Ipeshkvijtë e Vietnamit në vizitën "Ad Limina": shenjë dhe shpresë e një Kishe të bashkuar

R.SH. / Vatikan

Gati 500 vjet pas fillimit të ungjillëzimit në trojet vietnamite, në vitin 1533, jubileu i gjysmë mijëvjeçarit do të festohet në vitin 2033  nga  Kisha Vietnamite, që vazhdon të rritet dhe të jetë gjithnjë përkrah popullit. Ndërsa në mëngjesin e 24 prillit ishte me Papën Leoni XIV, gjatë audiencës në Vatikan, si pjesë e vizitës Ad Limina e 32 ipeshkvijve, planifikuar për 20-25 prill.

Një Kishë e rritur në historinë e popullit

Sipas statistikave të azhurnuara deri në fund të vitit 2025, katolikët në Vietnam janë mbi 7.57 milionë vetë, në gjirin e një popullsie prej afërsisht 102.3 milionë banorësh. Vietnami aktualisht ka 50 ipeshkvij: 26 ordinarë, 5 ndihmës dhe 17 ipeshkvij nderi; ka edhe një ipeshkëv ndihmës si dhe një ipeshkëv ndihmës të zgjedhur: të dy e morën emërimin  papnor më 11 prill. Kisha vietnameze numëron  27 dioqeza të shpërndara në tri provinca kishtare: Hanoi, Hue dhe Saigon. Disa dioqeza, të tilla si Xuân Lộc, Saigon, Ban Mê Thuột, Đà Lạt, Bùi Chu dhe Kon Tum, kanë një numër të lartë besimtarësh, ndërsa të tjera, të tilla si Lang Son, mbeten pakicë. Ky realitet nxjerr në pah nevojën për të intensifikuar misionin ungjillëzues në të gjitha fushat e shoqërisë.

Një udhëtim bashkimi në Romë

"Takimi me Ipeshkvijtë e Vietnamit më bëri të ndihem si në shtëpi time. Sepse, duke u takuar me ta, takoj Kishën në Vietnam, takoj Popullin e shenjtë të Zotit në Vietnam". Kjo ishte deklarata e Kardinalit Mario Grech, Sekretarit të Përgjithshëm të Sinodit të Ipeshkvijve, pas takimit të tij me Konferencën Episkopale të Vietnamit. Kardinali theksoi frymën e hapjes dhe dialogut të Pastorëve mbi temën e sinodalitetit, duke theksuar se si ipeshkvijtë janë të përkushtuar për të përkthyer mësimet e Kishës në kontekstet e tyre konkrete. Ai theksoi edhe marrëdhënien e gjallë ndërmjet Barinjve dhe Popullit të Zotit, duke vërejtur se Barinjtë ecin përkrah Popullit të Zotit dhe se ky i fundit tregon bujari të madhe ndaj tyre. Shprehu edhe vlerësimin për përgatitjen e Kishës Vietnameze lidhur me procesin sinodal, duke vënë në dukje se kishte marrë dokumente shumë interesante, të cilat besonte se mund të ndaheshin edhe me Kisha të tjera.

Lidhur me fenomenin e migrimit, kujtoi dëshminë e besimtarëve vietnamezë, duke theksuar se, pavarësisht emigrimit, vazhdojnë ta jetojnë fenë e tyre dhe të kontribuojnë në ungjillëzimin e Kishave lokale  aty ku janë të pranishëm.

Këto ditë ipeshkvijtë po kremtojnë Meshën në katër bazilikat papnore të Romës dhe në kishën Santa Maria della Scala, ku pushon Shërbëtori i Zotit, Kardinali Francesco Saverio Nguyễn Văn Thuận. Po takohen edhe me bashkësinë e besimtarëve dhe të rregulltarëve vietnamezë në Romë, mbi 400 pjesëmarrës, përfshirë priftërinj, rregulltarë burra e gra, si dhe laikë. Shtegtimi në Asizi planifikohet për tetëqindvjetorin e vdekjes së Shën Françeskut (1226–2026). Në një intervistë me mediat e Vatikanit, Imzot Dominic Nguyen Tuan Ahn, i dioqezës së Xuan loc, shprehu gëzimin e tij që, pas një udhëtimi të gjatë dhe intensiv në Afrikë, Papa Leoni gjeti mënyrën vëllazërore për t'i takuar dhe, në përputhje me moton e Papës, përsëriti se nevojitet unitet i madh në Kishë. Kujtoi edhe se në Vietnam po bëhen përpjekje për ta arritur këtë.

