ሃገረ ዩክረይን ድሕሪ ኣርባዕተ ዓመት፦ 'ህያው ታሪኽ ፋሲካ እዩ'

ኣባ ተወልደ መብራህቱ - ሃገረ ቫቲካን

ህዝቢ ዩክረይን ነቲ ኣዕናዊ ሳዕቤናት ኲናት ኣብ ዝጾረሉ ዘሎ እዋን፣ ካቶሊካውያን ምእመናን ዓሚቝ ሓድነትን ጸሎትን ርሕራሐን ክገብሩ ይጽውዑ ኣለዉ። እቲ ቐጻሊ ኲናት ንተጻዋርነት ሕዝቢ ዩክረይን ይፍትኖ ጥራይ ዘይኰነስ፣ ኣብ ቅድሚ ዓለምለኻዊት ቤተ-ክርስትያን ፍቕርን ምሕረትን ክርስቶስ ንምግላጽ ፍሉይ ኣጋጣሚ ይኸፍተሉ ውን እዩ ዘሎ። ኣብ ፊላደልፍያ ዝርከቡ ናይ ዩክረይናውን ካቶሊካዊ ሊቀ ጳጳሳት ብፁዕ ኣቡነ ቦሪስ ጉድዝያክ፣ "ተልእኾና ተስፋ ኣብቲ ትስፋ ቍርጸት ዝበዝሖ ቦታ ናይ ተስፋ መሰኻኽር ምዃን ኢዩ" በሉ። እዚ ህሞት እዚ ንዅሎም ኣመንቲ ኣገዳሲ እዋን ኢዩ፣ ነቶም ምእንቲ ሓቅን ፍትሕን ሰብኣዊ ክብርን ክብሉ ዚሳቐዩ ሰባት ንምሕጋዝ ዘሎና ሓባራዊ ጻውዒት ድማ የዘኻኽረና።

ብፓስተር ክንክን ምላሽ ምሃብ

ኣብ ትሕቲ መሪሕነት ሊቀ ጳጳሳት ፊላደልፍያን መሪሕነት ጉባኤ ካቶሊካውያን ጳጳሳት ዩክረይንን ንልዕሊ ዓሰርተ ዓመት ዝጸንሐ ጸገማት ቤተክርስቲያን ብንጥፈት ኣሰንያ እያ። ብዙሓት ካቶሊካውያን ምእመናን ዩክረይን ኣብ ዓዶም ኰነ ኣብ ስደት ዚርከቡ ንሃገሮም ኣብ ዘለዎም ተጸምዶ ጽኑዓት እዮም። "ከምቲ ቅዱስ ጳውሎስ ዝምህረና 'ሓደ ኣካል እንተ ተሳቐየ ኲላቶም ብሓባር ይሳቐዩ' (1 ቆሮንጦስ 12፡26) ክብሉ ብፁዕ ኣቡነ ጉድዝያክ መስከሩ።

ብፁዕ ሊቀ ጳጳሳት ቦሪስ ጉድዚያክ መጥሮፖሊሳዊ ሊቀጳጳሳት ናይ ሰበካ ፊላደልፊያ ካናዳ

ብቀዳመይቲ እመቤት ሃገረ ዩክረይን ኦሌና ዘለንስስኪ እተደገፈ ተቕዋም ሥነ-ኣእምሮኣዊ ጥዕና ንመንፈሳውን ስነ-ኣእምሮኣውን ድሕንነት ናይ ብሚልዮናት ዝቝጸሩ ሰባት፣ ብፍላይ ከኣ ብኲናት እተጐድኡ ቘልዑ ንምምዕባል "ከመይ ኣለኻ?" ዝተሰምየ ጉስነታዊ ውጥን ተጀሚሩ ኣሎ። "ደቅና ሕውየት የድልዮም ኣሎ፣ ቤተ-ክርስትያን ከኣ ንቝስሎም ፈውሲ ኽትከውን ተጸዊዓ እያ" በሉ። እዚ ጕስነታዊ ጻዕርታት እዚ በቲ ቤተ-ክርስትያን ንዅሎም ደቂ ኣምላኽ ናይ ምምሕዳርን ሓልዮታ ናይ ምልጋስን ልምዲ ተደሪኹ ዝካየድ ዘሎ እዩ።

ዓለምለኻዊ ደገፍ ቤተ-ክርስትያን

ኣብ ብምሉኡ እዚ እዋን እዚ ቅድስቲ መንበር ዘይነቓነቕ ደገፋ ለጊሳ እያ። ርእሰ ሊቃነ ጳጳሳት ፍራንቸስኮ ዳርጋ ኣብ ነፍሲ ወከፍ ረቡዕ ረቡዕ ዘካየድዎ ዝነብሩ ሓፈሻዊ ኣስተምህሮ ትምህርተ ክርስቶስን፣ ኣብ ናይ ዕለተ ሰንበት ጸሎተ መልኣከ እግዚአብሔርን ምእንቲ እታ "በጃ ትኸውን ዘላ ዩክረይን" ክብሉ ጸሎት ኣቕሪቦም እዮም፣ እሱራት ውግእን እተጨውዩ ቘልዑን ሓራ ንምውጻእ ድማ ጣልቃ ኣትዮም እዮም። ቅዱስ ኣቦ ኣብቲ ናብ ምእመናን ዘመሓላለፍዎ መልእኽቶም፣ "ጸሎት ምእንቲ ሰላም ይዓርግ፣ ልግሲ ድማ ንጸልማት ውግእ የብርሆ" ክብሉ ከም እተማሕጸኑን፣ እቲ ሃገረ ቫቲካን እተካየዶ ሥነ - ምግባራውን መንፈሳውን ጠበቓነት፣ ምስ ከም ሰብኣዊ ረድኤት ምእካብ ዝኣመሰለ ግብሪ ምሕረት ተደሚሩ ብዋጋ ዘይትመን ምትብባዕ ኢዩ ዝንበረ።

