Lebanon,Padre Pierre El Raii, Paroko wa Qlayaa aliuawa
Na Giada Aquilino – Vatican.
Shambulio baya lilitokea tarehe 9 Machi saa 8:00 mchana kwa saa za Beirut, saa 7:00 mchana za Roma, Juma moja tu baada ya kuanza kwa mabomu ya Israeli nchini Lebanon. Eneo lililoathiriwa tena ni sehemu ya kusini ya nchi ya mierezi. "Tumegundua tu kwamba tumempoteza Padre Pierre El Raii, Padre wa Parokia ya Maronite ya Qlayaa," Padre Toufic Bou Merhi, Mfransiskani na Msimamizi wa Nchi Takatifu, na Paroko wa Parokia ya Walatini kusini mwa Lebanon, katika Jumuiya za Tyre na Deirmimas, anatuambia kwa simu, bado akiwa katika mshtuko.
"Kulikuwa na shambulio la kwanza, ambalo liligonga nyumba karibu na parokia yake, milimani, na kumjeruhi mmoja wa waamini wa Parokia," Mfransiskani huyo aliviambia vyombo vya habari vya Vatican. "Padre Pierre alikimbia na vijana wengine kadhaa kumsaidia muumini wa parokia: Hapo ndipo kulipotokea shambulio jingine, bomu jingine kwenye nyumba hiyo hiyo. Padre wa Parokia alijeruhiwa. Alipelekwa hospitali ya eneo hilo, lakini hakufanikiwa. Alifariki karibu mlangoni mwa hospitali. Alikuwa na umri wa miaka hamsini tu." Simulizi la Padre Toufic ni la kusisimua, la kukatisha tamaa, na la kihisia. Kwanza anakumbuka jinsi Padre aliyepotea alivyokuwa "msaada wa kweli wa Wakristo katika eneo hilo," daima akiwa kando yao, hasa walipobaki katika nchi hiyo, wakati wa maonyo ya mara kwa mara ya kuhamishwa kutoka jeshi la Israeli.
Maumivu ya Jumuiya ya Wakatoliki
Sasa, anaripoti, ni wakati wa huzuni kwa jumuiya nzima ya Wakatoliki. "Wanalia juu ya msiba huo na wakati huo huo wanaogopa sana. Hadi sasa, watu wamekataa kuondoka katika nyumba zao katika vijiji vya Wakristo, lakini katika hali hii, kila kitu kimebadilika. Kuondoka nyumbani kunamaanisha kwenda kuishi mitaani au kujaribu kukodisha mahali pengine, lakini watu hawawezi kumudu, pia kutokana na hali ya kiuchumi ambayo nchi ilikuwa tayari inapitia." Juma lililopita, Padre Toufic, anakumbuka, "nyumba ya Padre mwingine pia iliathiriwa moja kwa moja: watu walipinga wakati huo, lakini sasa, kwa kifo cha Padre Pierre, sijui wanaweza kuendelea kwa muda gani."
Kukata tamaa kwa waliohamishwa
Dharura nchini imeenea. "Katika nyumba yetu ya watawa huko Tyre," anaripoti, "tuna watu 200 waliohamishwa, wote ni Waislamu, tunawakaribisha. Wale wanaohitaji makazi wanaweza kuyapata wapi katika hali hii?" "Tuna watu 500,000 waliotoka majumbani mwao huko Beirut pekee. Karibu watu 300,000 wameondoka kusini mwa Lebanon na wametawanyika katika maeneo ya kusini yanayoonekana kuwa salama zaidi, ingawa," anakumbuka, "hakuna usalama tena popote. Makumi ya maelfu ya watu pia wameondoka Bekaa." Watu "wanajua wanachoacha nyuma—mali zao, nyumba zao, historia yao—lakini hawajui wapi pa kwenda. Watu wako mitaani, wakilala kwenye magari. Hatukuwa tayari kuwakaribisha karibu robo ya idadi ya watu." Lakini kwa kila mtu, Mfransiskani ana hamu ya kurudia, "tunasema na kurudia kwamba jambo la mwisho ambalo halipaswi kufa ndani yetu ni tumaini katika Bwana, ambaye hutupatia nguvu ya kuendelea." Anahakikisha kilio kutoka Lebanoni bado ni: "Vita vya kutosha, vurugu za kutosha. Silaha, kama Papa alivyosema, hazizalishi amani; zinazalisha mauaji ya halaiki na chuki. Tunachoomba ni kuishi kwa heshima kidogo."
Asante kusoma makala yetu. Unaweza kuendelea kupata habari mpya kwa kujisajili kwa jarida letu la kila siku. Just click here.
