ஆயர்களுக்கான திருப்பீடத்துறையின் உறுப்பினராக சகோதரி சிமோனா நியமனம்

செல்வராஜ் சூசைமாணிக்கம் - வத்திக்கான்

பிப்ரவரி 14, சனிக்கிழமையன்று, திருத்தந்தை பதினான்காம் லியோ அவர்கள், அருள்சகோதரி சிமோனா பிரம்பில்லா அவர்களை, ஆயர்களுக்கான திருப்பீடத்துறையின் புதிய உறுப்பினராக நியமித்துள்ளதாக திருப்பீடச் செய்தித் தொடர்பகம் தெரிவித்துள்ளது.

வரும் மார்ச் 27-ஆம் தேதியன்று, 61 வயதை எட்டும் இத்தாலிய வம்சாவளியைச் சேர்ந்த ஆறுதல் அன்னையின் மறைப்பணியாளர்கள் (IMC) சபையைச் சேர்ந்த அருள்சகோதரி சிமோனா பிரம்பில்லா அவர்கள், தற்போது அர்ப்பணிக்கப்பட்ட வாழ்வு மற்றும் அப்போஸ்தலிக்க வாழ்வுச் சங்கங்களுக்கான தலைமைத் தலைவராகப் பணியாற்றுகிறார். கடந்த 2025-ஆம் ஆண்டு ஜனவரி மாதம் முதல் இந்தப் பொறுப்பை அவர் வகித்து வருகிறார்.

இந்தப் புதிய நியமனத்தின் மூலம், அருள்சகோதரி பிரம்பில்லா அவர்கள், திருப்பீடத் துறையில் உள்ள மற்ற இரண்டு பெண்களுடன் அதாவது, வத்திக்கான் நகர நிர்வாகத் தலைவர் அருள்சகோதரி இரஃபயெல்லா பெத்ரினி மற்றும் உலகக் கத்தோலிக்கப் பெண்கள் அமைப்புகள் ஒன்றியத்தின் முன்னாள் தலைவர் மரியா லியா செர்வினோவுடன் இணைகிறார்.

இவர்கள் இருவரும் முதன்முதலில் 2022-ஆம் ஆண்டு ஜூலை மாதத்தில் முன்னாள் திருத்தந்தை பிரான்சிஸ் அவர்களால் நியமிக்கப்பட்டனர், இன்று திருத்தந்தை பதினான்காம் லியோ அவர்களால் உறுதிப்படுத்தப்பட்டுள்ளனர்

கத்தோலிக்கத் திருஅவையின் தலைமைத்துவம் மற்றும் மேய்ப்புப் பணி மேற்பார்வைக்குப் பங்களிப்பதில் பெண்களின் வளர்ந்து வரும் பங்களிப்பை அருள் சகோதரி பிரம்பில்லா அவர்களின் இந்தப் புதிய நியமனம்  எடுத்துக்காட்டுகிறது.

மறைமாவட்ட மற்றும் பட்டம்சார் ஆயர்கள், அப்போஸ்தலிக்க நிர்வாகிகள் மற்றும் குறிப்பிட்ட வழிபாட்டுமுறை திருஅவைகளின் நிர்வாகம் தொடர்பான விடயங்களுக்கு ஆயர்களுக்கான திருப்பீடத்துறை பொறுப்பாக உள்ளது.