ጉባኤ ካቶሊካውያን ጳጳሳት ሃገረ ፖላንድ እውን ብቓላት ቅዱስ ኣቦና ተደሪኾም ህጹጽ ድሌታት ሕዝቢ ዩክረይን ንምምላእ ዘለዎም ዘበለ ኣወፍዮም ኢዮም፣ እዚ ድማ ቤተ-ክርስትያን ሓድነት ናይ ምዕካብ ዘለዋ ክእለት ዘርኢ ኢዩ። ብፁዕ ካርዲናል ካዚሚየርዝኪ ብዓል ዋርሳዋ "ከም ኣሕዋትን ኣሓትን ምስ ዩክረይን ደው ኢልና ጾርን ሓጐስን ወንጌል ንካፈል ኣሎና" ክብሉ ከም ዝመስከሩ እውን ዘከሩ።

ኣብ እዋን ጾም ብወንጌል ምንባር

ዘመነ ጾም ንኣመንቲ ንጸሎትን ጾምን ምጽዋትን ዘለና ተጸምዶ ንምዕማቝ ፍሉይ ወቕቲ እዩ ዝኸፍተሎም። ምእመናን ቍምስናታት ድማ ነቶም ኣብ ዩክረይን ኰነ ኣብ ካልእ ቦታታት ንዝሳቐዩ ዘለዉ ሰባት ንምድጋፍ ኣብ ውዳበታትን መንፈሳዊ ተበግሶታትን ክሳተፉ ተዓዲሞም ኣለዉ፣ እዚ ድማ ነቲ ናይ ቤተ-ክርስትያን ኣድማሳዊ ተልእኾ ግብረ ሰናይ ዘንጸባርቕ ኢዩ። ክቡር ኣባ ቫሲል ኮብሪን ብወገኖም "እቶም እተጨነቑ፣ ክርስቶስ ብቤተ-ክርስትያኑ ኣቢሎም ህያው ከም ዝኾነ ምእንቲ ኺፈልጡስ ልብናን ኣእዳውናን ንኽፈት" ክብሉ እውን ጻውዒት ኣቕረቡ። ሓዋርያ ጳውሎስ "ጾር ሓድሕድኩም ጹሩ ከምኡ ድማ ሕጊ ክርስቶስ ፈጽሙ" (ገላትያ 6፡2) ክብል ከም ዝተማሕጸነ እውን ኣዘኻኸሩ።

ኣብ ማእከል መከራ ብዛዕባ ተስፋ ምምስካር

ብትሕትናን ተስፋን ኵሎም ምእመናንን መራሕቲ ቤተ-ክርስትያንን ኣብ ጸሎት ንቑሓት ክኾኑን፣ ብርሕራሐ ሓበሬታ ዘለዎም ከምኡውን ብሕውነት ለጋሳት ክዀኑ ይጽውዑ ኣለዉ። ክብርቲ እናቴ  ማሪያ ሮማንቹክ ብዓልቲ ልቪቭ እውን ብወገነን፣ "ክርስትያን ምዃን ኢድ እቶም መከራ ዝበዝሖም ሰባት ምሓዝ፣ ገጽ ክርስቶስ ኣብ ቍሱላት ምርኣይ እዩ" በለት። ምስክርነትና ነቶም ዝደኸሙ ግን ከኣ ሓቅን ፍትሕን ኣምላኽ ከም ዚሰፍን ብምትእምማን እሙናት ዝዀኑ ሰባት የጸናንዖም ኢዩ ክብላ እውን ገለጻ።

ኣብ ዩክረይን ሰላም ምእንቲ ክሰፍን ምእንቲ ዅሎም እቶም ከቢድ ኲናት ዝጻወሩ ዘለዉ ብሓባር ንጸሊ፣ ጐይታ ኣብ መንጎ መከራ እውን ከይተረፈ ይዓዪ ኸም ዘሎ ብምትእምማን ንጸሊ። ከምቲ መጽሓፈ መዝሙር ዝገለጾ "እግዚኣብሔር ነቶም ልቦም እተሰብረ ቐረባኦም እዩ፣ ነቶም እተዓመጹ ኸኣ የድሕኖም" (መዝ 34፡18) ።

እዚ ዘመነ ጾም እዚ ንምእመናን ከም ብሓድሽ መጋቢነትን ፍቕራዊ ልግስን ልባዊ ምህለላን ንኺገብሩ ድማ የተባብዑ። ሰላምና ኣምላኽ እዩ፣ ንሕና ድማ ሓዋርያቱ ኽንከውን ተጸዊዕና ኢና። ጸሎት ግበሩ ተስፋ ድማ ኣይትቍረጹ" ክብሉ ብፁዕ ሊቀ ጳጳሳት ጉድዝያክ ቃለ መሕትቶም ደምደሙ።