கர்தினால் André Vingt-Trois இறைபதம் சேர்ந்தார்

மெரினா ராஜ் – வத்திக்கான்

பிரான்சின், பாரீஸ் உயர்மறைமாவட்ட முன்னாள் பேராயரான கர்தினால் André Vingt-Trois அவர்கள் ஜூலை 18 வெள்ளிக்கிழமை தனது 82-ஆவது வயதில் காலமானார்.

2007 -ஆம் ஆண்டு முதல் 2013-ஆம் ஆண்டு வரை பிரான்ஸ் ஆயர் பேரவையின் தலைவராகவும், 2005-ஆம் ஆண்டு முதல் 2017-ஆம் ஆண்டு வரை பன்னிரண்டு ஆண்டுகள் தலைநகரின் மேய்ப்பாளராகவும் இருந்த கர்தினால் André Vingt-Trois அவர்களுக்கான நினைவுத் திருப்பலியானது பாரீசில் உள்ள நோத்ரே டேம் அன்னை மரியா திருத்தலத்தில் ஜூலை 18 வெள்ளிக்கிழமை மாலை சிறப்பிக்கப்பட்டது.

1942 - ஆம் ஆண்டு நவம்பர் 7, அன்று பாரிஸில் பிறந்து, 1969 - ஆம் ஆண்டில் குருவாக அருள்பொழிவு பெற்ற கர்தினால் அவர்கள், 1988 - ஆம் ஆண்டு தனது மறைமாவட்டத்தின் துணை ஆயராகப் பொறுப்பேற்றார். 1999 - ஆம் ஆண்டு வரை, கர்தினால் பேராயராக இருந்த ஜீன்-மேரி லஸ்டிகர் அவர்களின் வலது கரம் போன்று செயல்பட்டு வந்த கர்தினால் த்ரோயிஸ் அவர்கள், குறிப்பாக பேராயரின் வெளிநாட்டுப் பயணங்களின் போது மறைமாவட்டத்தினை நல்ல முறையில் நிர்வகித்தார்.

1999- ஆம் ஆண்டு விங்ட்-ட்ரோயிஸ் டூர்ஸின் பேராயராகவும், 2005-ஆம் ஆண்டு பிப்ரவரி 11 அன்று திருத்தந்தை புனித இரண்டாம் ஜான் பால் அவர்களால் பாரீசின் பேராயராகவும் உயர்த்தப்பட்டார்.

2007 முதல் 2013 வரை பிரான்ஸ் ஆயர் பேரவையின் தலைவராகவும், 2005-ஆம் ஆண்டு முதல் 2017-ஆம் ஆண்டு வரை பன்னிரண்டு ஆண்டுகள் தலைநகரின் மேய்ப்பாளராகவும் இருந்த கர்தினால் André Vingt-Trois அவர்கள் தனது 75-ஆவது வயதில் பேராயர் பதவியில் இருந்து பணிஓய்வு பெற்றார்.

2007- ஆம் ஆண்டு நவம்பர் 24, அன்று பிரான்சின் புனித லூயிஸ் மறைமாவட்டத்தின் கர்தினால் அருள்பணியாளர் என்ற பட்டத்துடன் திருத்தந்தை 16-ஆம் பெனடிக்ட் அவர்களால் கர்தினாலாக உருவாக்கப்பட்டார். 2009 ஆம் ஆண்டு சிறப்பிக்கப்பட்ட திருத்தூதர் பவுலின் ஆண்டின் போது லெபனானுக்கான தனது சிறப்புத் தூதராக திருத்தந்தை 16-ஆம் பெனடிக்ட் இவரை நியமித்தார்.

மார்ச் 2017 முதல், குய்லைன்-பாரே (Guillain-Barré) என்னும் முடக்குவாத நோய்க்குறியால் பாதிக்கப்பட்ட பிறகு உடல் பலவீனமடைந்த கர்தினால் த்ரோயிஸ் அவர்கள், ஜூலை 18 இறைபதம் சேர்ந்தார்.