திருத்தந்தையை வரவேற்ற மாட்ரிட் கர்தினால்

அபிசேக் ராஜா அலங்காரம் -‌ வத்திக்கான்

மாட்ரிட் நகரின் புகழ்பெற்ற ‘பிளாசா டி லிமா’ மைதானத்தில், ஆயிரக்கணக்கான இளைஞர்கள் பங்கேற்ற எழுச்சிமிகு இரவு செப வழிபாடு நடைபெற்றது. இந்நிகழ்வில், சிறப்பு விருந்தினராகப் பங்கேற்ற திருத்தந்தை பதினான்காம் லியோ அவர்களுக்கு மாட்ரிட் கர்தினால் பேராயர் அவர்கள் நெகிழ்ச்சியான வரவேற்பை அளித்தார். இந்த பிரம்மாண்ட ஒன்றுகூடல், ஸ்பெயின் நாடு முழுவதிலுமிருந்து வந்துள்ள இளைஞர்களை அன்னை திருஅவை எவ்வித பாகுபாடுமின்றி இன்முகத்தோடு வரவேற்று ஒன்றிணைப்பதன் நேரடிப் பிரதிபலிப்பு என்று கர்தினால் பேராயர் தனது வரவேற்புரையில் பெருமிதத்தோடு விவரித்தார்.

"மாட்ரிட்டிலிருந்து விண்ணகத்திற்கு" என்ற ஸ்பெயின் நாட்டின் புகழ்பெற்ற வரலாற்றுச் சொற்றொடரை நினைவுகூர்ந்த கர்தினால் பேராயர், மைதானத்தில் கூடியிருந்த இளைய சமுதாயத்தினர் அனைவரும் தங்கள் பார்வையை விண்ணகத்தை நோக்கி உயர்த்த வேண்டும் என்று அறைகூவல் விடுத்தார்.

இவ்வாறு நமது பார்வையை இறைவனை நோக்கி உயர்த்துவது, வாழ்வில் ஏற்படும் சோர்வுகளை வெல்லவும், திருஅவையில் தூய ஆவியார் ஆற்றிவரும் புதுப்பொலிவான செயல்பாடுகளை அடையாளம் காணவும் உதவும் என்று அவர் சுட்டிக்காட்டினார். குறிப்பாக, ஒவ்வொரு இளைஞரின் இதயத்திற்குள்ளும், “உன் வாழ்வு யாருக்காக?” என்று இயேசு கிறிஸ்து கேட்கும் உன்னத கேள்விக்குச் செவிமடுக்க இதுவே தகுந்த தருணம் என்றும் அவர் தெரிவித்தார்.

தொடர்ந்து பேசிய கர்தினால் பேராயர், இங்கு கூடியிருக்கும் இளைஞர்கள் கிறிஸ்துவையும், அவரது திருஅவையையும், தங்களது வாழ்விற்கு உண்மையான அர்த்தத்தைத் தரும் சகோதரத்துவ உணர்வையும் தேடியே ஓடி வந்துள்ளனர் என்றார். அங்கு கூடியிருந்தோரிடையே, உற்சாகமிக்க தன்னார்வலர்கள், விசுவாசப் பயிற்சியில் இருக்கும் இளைஞர்கள் மட்டுமல்லாமல், பல்வேறு போராட்டங்கள் மற்றும் நம்பிக்கையின் கதைகளைச் சுமந்து நிற்கும் புலம்பெயர்ந்த மக்கள், வறுமை, தனிமை மற்றும் சொல்லொணாத் துன்பங்களை எதிர்கொள்ளும் எளியோரும் கலந்துகொண்டதை அவர் நினைவு கூர்ந்தார். அதேவேளையில், இன்றைய நவீன உலகில் நிலவும் அழுத்தங்கள் காரணமாக, நம்பிக்கை இழந்து தற்கொலையை ஒரு தீர்வாகப் பார்க்கும் அவல நிலைக்குத் தள்ளப்படும் இளைஞர்கள் குறித்து கர்தினால் பேராயர் தனது ஆழ்ந்த கவலையையும் வேதனையையும் பதிவு செய்தார்.

நிகழ்வின் நிறைவாக திருத்தந்தையின் உலகளாவிய தலைமைத்துவத்தைப் பாராட்டிப் பேசிய கர்தினால் பேராயர் அவர்கள், "இளைஞர்களோடு இணைந்து பயணிப்பது, துடிப்புள்ள விசுவாச சமூகங்களை உருவாக்குவது, இளையோர் தங்களின் இறை அழைத்தலைக் கண்டறிய ஊக்கமளிப்பது, மற்றும் மறைப்பணிக்கான புதிய வழிகளைத் திறப்பது எனப் பல தளங்களில் அகில உலகத் திருஅவை திருத்தந்தையின் ஆலோசனைகளையும் ஆவியானவரின் வழிகாட்டலையும் ஆவலோடு எதிர்நோக்கியுள்ளது" என்று பறைசாற்றினார்.

இளைஞர்களின் விசுவாச நம்பிக்கையை உறுதிப்படுத்தியதற்கும், திருஅவையை தூய ஆவியார் தொடர்ந்து வழிநடத்துகிறார் என்பதை உலகிற்கு நினைவூட்டியதற்கும் திருத்தந்தை பதினான்காம் லியோ அவர்களுக்கு அவர் தனது நெஞ்சார்ந்த நன்றியைச் சமர்ப்பித்தார்.

"கிறிஸ்துவுடனும் உங்களோடும், திருஅவையுடனும்: மாட்ரிட்டிலிருந்து விண்ணகத்திற்கு!" என்ற வரலாற்றுச் சிறப்புமிக்க முழக்கத்தோடு கர்தினால் பேராயர் தனது உரையை நிறைவு செய்தார்.