வாரம் ஒரு நிகழ்வு

அனைத்துலக தந்தையர் தினம்

டேனிக்கா அமிஷ்

"வேர் சுமக்கும் மரம் போல, நம் வாழ்வைச் சுமக்கும் உன்னத உயிர்; அன்பின் உருவாய் தந்தை!"

ஒவ்வொரு ஆண்டும் ஜூன் மாதத்தின் மூன்றாவது ஞாயிற்றுக்கிழமை அனைத்துலக தந்தையர் தினம் (International Father’s Day) மிகவும் நெகிழ்ச்சியுடன் கொண்டாடப்படுகிறது. நம் வாழ்வின் ஒவ்வொரு நிலையிலும் நமக்கு அரணாக விளங்கும் தந்தையர்களின் தன்னலமற்ற அன்பு, உழைப்பு மற்றும் தியாகத்தைப் போற்றி கௌரவிப்பதற்காக இந்த நாள் ஒதுக்கப்பட்டுள்ளது. ஒரு குடும்பத்தின் வளர்ச்சிக்கும் உறுதிக்கும் முதுகெலும்பாகத் திகழும் தந்தையர்களுக்கு நன்றி செலுத்தும் ஒரு நல்வாய்ப்பாக இந்நாள் அமைகிறது. இந்தத் தினத்தின் வரலாறு அமெரிக்காவில் தொடங்கியது. 1909-ஆம் ஆண்டு, சோனோரா ஸ்மார்ட் டாட் (Sonora Smart Dodd) என்ற பெண்மணி, தனது தந்தையின் அர்ப்பணிப்புமிக்க வளர்ப்பையும் தியாகத்தையும் நினைவுகூரும் வகையில் தந்தையர்களுக்கென ஒரு தனி நாளை உருவாக்க முனைந்தார். இதன் விளைவாக, 1910-ஆம் ஆண்டு முதல் அனைத்துலக தந்தையர் தினம் அதிகாரப்பூர்வமாகக் கொண்டாடப்பட்டு வருகிறது. இன்று இது உலகம் முழுவதும் பரவி, தந்தையர் மீதான மரியாதையை வெளிப்படுத்தும் ஒரு அனைத்துலக விழாவாக மாறியுள்ளது. ஒரு தந்தை என்பவர் குடும்பத்தின் அசைக்க முடியாத தூண் மற்றும் பாதுகாப்பின் சின்னமாகத் திகழ்கிறார். அவர் பிள்ளைகளுக்கு வெறும் உணவையும் உடையையும் மட்டும் வழங்குபவர் அல்ல; வாழ்வின் சவால்களை எதிர்கொள்ளும் தைரியத்தையும், ஒழுக்கத்தையும் கற்றுக்கொடுக்கும் சிறந்த வழிகாட்டியாகவும் விளங்குகிறார். ஒரு திசைகாட்டி போல இருந்து பிள்ளைகளின் எதிர்காலப் பாதையைச் சீரமைப்பதில் தந்தையின் பங்கு அளப்பரியது. வெளியே பார்ப்பதற்குக் கடினமானவர் போலவும், கண்டிப்பானவர் போலவும் தந்தை தோன்றினாலும், அவரது உள்ளம் பிள்ளைகளின் நலனுக்காகத் துடிக்கும் மென்மையான அன்பைக் கொண்டது. தனது சுகதுக்கங்களை மறந்து, பிள்ளைகளின் மகிழ்ச்சிக்காக ஓயாது உழைக்கும் ஒரு தந்தையை நேசிப்பதும், அவரை மதிக்க வேண்டியதும் ஒவ்வொரு பிள்ளையின் கடமையாகும். "தந்தை சொல் மிக்க மந்திரம் இல்லை" என்பதற்கேற்ப, தந்தையின் வழிகாட்டுதல்களைப் பின்பற்றி வளமான வாழ்வை அமைப்போம்.

