንባዕሉ ነቲ ዓሚቝ ድሌት ልቢ ወዲ ሰብ ከዕግብ ኣይክእል” ከም ዝበሉ ዝሓበረ ዜና ቫቲካን ኣስዒቡ፡ እዚ ዅሉ፡ ነቲ እናዓበየ ዝኸይድ ስምዒት ድኻምን ባዶነትን ኣበርክቶ ከም ዘለዎ ኣስተብሂሎም፡ እዚ ኸኣ ኣምላኽ ጥራይ ነዚ ባዶነት እዚ ኪመልኦ ከም ዚኽእል ዘረጋግጽ ምልክታት እዩ” እንክብሉ ከም ዘጒልሑ ኣፍሊጡ።

ብክርስቶስ ዝተቐርጹ ሰባት

ጐይታ ድሮ ኣብ ስራሕ ከም ዘሎን ብጸጋኡ ቀቅድሜና ከም ዝኸይድን ቅዱነንቶም ንካህናት ኣዘኻኺሮም፡ እቶም ሎሚ ቤተ ክርስቲያን ዘድልይዋ ሰባት “ብርግጽ ብብዝሒ ዕማማት ወይ ብጸቕጢ ውጽኢት ዝግለጹ ሰባት ዘይኮኑስ” እንታይ ደኣ “ንክርስቶስ ዝመስሉ፣ ምስኡ ብዝነብርዎ ህያው ዝርክብ ኣቢሎም ኣገልግሎቶም ክቕጽሉ ዝኽእሉ፣ ብቕዱስ ቁርባን ዝድልድሉ፡ ገዛእ እርሶም ምሉእ ውህበት ገይሮም ብዘቕርብሉ ናይ ፍቕሪ ጒስነት ዝግለጹን ሰባት እዮም - ቢሎም - እዚ "ሓደስቲ ኣብነታት ምምሃዝ ወይ ነቲ ዝረኸብናዮ መንነት ዳግመ ምግላጽ ማለት ኣይኮነን" ክብሉ ኣነጺሮም። እንታይ ደኣ፡ ንኽህነት ብሓድሽ ጽዑቕ ሓሳብ ምቕራብ፡ ኣብቲ ኣዝዩ ሓቀይና ሕመረቱ - ካልአ ክርስቶስ ምዃን - ንህይወትና ክቐርጽ፡ ልብና ክጥርንፎ፡ ካብ ቅርበት ምስ እግዚኣብሄር፡ እሙን ተወፋይነት ንቤተክርስትያን፡ ከምኡ'ውን ንሓልዮትና ብሓላፍነት ዝተዋህበ ህዝቢ ንዝነብሮ ጭቡጥ ኣገልግሎት ቅርጺ ክህብ ብምፍቃድ እዩ፡ ሓደ ካህን መንነቱ ከይተመንዘዐ ምሉእ ሕይወት ንእግዚኣብሔር ንምምልካትን ንኻልኦት ናብ ምስጢር ንምምራሕን ዝዓለመ ምዃኑ ወሲኾም ከም ዘብርሁ ዜና ቫቲካን የመላኽት።

ቤተ ክርስቲያን ንኹሉ ምዃና ደጊሞም ብምዝኽኻር፡ ኣገዳስነት ሕውነት ክህነት ኣስሚሮም፡ ነዚ ብዝምልከት ርእሰ ሊቃነ ጳጳሳት “ዝኾነ ሰብ ኣብ ኣገልግሎት ተቓላዓይ ወይ በይኑ ኮይኑ ክስምዖ የብሉን፡ ንልብን ተልእኾን ዘዳኽምን ውልቃውነት ብሓባር ክንቃወሞ ኣሎና!” እንክብሉ ኣተሓሳሲቦም፡ ካህናት ስጳይና ኣብ ኣገልግሎቶም ክተባብዑን ንክርስቶስ ክምልኹን ናይ ዓሚቝ ጸሎት ሰባት ክኾኑን ንህዝቦም እውን ነዚ ዝምህሩ ክኾኑ ተማሕጺኖም መልእኽቶም ከም ዝዛዘሙ ዜና ቫቲካን ኣፍሊጡ።