சுயநலம் கடந்த சேவைக்கு அழைக்கும் நற்கருணை!
ஜான்சிராணி அருளாந்து - வத்திக்கான்
ஜூன் 07, ஞாயிறன்று, திருத்தந்தை ஸ்பெயின் நாட்டிற்கு மேற்கொண்ட திருத்தூதுப் பயணத்தின் ஒரு நிகழ்வாக மாட்ரிட் நகரின் மையப்பகுதியில் அமைந்துள்ள புகழ்பெற்ற 'பிளாசா டி சிபெலெஸ்' (Plaza de Cibeles) சதுக்கத்தில், கிறிஸ்துவின் திருவுடல் மற்றும் திருஇரத்தப் பெருவிழாவை முன்னிட்டு அங்கு திருப்பலி நிறைவேற்றி நற்கருணை பவனியை வழிநடத்தினார். அத்திருப்பலியின்போது இடம்பெற்ற திருத்தந்தையின் மறையுரை:
அன்பார்ந்த சகோதர, சகோதரிகளே!
ஸ்பெயினுக்கான எனது பயணத்தை நான் தொடங்கும் வேளையில், நாம் கிறிஸ்துவின் திருவுடல், திருஇரத்தப் பெருவிழாவைக் கொண்டாடுவதால் என் இதயம் மட்டற்ற மகிழ்ச்சியால் நிறைந்துள்ளது. நம்மிடையே வாழும் கிறிஸ்துவின் பிரசன்னமாக இருக்கும், விலைமதிப்பற்ற கொடையான நற்கருணையை வழிபட நாம் ஒன்று கூடுகிறோம். அவர் இறைவனின் அன்பால் நம்மை ஆளாக்கி, தந்தை இறைவனுடனான நெருங்கிய உறவுக்குள் நம்மை வழிநடத்தும் வாழ்வின் அப்பமாக விளங்குகிறார்.
நற்கருணை மீதான பக்தி ஸ்பெயினின் விசுவாசத்திலும் வரலாற்றிலும் ஆழமாக வேரூன்றியுள்ளது. பல நூற்றாண்டுகளாக, கிறிஸ்துவின் திருவுடல் திருஇரத்தப் பெருவிழா பவனிகள் இந்த நாட்டின் ஆன்மீக வாழ்வு, கலாச்சாரம் மற்றும் மரபுகளை வடிவமைத்துள்ளன. மலர் விரிப்புகள், திருப்பாடல்கள், பீடங்கள் மற்றும் புனிதமான கொண்டாட்டங்கள் வெறும் அழகின் வெளிப்பாடுகளோ அல்லது நாட்டுப்புறக் கலைகளோ அல்ல; அவை தங்களுக்குள் தொடர்ந்து நடமாடும் உயிர்த்தெழுந்த ஆண்டவர் மீது மக்கள் கொண்டுள்ள விசுவாசத்தின் வாழும் சாட்சியமாகும்.
நற்கருணை பவனியில், கிறிஸ்து தேவாலயத்தின் சுவர்களைத் தாண்டி, தனது மக்களின் வீதிகள், வீடுகள் மற்றும் அன்றாட வாழ்க்கைக்குள் நுழைகிறார். அவர் பலவீனமானவர்களுக்கு ஆறுதலாகவும், நோயாளிகளுக்கு நம்பிக்கையாகவும், துன்பப்படுபவர்களுக்கு அமைதியாகவும், குடும்பங்களுக்கு ஒளியாகவும் வருகிறார். நற்கருணையில் நாம் ஆராதிக்கும் அதே ஆண்டவர் தான், ஏழைகளோடும், மறக்கப்பட்டவர்களோடும், தேவையிலிருப்பவர்களோடும் தன்னை அடையாளப்படுத்திக் கொள்கிறார்.
இந்தக் கொண்டாட்டம், நற்கருணைப் பேழையை நமது வீதிகளின் வழியே சுமந்து செல்வதற்கு மட்டும் நம்மை அழைக்கவில்லை; மாறாக, சுயநலம் மற்றும் அலட்சியத்தைக் கடந்து கிறிஸ்து நம்மை வழிநடத்த அனுமதிப்பதற்கும் அழைப்பு விடுக்கிறது. பாலைவனத்தில் தங்களுக்கு உணவளித்த ஆண்டவரை இஸ்ரயேல் மக்கள் நினைவுகூர்ந்தது போல, நாமும் இறைவனின் உண்மையுள்ள தன்மையை நினைவுகூர அழைக்கப்படுகிறோம். மனித இதயத்தின் ஆழமான பசியைத் தீர்க்க முடியாத சிலைகளைக் கொண்டு, நாம் ஒருபோதும் அவரை இடமாற்றம் செய்துவிடக் கூடாது.
ஸ்பெயினின் ஆன்மீகச் செழுமைமிக்க மத பாரம்பரியம் விசுவாசத்தின் வாழும் பள்ளியாகத் தொடர்ந்து திகழ வேண்டும். அது இறைவனின் முன்னால் மண்டியிடவும், நம் சகோதர சகோதரிகளுக்குச் சேவை செய்யவும், சுயநலமற்ற அன்பைப் பயிற்சி செய்யவும், பொது நலனுக்காக நம்மை அர்ப்பணிக்கவும் நமக்குக் கற்றுக்கொடுக்கிறது.
புதுப்பிக்கப்பட்ட அன்போடு நாம் மீண்டும் கிறிஸ்துவிடம் திரும்புவோம். நற்கருணை நமது இதயங்களின் தாகத்தைத் தணித்து; மற்றவர்களுக்கு அன்பு, அமைதி, நீதி மற்றும் நம்பிக்கையைக் கொண்டு சேர்க்க நமக்கு ஊக்கமளிக்கட்டும். நற்கருணையில் வீற்றிருக்கும் ஆண்டவர் இயேசு, உலகிற்கு வாழ்வளிப்பதற்காக உடைக்கப்பட்டுப் பகிர்ந்துகொள்ளப்படும் அப்பமாக நம்மை மாற்றியமைப்பாராக; இதன் மூலம் அவருடைய அருள் நமது குடும்பங்களையும், நமது சமூகத்தையும், நமது எதிர்காலத்தையும் புதுப்பிக்கட்டும்.
ஆமென்.
இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்.