ஒரு தந்தை தனது குடும்பத்தைக் காப்பதற்காகத் தினமும் அயராது உழைக்கும் உழைப்பு ஈடு இணையற்றது. தனது சொந்த ஆசைகளையும் தனிப்பட்டத் தேவைகளையும் ஒருபுறம் தள்ளிவைத்துவிட்டு, குழந்தைகளின் கல்வி மற்றும் வளமான எதிர்காலத்திற்காகத் தனது வாழ்நாளையே அவர் அர்ப்பணிக்கிறார். குழந்தைகளின் கனவுகள் நனவாக வேண்டும் என்பதற்காகத் தனது சுகதுக்கங்களை விட்டுக்கொடுக்கும் தந்தை, ஒரு மௌனமானத் தியாகியாகத் திகழ்கிறார். தந்தையின் அன்பு என்பது பெரும்பாலும் வார்த்தைகளால் சொல்லப்படுவதில்லை, அது அவரது உழைப்பிலும் பிள்ளைகளுக்காக அவர் சிந்தும் வேர்வையிலும் வெளிப்படுகிறது. தந்தையிடமிருந்து நாம் கற்றுக்கொள்ள வேண்டிய வாழ்வியல் பாடங்கள் பல உள்ளன. எத்தகைய இக்கட்டானச் சூழலிலும் குடும்பத்தைக் காக்கும் பொறுப்பு உணர்வு, கடின உழைப்பின் மேன்மை மற்றும் நேர்மை தவறாதத் தன்மையை அவரிடமிருந்தே நாம் கற்றுக்கொள்கிறோம். வாழ்வின் போராட்டங்களை அமைதியுடனும் பொறுமையுடனும் எதிர்கொள்ளும் மனப்பக்குவம் தந்தையின் நிழலில் வளரும்போது நமக்குக் கிடைக்கிறது. அவர் காட்டும் நேர்மையும் ஒழுக்கமுமே ஒரு பிள்ளையின் எதிர்கால வாழ்க்கையை உயர்த்தும் மிகச்சிறந்த அடிப்படை மதிப்புகளாக அமைகின்றன. வாழ்க்கைச் சவால்களைத் தைரியத்துடன் எதிர்கொள்ளும் மனவலிமையை ஒரு தந்தை தனது செயல்களின் மூலம் பிள்ளைகளுக்குப் போதிக்கிறார். வெளியுலகின் அச்சுறுத்தல்களில் இருந்து குடும்பத்தைப் பாதுகாக்கும் அரணாக விளங்கும் அவர், பிள்ளைகளின் தன்னம்பிக்கைக்கு ஆதாரமாக இருக்கிறார். தந்தையின் வழிகாட்டுதல்களையும் அவர் நமக்காகச் செய்தத் தியாகங்களையும் போற்றுவது நமது கடமையாகும். அந்த உன்னதமான மனிதர் கற்றுக்கொடுத்த நற்பண்புகளை நமது வாழ்க்கையில் கடைப்பிடிப்பதே நாம் அவருக்குச் செய்யும் உண்மையான நன்றிக்கடனாகும்.

அனைத்துலக தந்தையர் தினமானது தந்தையர்களுக்கு நன்றி சொல்லும் ஒரு உன்னதமான நாளாகக் கொண்டாடப்படுகிறது. இந்நாளில் அவர்களுக்குப் பிடித்தமான பரிசுகளை வழங்குவதை விட, அவர்களுடன் தரமான நேரத்தைச் செலவிடுவது அவர்களுக்கு மட்டற்ற மகிழ்ச்சியைத் தரும். பல தந்தையர்களுக்குத் தங்கள் பிள்ளைகளிடமிருந்து கிடைக்கும் ஒரு சிறிய "நன்றி" என்ற வார்த்தையே வாழ்நாள் முழுவதும் அவர்கள் செய்த தியாகங்களுக்குக் கிடைத்த மிகப்பெரிய பரிசாக அமைகிறது. பழைய நினைவுகளைப் பகிர்ந்து கொள்வதும், அவர்களைப் பாராட்டுவதும் இந்த நாளைப் பொருள்மிக்கதாக மாற்றும். தந்தையின் அன்பு என்பது பெரும்பாலும் மௌனமானது; அவர் தனது கவலைகளையும் துயரங்களையும் வெளியில் காட்டிக்கொள்ளாமல் குடும்பத்திற்காக அமைதியாகப் போராடுபவர். பிள்ளைகளின் முகத்தில் சிரிப்பைக் காண்பதற்காகத் தனது வலிகளை மறைத்துக் கொள்ளும் ஒரு மறைமுகத் தியாகியாக அவர் திகழ்கிறார். தந்தையரின் மௌனம் கூட ஒரு மொழியாக மாறி பிள்ளைகளுக்கான அன்பைப் பேசுகிறது. அவர் குடும்பம் எனும் கட்டிடத்தின் அஸ்திவாரமாக இருந்து, வெளியே தெரியாமலேயே பாரத்தைச் சுமந்து குடும்பத்தை வழிநடத்துகிறார்.

