மாமா முக்சிமா: இதயத்தின் அன்னை வழங்கும் அமைதி

ஜான்சிராணி அருளாந்து - வத்திக்கான்

ஏப்ரல் 19, ஞாயிறன்று, ஆப்பிரிக்க நாடுகளுக்கான திருத்தூதுப் பயணத்தின் ஒரு பகுதியாக, அங்கோலா நாட்டில் உள்ள முக்சிமா (Muxima) அன்னை மரியா திருத்தலத்தின் முன்புறம் அமைந்துள்ள திறந்தவெளியில் "புனித செபமாலை" வழிபாட்டு நிகழ்வு நடைபெற்றது. இந்நிகழ்வின்போது திருத்தந்தை பதினான்காம் லியோ அவர்கள் ஆற்றிய உரை: 

அன்பிற்குரிய சகோதர சகோதரிகளே,

அன்பு இளைஞர்களே, மரியாயின் சேனை உறுப்பினர்களே, மற்றும் இதயத்தின் அன்னையான மாமா முக்சிமாவின் (Mama Muxima) பக்தர்களே, உங்களோடு சேர்ந்து அன்னையைப் புகழும் இந்த மகிழ்ச்சியான தருணத்தை எண்ணி நான் பெருமகிழ்ச்சி அடைகிறேன்.

நாம் அனைவரும் இணைந்து புனித செபமாலையைச் செபித்திருக்கிறோம்; இது திருஅவையில் உருவான, அனைவரும் செபிக்கக்கூடிய ஒரு பழமையான மற்றும் எளிமையான பக்திமுயற்சியாகும். புனித இரண்டாம் ஜான் பால் அவர்கள் இதனை, "தொடக்ககாலக் கிறிஸ்தவத்தின் புத்துணர்ச்சியைப் பாதுகாக்கும் செபம்" என்றும், "கிறிஸ்துவை உலகின் ஆண்டவராகவும் மீட்பராகவும் பறைசாற்றுவதற்கு இறைவனின் தூண்டுதலால் உருவான ஒரு வலிமையான செபம் என்றும் விவரித்துள்ளார். அங்கோலாவின் வாழும் மற்றும் இளமைத் துடிப்புள்ள திருஅவையாகிய உங்கள் அனைவரையும் பார்த்து, இந்த ஆழமான நம்பிக்கைத் தருணத்தைப் பகிர்ந்துகொள்ளும்போது, அந்த வார்த்தைகள் மிகவும் பொருத்தமானவையாகத் தோன்றுகின்றன. இங்கே, நம்பிக்கையின் புத்துணர்ச்சியையும் தூய ஆவியாரின் வல்லமையையும் ஒருவரால் உண்மையாகவே உணர முடிகிறது.

நம்பிக்கையின் சங்கமம்: வரலாறும் வாழ்வும்

பல நூற்றாண்டுகளாக, இந்த நாட்டின் வரலாற்றில் மகிழ்ச்சியான மற்றும் வேதனையான தருணங்களில் பல ஆண்களும் பெண்களும் மன்றாடிய ஒரு திருத்தலத்தில் நாம் இப்போது கூடியிருக்கிறோம். இங்கே, மாமா முக்சிமா எனப்படும் இதயத்தின் அன்னை திருஅவையின் இதயத்துடிப்பை அமைதியாக உயிர்ப்புடன் வைத்திருக்கிறார். அந்த இதயம், உங்கள் இதயங்களாலும், இன்னும் அன்பு செய்து, செபித்து, கொண்டாடி, அழுது, தொலைதூரத்தில் இருந்துகூடத் தங்கள் நம்பிக்கைகளையும் விண்ணப்பங்களையும் கடிதங்கள் மற்றும் செய்திகள் வழியாக ஒப்படைக்கின்ற எண்ணற்ற மக்களின் இதயங்களாலும் உருவானது. இதயத்தின் அன்னை அனைவரையும் வரவேற்கிறார், அனைவருக்கும் செவிசாய்க்கிறார், மேலும் அனைவருக்காகவும் செபிக்கிறார். இயேசுவின் வாழ்வின் மகிமை மறைஉண்மைகளை நாம் தியானித்தோம்; அவருடைய மகிமையில் நமது இலக்கையும், அவருடைய அன்பில் நமது பணியையும் நாம் காண்கிறோம். கிறிஸ்து தமது உயிர்ப்பின் வழியாக சாவினை வென்று, தந்தையிடம் செல்வதற்கான வழியை நமக்குக் காட்டினார். நாம் இந்த வழியில் நடக்கவும், அதன் அழகை உலகத்தோடு பகிர்ந்து கொள்ளவும் உதவுவதற்காக, அவர் நமக்குத் தூய ஆவியாரை அளித்துள்ளார்; அவரே நம்மை வழிநடத்தி வலுப்படுத்துகிறார். மரியன்னையைப் போலவே நாமும் விண்ணகத்திற்காகப் படைக்கப்பட்டவர்கள்; அவரைப் புனித வாழ்விற்கு ஒரு முன்மாதிரியாகக் கொண்டு, உயிர்த்த கிறிஸ்துவின் ஒளியைப் பிறருக்குக் கொண்டு செல்லும் வேளையில், நாம் மகிழ்ச்சியோடு விண்ணகம் நோக்கிப் பயணம் செய்கிறோம்.

