அமெரிக்காவின் 250-வது ஆண்டு நிறைவு: நாட்டு ஒற்றுமைக்காக நவநாள் ஜெபம்
ஜான்சிராணி அருளாந்து - வத்திக்கான்
அமெரிக்கா தனது 250-வது ஆண்டு நிறைவை கொண்டாடும் வேளையில், விஸ்கான்சினில் உள்ள 'அவர் லேடி ஆஃப் சேம்பியன்' (Our Lady of Champion) தேசிய திருத்தலம், இறைவேண்டல், தியானம் மற்றும் புனிதர்களின் சாட்சிய வாழ்வு ஆகியவற்றின் மூலம் இந்த நிகழ்வைக் கொண்டாடுமாறு அமெரிக்க மக்களுக்கு அழைப்பு விடுத்துள்ளது.
இத்திருத்தலத்தின் அதிபரான அருட்பணி. ஆண்டனி ஸ்டீபன்ஸ் அவர்கள் (CPM), ஒற்றுமை, தூய்மை மற்றும் நாட்டின் மறுமலர்ச்சிக்காக அன்னை மரியாவின் பரிந்துரையை வேண்டி, ஜூலை 1 முதல் 9 வரை "ஒன்பது நாள் நவநாள்" (Novena for Our Nation) ஜெபத்தைத் தொடங்கியுள்ளார். நாடு முழுவதும் மக்கள் இதில் பங்கேற்பதை ஊக்குவிக்கும் வகையில் 50,000-க்கும் மேற்பட்ட ஜெப அட்டைகள் விநியோகிக்கப்பட்டுள்ளன.
இந்த 250-வது ஆண்டு நிறைவை நினைவுகூரும் வகையில், இத்திருத்தலம் "அமெரிக்காவின் கத்தோலிக்க புனிதர்கள்" (Catholic Saints of America) என்ற தனித்துவமான கண்காட்சி ஒன்றையும் நடத்துகிறது. இது அமெரிக்கா முழுவதிலும் உள்ள 76 திருத்தலங்களில் இருந்து படங்கள், புனிதப் பண்டங்கள் (relics) மற்றும் தகவல்களை ஒன்றிணைத்து நடத்தப்படுகிறது. இக்கண்காட்சி அமெரிக்காவின் புனிதர்கள், அருளாளர்கள், வணக்கத்திற்குரியவர்கள் மற்றும் இறை ஊழியர்களின் வாழ்க்கையை எடுத்துக்காட்டுவதுடன், நாட்டின் வரலாற்றில் கத்தோலிக்கர்களின் வளமான பங்களிப்பையும் வெளிப்படுத்துகிறது.
1859-ஆம் ஆண்டு அடீல் ப்ரைஸ் (Adele Brise) என்பவருக்கு அன்னை மரியா காட்சியளித்த, அமெரிக்காவின் முதலாவதும் மற்றும் அதிகாரப்பூர்வமாக அங்கீகரிக்கப்பட்டதுமான ஒரே மரியன்னை காட்சி தளத்தில் அமைந்துள்ள இத்திருத்தலம், போதனை மற்றும் நற்செய்தி அறிவிப்புப் பணிகளைத் தொடர்ந்து ஆற்றி வருகிறது.
புனிதத்தன்மைக்கான பொதுவான அழைப்பை வலியுறுத்தும் வகையில் அமைந்துள்ள இக்கண்காட்சியில், புனிதர் கேத்தரின் ட்ரெக்செல் (St. Katharine Drexel), புனிதர் பிரான்சிஸ் சேவியர் கப்ரினி (St. Frances Xavier Cabrini), புனிதர் கத்தேரி தேகக்விதா (St. Kateri Tekakwitha), அருளாளர் ஸ்டான்லி ரோதர் (Blessed Stanley Rother)
மற்றும் அருளாளர் மைக்கேல் மெக்கினி (Blessed Michael McGivney) உள்ளிட்ட பல்வேறு பின்னணிகளைக் கொண்ட புனிதமான ஆண்களும் பெண்களும் இடம்பெற்றுள்ளனர்.
கத்தோலிக்க விசுவாசத்தின் மீது மக்களிடையே ஆர்வம் அதிகரித்து வருவதாகவும், திருஅவைக்குத் திரும்புபவர்கள் மற்றும் கத்தோலிக்க மதத்தைத் தழுவுபவர்களின் எண்ணிக்கை அதிகரித்து வருவதாகவும் அருட்பணி. ஸ்டீபன்ஸ் தெரிவித்தார். மேலும், நாட்டின் இந்த மைல்கல் ஆண்டை வெறும் கொண்டாட்டங்களாக மட்டுமில்லாமல், இறைவேண்டல், விசுவாசம் மற்றும் இறைவனுக்குச் செலுத்தும் நன்றியுணர்வோடு கொண்டாடுமாறு அனைவரையும் ஊக்குவித்தார்.
இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்.