Thirrje të begata dhe jetë kishtare dinamike

Deri vitin e kaluar Kisha në Vietnam numëronte 8,307 priftërinj, përfshirë 302 të saposhuguruar. Kishte 4,636 seminaristë të mëdhenj, shenjë shprese për të ardhmen. Jeta e kushtuar vazhdon të rritet me 28,493 burra dhe gra rregulltarë, të angazhuar kryesisht në arsim, kujdes shëndetësor dhe bamirësi. Bashkëpunimi i laikëve është veçanërisht i rëndësishëm, me 84,464 katekistë që shërbejnë bashkësive, duke kontribuar në transmetimin dhe rritjen e fesë.

Gjatë vitit 2025, 146,378 njerëz morën Pagëzimin, mbi 140,000 Sakramentin e Kungimit të Parë dhe më shumë se 136,000 Sakramentin e Kreymimit. Për më tepër, u kremtuan 52,448 martesa, shenjë e një feje të jetuar konkretisht brenda familjeve.

Duke reflektuar mbi situatën e thirrjeve, Imzot Pietro Nguyễn Văn Khảm, president i Komisionit për Rregulltarët e Konferencës Ipeshkvnore , vëren se "thirrjet në Vietnam mbeten të shumta, por ka edhe shenja të një ngadalësimi". Ai shton: "Zëri i Zotit vazhdon të jehojë, por pyetja është nëse njerëzimi është i aftë ta njohë atë dhe t'i përgjigjet me guxim. Shumë faktorë të jashtëm, veçanërisht mediat dhe teknologjitë dixhitale, i shpërqendrojnë të rinjtë nga thellësitë e tyre shpirtërore, duke u lënë pak kohë për të dëgjuar vetveten. Prandaj, është e nevojshme të rizgjohet tek të rinjtë dëshira për të kërkuar kuptimin dhe idealin e jetës në heshtje dhe brenda vetes, në mënyrë që ata të mund ta njohin dhe ta mirëpresin bujarisht thirrjen e Zotit për jetë të kushtuar".

Angazhim bamirës dhe shërbim ndaj shoqërisë

Krahas jetës së saj liturgjike dhe baritore, Kisha në Vietnam është fuqimisht e përkushtuar ndaj aktiviteteve bamirëse dhe shoqërore. Aktualisht, ka 1,272 shkolla aktive fëmijësh, 226 strehimore studentësh, 135 qendra shëndetësore dhe 229 institucione bamirësie që ndihmojnë personat me aftësi të kufizuara, jetimët e të sëmurët. Këto vepra flasin vetë për angazhimin konkret të Kishës në shërbim të të pastrehëve.

Formimi dhe zhvillimi i edukimit fetar

Për të nxitur formimin dhe edukimin në fe, Konferenca ipeshkvnore e Vietnamit propozoi, gjatë Asamblesë së saj Plenare të vitit 2010, themelimin e Akademisësë Katolike. Pas një periudhe përgatitjeje, më 29 prill 2014, Imzot Giuseppe Đinh Đức Đạo, aso kohe president i Komisionit për Edukimin Katolik, ia paraqiti projektin Dikasterit për Ungjillëzim dhe, më 2 maj 2014, Dikasterit për Edukimin Katolik. Akademia, nën përgjegjësinë e Konferencës Episkopale, synon të nxisë të kuptuarit e fesë nga Populli i Zotit, të formojë mësues të teologjisë, të zhvillojë reflektimin teologjik në dialog me kulturën vietnameze dhe të identifikojë metoda baritore dhe misionare të përshtatshme për kontekstin aktual.