ஒரு நல்ல சமூகம் உருவாவதற்கு நல்ல குடும்பங்கள் அவசியம், அந்த நல்ல குடும்பத்தின் அடித்தளத்தை ஒரு தந்தைதான் அமைக்கிறார். ஒரு தந்தையின் வழிகாட்டுதலில் வளரும் பிள்ளைகளே ஒரு வலிமையான தலைமுறையை உருவாக்குகிறார்கள். இன்றைய டிஜிட்டல் உலகில் மொபைல், வேலை மற்றும் நண்பர்களுக்கு நாம் கொடுக்கும் முக்கியத்துவத்தைத் தாண்டி, நம் தந்தையுடன் செலவிடும் நேரமே மிக முக்கியமானது. நாம் என்றாவது ஒருநாள் தந்தையாகும் போதுதான், நம் தந்தை நமக்காகச் செய்த தியாகங்களின் ஆழம் நமக்கு முழுமையாகப் புரியும். தந்தையின் தியாகம் என்பது நாம் வளர வளரத்தான் புரியும் ஒரு பெரும் புதிராகும். குழந்தைப் பருவத்தில் அவர் நமக்காக வாங்கிய பொம்மைகளுக்குப் பின்னால், அவர் விட்டுக்கொடுத்த தனது சொந்தத் தேவைகள் பல இருக்கும். ஒரு சிறிய மிதிவண்டி முதல் உயர்கல்வி வரை, ஒரு தந்தை தனது வியர்வையை மூலதனமாக வைத்துத்தான் பிள்ளைகளின் கனவுகளுக்கு உயிர் கொடுக்கிறார். "தன் பிள்ளையின் காலணி தேய்ந்துவிடக்கூடாது என்பதற்காக, தன் காலணி தேயும் வரை உழைப்பவன் தந்தை" என்ற வரிகள் தந்தையரின் தன்னலமற்ற உழைப்பிற்குச் சான்றாகும்.

இன்றைய தலைமுறை இளைஞர்களுக்குத் தந்தையுடன் செலவிடும் நேரம் என்பது மிகக் குறைவாகவே உள்ளது. சமூக வலைதளங்களிலும் நண்பர்களிடமும் காட்டும் ஆர்வத்தில் ஒரு சிறு பகுதியைத் தந்தையிடம் காட்டினால், அது அவருக்குப் பெரும் தெம்பைத் தரும். அவரோடு அமர்ந்து பழைய கதைகளைப் பேசுவதும், அவரது அனுபவங்களைக் கேட்டு அறிவதும் அவருக்கு நாம் தரும் உன்னதமான பரிசாகும். நாம் கொடுக்கும் விலை உயர்ந்த பொருட்களை விட, அவருக்குத் தேவையானது நமது அன்பான அரவணைப்பும், "நாங்கள் இருக்கிறோம் அப்பா" என்ற ஒற்றை நம்பிக்கையுமே. முதுமை காலத்தில் தந்தையரைப் பாதுகாப்பது ஒவ்வொரு பிள்ளையின் தார்மீகக் கடமையாகும். நாம் குழந்தையாக இருந்தபோது அவர் எப்படி நம் கையைப் பிடித்து நடக்கக் கற்றுக்கொடுத்தாரோ, அதேபோல அவர் தள்ளாடும் காலத்தில் நாம் அவருக்கு ஊன்றுகோலாக இருக்க வேண்டும். அவர்களின் முதுமையை ஒரு சுமையாகக் கருதாமல், அவர்கள் நமக்காகத் தேய்த்த வாழ்நாளுக்கு நாம் செய்யும் நன்றிக்கடனாகக் கருத வேண்டும். தந்தையர் தினக் கொண்டாட்டம் என்பது வெறும் ஒருநாள் சடங்காக இல்லாமல், அவர்களை வாழ்நாள் முழுவதும் மதிப்பதில் தான் இருக்கிறது. ஒரு தந்தை தன் பிள்ளைகளுக்கு விட்டுச் செல்லும் மிகப்பெரிய சொத்து என்பது பணமோ, புகழோ அல்ல; அது அவர் கற்றுக்கொடுத்த ஒழுக்கமும் நேர்மையும் தான். இந்தச் சர்வதேச தந்தையர் தினத்தில், உலகத்தையே தாங்கும் வலிமை கொண்ட அந்த "நிழல் நாயகர்களுக்கு" தலைவணங்குவோம். தந்தையரின் வழிகாட்டுதல் இருக்கும் வரை, எந்த ஒரு பிள்ளையும் வாழ்வின் சவால்களுக்கு அஞ்ச வேண்டிய அவசியமில்லை. இந்தத் தந்தையர் தினத்தில் உங்கள் தந்தையின் கரங்களைப் பற்றி, "அப்பா... என் வாழ்வின் நிஜமான ஹீரோ நீங்கள் தான்!" என்று பெருமையுடன் சொல்லுங்கள்.