நேர்காணல்
நிகழ்ச்சித் தொகுப்பாளர்
இனிய இதயங்கள் அனைவருக்கும் அன்பு வணக்கங்கள்.
நாம் பல்வேறு நிகழ்ச்சிகள் வாயிலாக ஆன்மீக வளர்ச்சியின் பல பரிமாணங்களை அறிந்து வருகிறோம். அந்த வரிசையில், இன்றைய சிறப்பு அமர்வில் "மறைக்கல்வி என்றால் என்ன? மறைக்கல்வி கற்பிப்பது ஏன் அவசியம்? மறைக்கல்வி ஒரு குழந்தையின் மற்றும் ஒவ்வொரு கிறிஸ்தவரின் இறைநம்பிக்கையை எவ்வாறு வளர்க்கிறது?" போன்ற முக்கியமான கேள்விகளுக்கான விளக்கங்களைப் பகிர்ந்து கொள்ள நம்மிடையே அருட்தந்தை மேரி ஜான் அவர்கள் வருகை தந்துள்ளார். அருட்தந்தை அவர்களை அன்புடன் வரவேற்கிறோம்.
வணக்கம் தந்தையே!
உங்களை இந்த அருமையான அமர்வில் சந்திப்பதில் நான் மிகுந்த மகிழ்ச்சி அடைகிறேன். குறிப்பாக, தற்போது தமிழக மறைக்கல்வி வகுப்புகளுக்கான பாடநூல்களைத் தயாரிக்கும் முக்கியப் பணியில் நீங்கள் ஈடுபட்டு வருகிறீர்கள் என்பதை அறிந்து மகிழ்ச்சி அடைந்தேன். நம்மில் பலர் சிறுவயதிலிருந்தே மறைக்கல்வி பயின்றிருக்கிறோம். அருள்சகோதரிகள், அருள்பணியாளர்கள், இறைமக்கள் என பலரும் மறைக்கல்வியை அறிந்தவர்கள்தான். ஆனால், மறைக்கல்வி என்றால் என்ன? அதன் உண்மையான நோக்கம் என்ன? இன்றைய தலைமுறையினருக்கு அதை எவ்வாறு கற்பிக்க வேண்டும்? என்பன போன்ற கேள்விகளுக்கு ஆழமான விளக்கங்களைப் பெற வேண்டிய தேவை இன்று அதிகமாக உள்ளது. அந்த வகையில், இன்றைய இந்த அமர்வு அனைவருக்கும் பயனுள்ள ஒன்றாக இருக்கும் என்று நம்புகிறேன்.
மீண்டும் ஒருமுறை தங்களை அன்புடன் வரவேற்கிறேன்.
அருட்தந்தை மேரி ஜான்
"மறைக்கல்வி என்றால் என்ன?" என்பது சுருக்கமான கேள்வியாக இருந்தாலும், அதற்கான பதில் மிகவும் ஆழமானது. அதை மூன்று நிலைகளில் புரிந்துகொள்ளலாம்.
முதலாவதாக, மறைக்கல்வி என்பது இறைநம்பிக்கைப் பயிற்சி.
ஒரு மனிதருக்கு இறைநம்பிக்கை திடீரென உருவாகிவிடுவதில்லை. ஒரு குழந்தை முதலில் தனது தாயை நம்புகிறது. பின்னர் தந்தை, குடும்பத்தினர், தன்னுடன் வாழ்பவர்கள் ஆகியோர்மீது நம்பிக்கை வளர்கிறது. அதன் பிறகு தன்னம்பிக்கை உருவாகிறது. தொடர்ந்து பிற மனிதர்கள், இயற்கை மற்றும் உலகத்தின் மீது நம்பிக்கை வளர்கிறது. இந்த எல்லா நம்பிக்கைகளின் உச்சமாகவே கடவுள் நம்பிக்கை அமைகிறது. மனித உறவுகளில் நம்பிக்கை வளராமல் இறைநம்பிக்கை முழுமையாக வளர்வது கடினம். அதனால், மறைக்கல்வி என்பது அன்றாட வாழ்க்கை அனுபவங்களின் வழியாக இறைநம்பிக்கையை உருவாக்கி, அதை வளர்த்து, முதிர்ச்சியடையச் செய்யும் பயிற்சியாகும். ஒரு குழந்தைக்கு அன்பு, பாதுகாப்பு, அரவணைப்பு போன்ற அனுபவங்கள் கிடைக்கும்போது, அதன் உள்ளத்தில் அடிப்படை நம்பிக்கை உருவாகிறது. அதுவே பின்னர் இறைநம்பிக்கைக்கான அடித்தளமாக அமைகிறது. அடுத்த நிலையில், முறையாக நடைபெறும் மறைக்கல்வி வகுப்புகள், ஆசிரியர்கள், பாடத்திட்டங்கள், திருச்சபையின் போதனைகள் ஆகியவற்றின் மூலம் அந்த நம்பிக்கை மேலும் வளர்க்கப்படுகிறது. மறைக்கல்வியின் முக்கிய நோக்கம், இறைநம்பிக்கையை உருவாக்கி, அதை முதிர்ச்சியடைந்த வாழ்வாக மாற்றுவதே.
