Konferenca ndërkombëtare e organizuar nga Fondacioni Centesimus Annus - Pro Pontifice

R.SH. / Vatikan

“Një botë e fragmentuar në kërkim të spiritualitetit: liria dhe pluralizmi në Doktrinën Shoqërore të Kishës”: kjo është tema e konferencës ndërkombëtare të nxitur dhe të organizuar nga Fondacioni Centesimus Annus - Pro Pontifice, e cila zhvillohet në Vatikan të premten, më 29 maj 2026, pranë Sallës së Sinodit. Vëmendje e veçantë – bën të ditur Fondacioni – do t'i kushtohet gjithashtu edhe krizës së demokracive bashkëkohore dhe dobësimit progresiv të multilateralizmit.

E gjithë konferenca është e strukturuar në një ditë pune, e cila hapet me Meshën e Shenjtë dhe do të vijojë me dy sesione plenare dhe grupe të ndryshme pune të frymëzuara nga metoda sinodale. Gjithçka do të përmbyllet paraditen e së shtunës, 30 maj, me kremtimin e Meshës së Shenjtë në Altarin e Katedrës në Bazilikën e Shën Pjetrit, në Vatikan dhe audiencën me Papa Leoni.