Kardinali Müller: Ratzinger, bashkëpunëtor i së vërtetës, teologjia e tij, dhuratë për Kishën
R.SH. - Vatikan
Cooperator veritatis -"Bashkëpunëtor i së vërtetës": kështu e quante veten Joseph Ratzinger, pasardhësi i 264-të i Pjetrit: "bashkëpunëtor i së vërtetës", që e përfundoi jetën e tij tokësore më 31 dhjetor 2022, në moshën 95 vjeçare. Kardinali Gerhard Ludwig Müller, Prefekt Nderi i Kongregatës së Vatikanit për Doktrinën e Fesë, e kujtoi pasditen e 30 dhjetorit, në Altarin e Katedrës të Bazilikës së Vatikanit, ku kryesoi Meshën për kujtim të Benediktit XVI, në përvjetorin e tretë të vdekjes. Duke nisur liturgjinë eukaristike, i shoqëruar nga disa priftërinj si dhe Atë Federico Lombardi, President i Fondacionit të Vatikanit Joseph Ratzinger-Benedikti XVI, Kardinali pohoi se Papa Ratzinger "nuk është personalitet i së kaluarës, por anëtar i Korpit të gjallë të Krishtit, që është një në qiell dhe në tokë". Më pas kujtoi Leonin XIV:
"Ashtu si Papa Benedikti, edhe ai mbështetet në trashëgiminë shpirtërore e teologjike të Doktorit të madh të Kishës, Shën Augustinit – nënvizoi kard. Müller - prandaj të dy e vendosin Jezu Krishtin në qendër të fesë së Kishës, korpin e Krishtit, in illo uno unum sumus" –“Në atë një, jemi një”.
Gjithmonë në shërbim të Fjalës së Zotit
Në predikimin e mbajtur në anglisht, Kardinali Müller përshkoi gjithë jetën e Papës gjerman i cili, si profesor i teologjisë dhe si predikatar, " e vuri veten vazhdimisht në shërbim të Fjalës". Si Prefekt i Kongregacionit për Doktrinën e Fesë, punoi me "zellin më të lartë" dhe me "saktësi intelektuale" e, si Papë, "ishte një nga teologët më të mëdhenj" në Katedrën e Pjetrit. "Na la, kështu, një trashëgimi të madhe teologjike me cilësi të jashtëzakonshme. Ndaj me të drejtë njihet si një nga intelektualët e mëdhenj katolikë të kohës sonë" - kujtoi Kardinali Müller, duke shtuar se "edhe Jürgen Habermas, përfaqësuesi më i rëndësishëm i Shkollës neomarksiste të Frankfurtit, i cili mishëron botën intelektuale të një moderniteti pa Zot", kërkoi dialog me të, i bindur se "besimtarët dhe jobesimtarët mund të bashkëpunonin për të shpëtuar botën moderne nga vdekja e ftohtë e antihumanizmit dhe trans-humanizmit".
Opera omnia
Për Prefektin e nderit të Kongregatës për Doktrinën e Fesë, teologjia e Ratzingerit "është dhuratë për mbarë Kishën" si dhe për "brezat e ardhshëm". Veprat e tij të plota, në projekt me gjashtëmbëdhjetë vëllime e me rreth 25,000 faqe, mund të studiohen nga kushdo që ka "interesa shpirtërore, teologjike, filozofike ose teorike-kulturore, si të lashta ashtu edhe të reja", ose që dëshiron të thellohet më shumë në vitin liturgjik ose në Koncilin II të Vatikanit. "Nëse një i krishterë në kërkim të frymëzimit do të trazohej në fe e do të më pyeste se çka duhet të lexojë, mbi të gjitha do t’i rekomandoja tre vëllimet mbi Jezusin e Nazaretit", vazhdoi kard. Müller, duke saktësuar se të tre librat u botuan me emrin e tij personal "për të dalluar autoritetin e tij teologjik - nga ai i Papës".
Gjatë reflektimit, kardinali Müller preku edhe "konfliktin e fesë me arsyen" që nisi nga Iluminizmi. "Shpesh u duk se përfundimet e kërkimit biblik historiko-kritik, të epistemologjisë filozofike, e madje - veçanërisht, të çështjeve që kanë të bëjnë me origjinën e universit dhe të jetës - besimi në Zotin Krijues dhe në Jezu Krishtin, Shëlbuesin e vetëm, ishin kontradiktorë", vërejti ai, duke sqaruar, megjithatë, se "nuk ka asnjë kontradiktë me të Vërtetën e zbuluar për botën e për njerëzimin" dhe se "feja nuk ka nevojë të vërtetohet nga përfundimet gjithmonë të gabueshme të shkencës empirike", pasi "bazohet në Fjalën e Zotit, nëpërmjet së cilës gjithçka që ekziston erdhi në ekzistencë". Për më tepër, "Jezusi, Zot i vërtetë dhe njeri i vërtetë, është vetë e vërteta në Vetjen e tij Hyjnore, prandaj - theksoi Kardinali Müller - njohuria jonë për Zotin në Shpirtin Shenjt është e pagabueshme dhe nuk mund të vihet në dyshim nga njohuria thjesht botërore". Kjo tregon qartë se detyra e teologëve është të demonstrojnë unitetin "ndërmjet fesë së zbuluar dhe njohurisë më të fundit laike të shprehur në teori".
Krishterimi: takim me një Vetje: Jezusin
Së fundi, kard. Müller theksoi atë që Papa Ratzinger e ka përsëritur shpesh: se "Krishterimi, me të gjitha arritjet e tij të mëdha kulturore në mësimdhënien shoqërore, muzikën dhe artin, letërsinë dhe filozofinë, nuk është teori apo botëkuptim, por takim me një vetje", Jezusin, i cili "është e Vërteta", "drita që ndriçon çdo qenie njerëzore". Ndërkohë, Kisha "nuk është organizata e krijuar nga njeriu me program madhështor etik dhe shoqëror", por bashkësia e dishepujve të Krishtit, të cilët i rrëfejnë botës se e kanë kundruar lavdinë e Tij, "si Biri i njëlindur nga Ati, plot hir e vërtetësi". Ndërmjet tyre është edhe Joseph Ratzinger, teolog, ipeshkëv, kardinal e Papë.
