குழந்தைகளின் வளர்ச்சியில் எண்ணிமக் கருவிகளின் தாக்கம் குறித்து யுனிசெஃப் எச்சரிக்கை
அபிசேக் ராஜா அலங்காரம் - வத்திக்கான்
ஆரம்பக்காலக் குழந்தைப் பருவத்தில் எண்ணிமக் கருவிகளை அதிகமாகவோ அல்லது முறையற்ற வகையிலோ பயன்படுத்துவது குழந்தைகளின் அறிவாற்றல் மற்றும் உணர்வுப்பூர்வமான வளர்ச்சியைப் பாதிக்கும் என்று இத்தாலி நாட்டின் யுனிசெஃப் அமைப்பு எச்சரித்துள்ளது.
வாழ்க்கையின் முதல் சில ஆண்டுகளில், குழந்தைகளின் அறிவாற்றல் மற்றும் உணர்ச்சிப்பூர்வமான வளர்ச்சி, அவர்களைப் பராமரிக்கும் பெரியவர்களுடன் நேரடியாகப் பழகுவதன் மூலம் பெரிதும் உருவாகிறது என்று யுனிசெஃப் இத்தாலி தலைவர் நிக்கோலா கிராசியானோ வலியுறுத்தியுள்ளார்.
குறிப்பாக, நேருக்கு நேர் பார்ப்பது, உரையாடுவது, விளையாடுவது மற்றும் உணர்வுப்பூர்வமான தொடர்பை ஏற்படுத்துவது ஆகியவை குழந்தைகளின் வளர்ச்சிக்கு மிகவும் முக்கியமானவை என்று அவர் தெரிவித்துள்ளார்.
தாய்ப்பால் கொடுக்கும் போது கூட திறன்பேசிகளைப் பயன்படுத்துவது தாய்மார்களுக்கும் குழந்தைகளுக்கும் இடையிலான நெருக்கத்தைக் குறைக்கும் என்றும், குழந்தைகளின் உடல் மொழிகளை அடையாளம் கண்டு அவற்றுக்குப் பதிலளிப்பதற்கான வாய்ப்புகளைக் குறைக்கும் என்றும் அவர் குறிப்பிட்டுள்ளார்.
மீண்டும் மீண்டும் ஏற்படும் எண்ணிம கவனச்சிதறல்கள் தகவல் தொடர்புகளின் தரத்தை பலவீனப்படுத்தலாம் மற்றும் உணர்ச்சி மற்றும் தகவல்தொடர்பு வளர்ச்சியைப் பாதிக்கலாம் எனவும் அவர் எச்சரித்துள்ளார்.
குழந்தைகளுக்கான பாதுகாப்பான எண்ணிம சூழலை உருவாக்குவதற்கான பொதுவான கொள்கைகள் குறித்த ஜி7 எண்ணிம மற்றும் தொழில்நுட்ப அமைச்சர்களின் ஒப்பந்தத்தையும் யுனிசெஃப் இத்தாலி வரவேற்றுள்ளது.
வலுவான தனியுரிமை மற்றும் பாதுகாப்பு நடவடிக்கைகள், வயதுக்கு ஏற்ற கவனம், குழந்தைகளை மையமாகக் கொண்ட பரிந்துரை அமைப்புகள் மற்றும் செயற்கை நுண்ணறிவை உள்ளடக்கிய குழந்தைகளுக்கு எதிரான பாலியல் வன்முறைக்கு எதிரான அவசர நடவடிக்கை ஆகியவை இக்கொள்கைகளில் அடங்கும்.
ஜி7 நாடுகளில் 100 மில்லியனுக்கும் அதிகமான குழந்தைகள் வாழ்கின்றனர், மேலும் பல பில்லியன் குழந்தைகள் இந்த சந்தைகளால் தாக்கத்தை ஏற்படுத்தக்கூடிய எண்ணிமத் தளங்களைப் பயன்படுத்துகின்றனர் என்பதால், இந்த ஒப்பந்தம் குழந்தைகள் பாதுகாப்பை வலுப்படுத்துவதற்கான ஒரு முக்கிய வாய்ப்பைக் குறிக்கிறது என்று யுனிசெஃப் கூறியுள்ளது.
இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்.