இதயத்தின் அன்னை: ஞானமும் உலகளாவிய அன்பும்

அமல உற்பவ அன்னைக்கு அர்ப்பணிக்கப்பட்ட இந்தத் திருத்தலம், நம்பிக்கையாளர்களால் அன்போடு "இதயத்தின் அன்னை" திருத்தலம் என்று மறுபெயரிடப்பட்டுள்ளது. இந்த அழகான திருப்பெயர் மரியாளின் இதயத்தை நமக்கு நினைவுபடுத்துகிறது. தூய்மையான மற்றும் ஞானமிக்க அந்த இதயம், தன் மகனின் வாழ்வின் மறைபொருட்களைப் பொக்கிஷமாகப் பாதுகாத்து தியானிக்கும் வல்லமை கொண்டது. நாம் இணைந்து செபித்ததன் வழியாக, மரியாளுடன் இயேசுவின் வாழ்வின் வழியாகப் பயணம் செய்து, அவரைப் போலவே ஒரு உலகளாவிய அன்பை நமக்குள்ளே வளர்த்துக்கொண்டு, அதே செயலைச் செய்திருக்கிறோம்.

செபமாலை செபிப்பது என்பது, ஒவ்வொருவரையும் ஒரு தாயின் இதயத்தோடு உண்மையாகவும் தாராள மனதோடும் அன்பு செய்யவும், ஒருவருக்கொருவர், குறிப்பாக ஏழைகள் மீது அக்கறை காட்டவும் நம்மை அழைக்கிறது. ஒரு தாய் தனது பிள்ளைகளுக்கு இடையே வேறுபாடுகள் இருந்தபோதிலும், அவர்கள் அனைவரையும் சமமாக அன்பு செய்கிறார். இந்த இதயத்தின் அன்னையின் முன்னிலையில், நாமும் அதையே செய்வோம் என்று நமது உறுதியை மீண்டும் புதுப்பிப்போம். எவருக்கும் அன்போ அல்லது வாழ்வின் அத்தியாவசியத் தேவைகளோ குறைவுபடாமல் இருப்பதை உறுதி செய்வோம்; பசித்திருப்பவர்களுக்கு உணவளிப்போம், நோயுற்றவர்களைப் பராமரிப்போம், குழந்தைகளுக்குக் கல்வி கிடைப்பதை உறுதி செய்வோம், முதியவர்கள் மாண்புடனும் அமைதியுடனும் வாழ்வதை உறுதி செய்வோம். அன்னை மரியா இவை அனைத்தையும் குறித்துச் சிந்திக்கிறார், மேலும் தனது இந்த அக்கறையில் நம்மையும் பங்குபெற அழைக்கிறார்.

இளைஞர்களுக்கான அழைப்பு: புதிய உலகைக் கட்டியெழுப்புதல்

அன்பு இளைஞர்களே, மரியாயின் சேனை உறுப்பினர்களே, அன்னை மரியா தனது இதயத்தில் பங்குபெறவும், நீதியைக் கட்டியெழுப்புபவர்களாகவும் அமைதியைத் தாங்கிச் செல்பவர்களாகவும் மாறவும் நம்மை அழைக்கிறார். திருப்பயணிகளை வரவேற்பதற்காக ஒரு புதிய திருத்தலத்தைக் கட்டியெழுப்பும் ஒரு மாபெரும் திட்டம் இங்கே நடைபெற்று வருகிறது. இது உங்களுக்கு ஒரு அடையாளமாக இருக்கட்டும்: உங்களிடமும் ஒரு மாபெரும் பணி ஒப்படைக்கப்பட்டுள்ளது. போர், அநீதி, வறுமை மற்றும் நேர்மையின்மை இல்லாத நற்செய்தியின் விழுமியங்கள் இதயங்களையும் சமூகங்களையும் உருவாக்குகின்ற ஒரு சிறந்த உலகைக் கட்டியெழுப்புவதே அந்தப் பணியாகும். போர் அல்ல, அன்பே வெற்றி பெற வேண்டும். அனைவருக்குமே தாயான மரியாளின் இதயம் நமக்கு இதையே கற்பிக்கிறது. நாம் சந்திக்கும் ஒவ்வொருவருக்கும் அன்னையின் கனிவையும் இறைவனின் ஆசீரையும் கொண்டு செல்லும் வாழ்வின் தூதுவர்களாக இந்தத் திருத்தலத்திலிருந்து புறப்படுவோம். "மாமா முக்சிமா, நாங்கள் அனைத்தையும் உம்மிடம் ஒப்படைக்கவும், உம்முடைய ஆசீரைப் பெறவும் உம்மிடம் வருகிறோம்." இந்த வார்த்தைகளோடு, நாம் நம்மையே மரியன்னையிடம் ஒப்படைப்போம், நம் சகோதர சகோதரிகளுக்காக நம்மை அர்ப்பணிப்போம், மேலும் ஆண்டவருடைய ஆசிரை மகிழ்ச்சியுடன் பெற்று, அதனை அனைவருக்கும் கொண்டு செல்வோம். ஆமென்.