Papa themelon Fondacionin “Fratello Sole” për projektin agrivoltaik të Vatikanit
R.SH. / Vatikan
Papa Leoni XIV ka themeluar Fondacionin “Fratello Sole”, me qëllim realizimin e një projekti të madh agrivoltaik në zonën ekstraterritoriale të Santa Maria di Galeria, në Romë. Nisma synon të sigurojë energji të pastër jo vetëm për stacionin radiofonik të Vatikanit që ndodhet në këtë zonë, por edhe për të gjithë Qytetin e Vatikanit.
Vendimi është bërë publik përmes një dokumenti papnor të datës 1 qershor 2026. Projekti përfaqëson një hap të rëndësishëm në përpjekjet e Selisë së Shenjtë për të kaluar drejt një modeli zhvillimi të qëndrueshëm dhe ekologjik.
Fondacioni “Fratello Sole” frymëzohet nga vizioni i Papa Françesku, i cili në vitin 2024 kishte kërkuar promovimin e energjisë së rinovueshme përmes dokumentit të tij “Fratello Sole”. Projekti synon të kombinojë prodhimin e energjisë diellore me aktivitetet bujqësore, duke respektuar mjedisin dhe duke promovuar kujdesin për krijimin.
Iniciativa paraqet një model konkret të bashkëjetesës ndërmjet zhvillimit teknologjik, prodhimit të energjisë dhe mbrojtjes së natyrës, në përputhje me parimet e ekologjisë integrale të shprehura në mësimet shoqërore të Kishës.
Fondacioni “Fratello Sole” përfaqëson një shenjë shprese për të ardhmen dhe një shembull se si është e mundur të pajtohet prodhimi i energjisë me bujqësinë, duke respektuar dhe mbrojtur mjedisin, në përputhje me parimet e qëndrueshmërisë mjedisore dhe kujdesit për shtëpinë e përbashkët, të përmbajtura në Enciklikën Laudato Si’, në nxitjen Laudate Deum, në Motu Proprio “Fratello Sole” dhe, në përgjithësi, në Magjisterin shoqëror të Kishës.
Papa ka emëruar për një mandat trevjeçar Suor Raffaella Petrini presidente të Fondacionit, ndërsa Giordano Piccinotti do të shërbejë si zëvendëspresident. Me këtë projekt, Vatikani synon të japë një shembull konkret në përdorimin e energjive të pastra dhe në promovimin e një zhvillimi të qëndrueshëm për brezat e ardhshëm.
