Më 10 qershor, vizita e Papës në Campidoglio: publikohet programi

R.SH. / Vatikan

Salla e Shtypit e Vatikanit publikoi hollësirat e vizitës prej rreth dy orësh të Papës, në takim me kryebashkiakun Gualtieri dhe autoritetet qytetare. 

Sot paradite, 5 qershor, Salla e Shtypit e Selisë së Shenjtë publikoi programin - përgatitur nga Prefektura e Shtëpisë Papnore - e vizitës që do të bëjë Papa në Campidoglio të hënën, më 10 qershor. E paralajmëruar një muaj më parë, vizita do të zgjasë rreth dy orë.

Françesku do të mbërrijë në orën 9 të mëngjesit me makinë në kodrën romake, ku do të pritet nga kryebashkiaku Roberto Gualtieri. Biseda private do të zhvillohet në Pallatin Senatorial, në zyrën e kryetarit. Më pas, duke kaluar nëpër Sallën e Sixhadesë, Ipeshkvi i Romës do të përshëndesë anëtarët e Sekretarisë së Kryetarit të Bashkisë dhe, në Sallën e Flamurit, do të firmosë “Librin e Artë Kapitolin”.

Në vijim, në Sallën Giulio Cesare, do të takohet me këshilltarët dhe autoritetet e tjera të ftuara. Gjatë takimit, do të mbajë një fjalim e, më pas, do të bëhet shkëmbimi i dhuratave. Në përfundim Françesku dhe kryetari i bashkisë do të dalin në Lozhën e Pallatit Senatorial për të përshëndetur qytetarët romakë të mbledhur në Piazza del Campidoglio. Pasi të kthehen në Sallën Giulio Cesare, Papa dhe Gualtieri do të ndalojnë përpara pllakës përkujtimore të vizitës. Më pas, duke kaluar nëpër sallën "Laudato si'", do të shkojnë në sallën Protomoteca për një takim të shkurtër me punonjësit e bashkisë.

Rreth orës 11:00, në Portico del Vignola, Papa do të përshëndetet me të pranishmit, për t'u kthyer në Vatikan.

nga Osservatore Romano.