இரண்டாவதாக, மறைக்கல்வி என்பது இறைவார்த்தைப் பணியாகும்.
இறைவார்த்தை என்பது திருவிவிலியத்தில் மட்டும் அடங்கிய ஒன்றல்ல. இறைவன் இன்றும் மனிதர்களின் வாழ்க்கை அனுபவங்கள் வழியாகப் பேசிக்கொண்டே இருக்கிறார். ஒரு சிறிய உதாரணத்தைப் பாருங்கள். மிகுந்த வறுமையில் வாழும் ஒரு தாய் எப்போதும் கவலையுடன் இருப்பார். அப்போது அவரது பத்து வயது மகன், "அம்மா, கவலைப்படாதீர்கள். நான் வளர்ந்து உங்களை நன்றாகப் பார்த்துக்கொள்வேன்" என்று சொல்கிறான். அந்த வார்த்தைகள் அந்தத் தாய்க்கு இறைவனின் ஆறுதலாக மாறுகின்றன. எனவே, ஒவ்வொரு மனிதரும் தங்கள் வாழ்க்கை வழியாக இறைவார்த்தையை வெளிப்படுத்த முடியும். அந்த வாழ்க்கையை உருவாக்கும் பயிற்சியே மறைக்கல்வியாகும்.
மூன்றாவதாக, மறைக்கல்வி என்பது திருஅவையின் இயல்பான பணியாகும்.
இது திருஅவைக்கு வெளியிலிருந்து சேர்க்கப்பட்ட ஒரு திட்டமல்ல. மனிதன் பிறந்தவுடன் மூச்சுவிடுவது எவ்வளவு இயல்பானதோ, அதுபோலவே திருஅவைக்கு மறைக்கல்வி வழங்குவதும் இயல்பான பணியாகும். மறைக்கல்வி இல்லாமல் திருஅவை தனது பணி நிறைவை அடைய முடியாது. நற்செய்தி அறிவித்தல், இறைநம்பிக்கையை வளர்த்தல், கிறிஸ்தவ வாழ்வில் மக்களை முதிர்ச்சியடையச் செய்தல் ஆகிய அனைத்திற்கும் மறைக்கல்வி அடிப்படையாக விளங்குகிறது.
நிகழ்ச்சித் தொகுப்பாளர்
மிக்க நன்றி, தந்தையே. மறைக்கல்வி என்பது வெறும் பாடமாக அல்ல, முதலில் மனிதர்கள்மீது நம்பிக்கை, பின்னர் தன்னம்பிக்கை, அதன் பின் இயற்கை மீதான நம்பிக்கை ஆகியவற்றின் வழியாக வளர்ந்து, இறுதியில் கடவுள் மீதான ஆழ்ந்த இறைநம்பிக்கையாக மலர்கிறது என்பதை மிகத் தெளிவாக எடுத்துரைத்தீர்கள். மேலும், மறைக்கல்வி என்பது திருஅவையிலிருந்து பிரிந்து நிற்கும் ஒரு பணியல்ல; மாறாக, திருஅவையின் இயல்பான மற்றும் இன்றியமையாத பணியாகும் என்பதையும் அழகாக விளக்கினீர்கள். இந்த அருமையான சிந்தனைகளை எங்களுடன் பகிர்ந்து கொண்டதற்கு உங்களுக்கு மனமார்ந்த நன்றியைத் தெரிவித்துக்கொள்கிறோம். அடுத்த பகுதியில், இன்றைய தலைமுறையினருக்கு மறைக்கல்வியை எவ்வாறு பயனுள்ள முறையில் கற்பிக்கலாம்? என்ற கேள்வியுடன் நமது உரையாடலைத் தொடரலாம்.
நன்றி
இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்.
