Kard.Radcliffe:Kufundisha imani kunahitaji kukumbatia maswali ambayo hakuna majibu ya haraka

Na Angella Rwezaula, - Vatican.

Mafundisho mazuri ni tunda la moyo huu uliogawanyika. Hii ndiyo nafasi ambayo Sinodi ilichukua umbo, ikijipanda yenyewe katikati ya mvutano huu kati ya ukweli wa imani yetu na ukweli wa maisha magumu ya watu. Papa Francisko alitangaza kwamba Hati ya Mwisho ya Sinodi "inashiriki katika Majisterio ya kawaida ya Mrithi wa Petro (taz. EC 18 § 1; CCC 892) na kwa hivyo inaomba ikubaliwe. Inawakilisha aina ya utekelezaji wa mafundisho halisi ya Askofu wa Roma." Mamlaka yake yanatokana na uaminifu huu wa pande mbili: kwa Injili na kwa matumaini na mateso ya watu wa Mungu.

Ni katika nafasi hii ambapo kukutana na Mungu hutokea, kwani Mungu anakaa katika nafasi kati ya mabawa ya makerubi juu ya Sanduku la Agano. Au katika nafasi tupu ya kaburi la asubuhi ya Pasaka. Kiini cha mafundisho yetu ni mtu aliyetundikwa kati ya mbingu na dunia msalabani, ambaye maneno yake ya mwisho, kulingana na Injili za Marko na Mathayo, yalikuwa swali. Hii ndiyo nafasi ambayo sisi makuhani tunayo kama walimu. Ni msimamo mgumu, kwa sababu wengine wanataka uwazi ambao unaweza kutuzuia kutambua uwepo wa Mungu katika mapambano yetu ya kila siku, huku wengine wakipuuza mafundisho ya Kanisa kama yasiyo na maana au yaliyopitwa na wakati. Wengine wanadai kujua kila kitu kwa uhakika unaosumbua, huku wengine wakiangushwa na shaka.

Ninakumbushwa maneno ya mshairi wa Ireland W.B. Yeats, yaliyoandikwa baada ya Vita vya Kwanza vya Dunia vilivyoangamiza Ubelgiji: "Wenye ubora hawana imani yote, wabaya zaidi / wamejaa nguvu ya shauku." Kwa hivyo, tunapaswaje kupata mvutano huu na kufundisha imani? Kwanza kabisa, kwa huruma. Katika Injili, mafundisho ya Yesu yalikuwa kitendo cha huruma. Marko anatuambia kwamba kabla ya kuzidisha mikate kwa ajili ya wale elfu tano, Yesu aliona umati mkubwa na "akawahurumia, kwa sababu walikuwa kama kondoo wasio na mchungaji; akaanza kuwafundisha mambo mengi" (Mk 6:34). Mafundisho yenye huruma huwalisha. Kulingana na utamaduni wa Kikatoliki, kufundisha ni kitendo cha huruma ya kiroho. Mafundisho na mahubiri yote hutokana na huruma kwa maisha na uzoefu wa watu.

Mwalimu mpya Mdominikani kutoka jimbo langu alisema katika karne moja iliyopita kuwa: "Wapende wale unaowahubiria. Usipowapenda, usiwahubirie; jihubirie mwenyewe." Tutakuwa walimu wazuri tu ikiwa tutafungua mioyo yetu kwa kila kitu ambacho wengine wanapitia. Lazima, kwa namna fulani, tuwe mmoja wao, tukijua kuchanganyikiwa na kushindwa kwao kutoka ndani, kama vile Mungu amekuwa mmoja wetu, "kama sisi katika mambo yote isipokuwa dhambi." Kukaa mahali hapo kati ya mwamba na mahali pagumu, kati ya mafundisho ya Kanisa na maisha ya watu wetu, kunamaanisha kufanya maswali ya washiriki wake kuwa yetu wenyewe. Hatupaswi kufikiria kwamba kufundisha ni kutoa majibu tu kwa maswali ya wengine.

Tayari nimetaja tukio la Askofu mkuu ambaye alishauri kundi la Wadominikani wapya kusoma Summa of Thomas,  yaani (Muhtasari wa Taaalimungu wa Mtakatifu Thomas), kwa sababu ilitoa majibu 56,000 kwa kila swali ambalo wangekutana nalo. Nami narudia: Mtakatifu Thomas angeshtushwa! Kufundisha huanza tunapothubutu kukumbatia maswali yanayowaka mioyoni mwa watu na kuyafanya kwa namna fulani kuwa yetu wenyewe, katika sala na tafakari. Tomáš Halík anasema kwamba wito mgumu wa Mtakatifu Thérèse wa Lisieux ulikuwa kujiunga na wasioamini Mungu.

Ufaransa ya Karne ya Kumi na Tisa(XIX) ilijaa upingaji mkali wa kidini na ukanaji Mungu, lakini huo ndio ulikuwa ulimwengu wake. Halík alibainisha: “Teresa anatangaza kwamba anahisi wasioamini Mungu kama ndugu, ambao sasa anakaa nao meza moja na kula mkate mmoja, na anamwomba Mungu asimfukuze kutoka meza hiyo.” Alitaka kusimama kwa mshikamano na wale wasioamini, kunywa kikombe chao cha mateso, kushiriki maswali yao huku wakimwomba Mungu. Hapo ndipo mafundisho ya huruma ya kweli yanapoanza. Kufundisha kunahitaji, bila kushindwa, kukumbatia maswali ambayo hakuna majibu ya haraka.

Asante kwa kusoma makala yetu. Unaweza kuendelea kupata habari mpya kwa kujisajili kwa jarida letu la kila siku: Just click here